¹ Voonse veena mwiijoko yo muvuhiikana vakuteke vanfumwaavo moonse mukuswaneere. Va lukeere kuchita vulyo kuti iizina lye Ireeza ne ituto zisiye kunyaanswa. ² Vahiikana veena vanfumwaavo vava rumeri vasiye kuvavulyira iikute mukuti vamweeti. Kono, va vateendere ahulu mukuswaneere. Mukuti kuvoolyerwa vazumina ne vasunitwa. Wu rute ne kuwaamba kahe iizi ziintu. ³ Mmi muuntu cho ruta ivangeri isalyi njeyo nasa zumini maanzwi o vusakusima a Simwiinetu Kirisiti Jeeso ne ituto izuwana ne tapero, ⁴ wulyinyemuna mane keena chezi. Mmi wusuni zaambo ziseena ituso ne kukanan za maanzwi zilyeetera munna, kulyilwiisa, matapa, ne kuzezerera vamwi vuvilala, ⁵ ne kuzwiira havusu mukusazuwaana kwa vaantu ne mihupulo mivilala. Chivava zoverwa musakusima mane vazeza kuti kurapera iinzira yimwi yo kuwaana malyi maangi. ⁶ Lyinu kurapera kumaniine kuvozekeza maaswe, ⁷ mukuti kakwiina chitubeeza naacho munkaanda, mane kakwiina cheeti nituzwa chaacho. ⁸ Kono, tulyi tumerere zilyo ne zaparo. ⁹ Lyinu vasaka kuhuma vanjira mumulyiko, ne mutuswa. Vava ne mihupulo yo vuholo yiva lyetera vukaavo, ne kutwaala vaantu kuusi ku kusinyeha ne kuzoverera. Mukuti kusuna malyi ngo muhisi wo vuvilala voonse. ¹⁰ Vamwi vaantu vasuni vulyo vava ziwuluki munzira ye tumero mmi vava lyitwi avoveene kulyi lyeetera masukuluka maangi. ¹¹ Mmi wuuwe, u muntu wee Ireeza, wutiye iizi ziintu. Wu kakanine kushiyama, kuraper, vusakusima, irato, iinkulonde, ne kushiyama. ¹² Lwe inkoondo yishiyeeme ye tumero. Lyi woonderere muvuhalo vusamani vo vasumpirwa, ne vupaki vo valyiwaambi cho kushiyama ku vaantu kuvoonse. ¹³ Ni layerera havusu vwe Ireeza, yoha vuhalo kuziintu zoonse, ne havusu vwa Kirisiti Jeeso, ya vashupi havusu vwa Pontiyasi Pilato naaha vupaki vushiyeeme, ¹⁴ mamere mulawo no seena kabalyi kapa kunyaanswa mbwiita ha kuvoneka kwa Simwiinetu Jesso Kirisiti. ¹⁵ Ireeza ka senulye kwiiza kwa Kirisiti che inako iswaneere, iye yeyena yo tohonolofazwa Simwiine yo vusa iye Simwiine yo lawula. ¹⁶ Iye yeyena nja safwi yiwikala mwiseri kusasikwa. Kakwiina muuntu yo muvona kapa yo woola kumulolyerera. Kwalyi kuve ne kute ne kuvusa kusa mani. Ameni. ¹⁷ Wulayerere vahumine mweyinu inkaanda kuti vasiye kulyihiinda ne kusepa vuhumi, vuseena sepwa. Mmi, vasepe Ireeza. Wutuha vuhumi vo vukusakusima kuti tulyikolye. ¹⁸ Valwiire vachite neenza, vahume miteendo milotu, va wave ne kutusa vamwi. ¹⁹ Mukuswana valyi viikire ziintu kumatangiro kuvakanyeza zisikeeza, kuti vawoolye kulyiwonderera vuhalo sakata. ²⁰ Timoti, vavalyere choova heewa. Wu tomolohe zaambo zokusooha zisena ituso ne mihupulo yo kusazuwaana izivo ya mapa. ²¹ Vamwi vaantu vava waambi kahezi ziintu cho kumanina vazova mwi tumero. Mikoonde ive naawe.