¹ Mmi Luhuho luwamba cho kukola wuuti munako za mamanimani vamwi vaantu kava siye itumero ne kuteeka inhuho zicheenga zo kuruta kwa madimona ² cho vuhirihiri vwa mapa, chihakululyi chaavo chiva sinywa ³ Kava viinde vaantu ku sesa ne kuva viinda kulya zilyo zivaa vuumba ne Ireeza zitambulwa cho kulyitumera naavana va zumina niveezi musakusima. ⁴ Mukuti zivuumbantu chimwi ne chimwi che Ireeza chishiyeeme, mmi kazikaanwa hazitambulwa siinte. ⁵ Mukuti zijolweezwa che liinzwi lye Ireeza ne itapero. ⁶ Hamulwiira vamweetu cheezi ziintu, ka muve vahikaana vashiyeeme va Jeeso Kirisiti. Mukuti mukozeezwa maanzwi a shiyeeme a muvarutwa ni mwaechirira. ⁷ Mmi wukaane makande a sena ituso a sunitwa ne vachembere. Kono, wulyitwaeza kusuna Ireeza. ⁸ Mukuti kutwaeza muviri musevezi kutusa kanini, mmi kurapera kutusa muziintu zoonse. Ziina isepiso yo vuhalo vwahanu ne muhalo vusikeeza. ⁹ Wuuwu mulaezo ngo vusakusima mane wulukeere kutambulwa koonse. ¹⁰ Mukuti nchalyo kuti tuteende ahulu ne kusukuluka. Mukuti tuzumina kwe Ireeza yo hala, Muhazi wa vaantu voonse, mmi vuhulu vazumina. ¹¹ Lwiire vaantu mmi wuvarute iizi ziintu. ¹² Kaanzi kuvi no yo kunyansa cho vuhwiire, mmi kwaamba kwaako kuve chishupo ku vazumina , lyiwoonde, iraato, kusepahala, ne kujolola. ¹³ Mbwiita ha nisika, wu valye, ne kukutaza, ne kuruta. ¹⁴ Wu siye kulyitokomolosa ineo yiwiina nayo, yo vaheewa che chiporofita, cho kuviikwa maanza ne vakulwaana. ¹⁵ Wu tokomere iizi ziintu. Wuve muziri, kuti kuzwiira havusu kwaako kuve vushupi ku vaantu voonse. ¹⁶ Wu livavalyere ne kutokomera iituto wu zwiire ha vusu cheezi ziintu. Mukuti kuchitavulyo, ko lyihaza ne kuhaza vana va kuteeka.