¹ Kuwaamba wuuku nkovusakusima: Chikuti wuumwi nasaka kuva muruti, wuzeza musevezi mulotu. ² Lyinu muruti wulukeere kuva ne chinyansika. Ave mukwaame wiina mukulwakazi wumwiina. Yo lyiwoonda, yo zuwiseza, kulyikuteka, ne kutambula veene. Na woola kuruta, ³ Ka lukeere kuva chidakwa, yo hweere kulwa, kono yo shiyeeme. Ka lukeri kuva yo suni malyi. ⁴ Yo woola ku yeenza iirapa lyaakwe siinte, lukeere kuti vaana vaakwe va muzuwe ne kumukuteka munzira zoonse. ⁵ Chikuti muuntu kawoolyi kuyeenza irapa lyaakwe, ka woolye vulye kutokomera iikereke ye Ireeza. ⁶ Ka lukeere kuva muhya mwiitumero, kuti asiye kuva ne kulyinyemuna mane amanine a wiire mukuwatulwa siina nje diavulosi. ⁷ Wu lukeere ku pakwa ahulu ne veena kuunze, kuti a siye kunyaanswa ne kuva mukaswa ka diavulosi. ⁸ Munzira iswana, madiyakoni valukera kuva vashiyeeme, ising'i ve milomo yo vere. Vasiye ku nywa ahulu yiwayine kapa kuva ne inkulonkaando. ⁹ Va woonde zipirii ze itumero che chihakulyi chijolola. ¹⁰ Valukera kuzumininwa taanzi, lyinu ndiva teenda mukuti kaveena mulandu. ¹¹ Munzira yiswana, va mwiihyavwaavo valukera ku kutekeha, ising'i vasooha, kono valyiwoonda ne kusepahala muziintu zoonse. ¹² Madiyakoni valukera kuva ne mukulwakazi wumwiina. Valukera kuyeenza siinte vaana vaavo ne marapa aavo. ¹³ Mukuti avo vavachiti siinte valyiwanina maziimo ashiyeeme ne kukola mwiitumero yiina mwa Kirisiti Jeeso. ¹⁴ Chini ming'olyera iizi ziintu, Niina isepo yo kwiiza kweenu chovufwihi. ¹⁵ Mmi ha Ni lyiyeha, Ni ming'olyera kuti mwiizive kuti mulyiwoonda vulye munzuvo ye Ireeza, ikereke ye Ireeza yo hala, Ipinahalyi iikoza vusakusima. ¹⁶ Tuvoonse tuzumina kuti ikunutu ye Ireeza iinkaando: ''A va voneswa munyama, na tomamiswa no Luhuho, na vonwa ne mang'iloyi, na rutwa mu mishovo yoonse, nkaanda yoose ni ya muzumina, mmi na tantusezwa kwiwulu mukuveera.''