¹ Lyinu, chentaanzi, ni mikutaza kuti iikupo zo kulyiviika kuunsi, itapero, kuraperera, ne kulyitumera zi chitirwa vaantu voonse, ² vasimwiine ne voonse venaziho, kuti tuhalye vuhalo vusheeme vulyiketete mukurapera ne kulyisaanta. ³ Iichi chishiyeeme ne kutambulwa havusu vwe Ireeza Infumweetu. ⁴ Wu saka kuti vaantu voonse va hazwa ne kwiiziva vusakusima ⁵ Mukuti Ireeza wu mwiina, ne muzimanini we Ireeza ne muuntu, muuntu Kirisiti Jeeso. ⁶ Ava lizwiisa chitavero cha voonse, naalyi vushupi che innako ishiyeeme. ⁷ Chelyi ivaka ni vasalwa kuva chiyaanzi ne muapositola - Ni waamba vusakusima, Kani cheengi-mane vuruti vwa veenkaanda muitumero ne vusakusima. ⁸ Lyinuhanu, Ni saka kuti vakwaame voonse va kurapera ni vanyemwiine maanza nikuseena kuveenga kapa iinkaani. ⁹ Mukuswana vakulwakazi vazwate zizavalo zishiyeeme, cheekute ne kulyi woonda, ising'i iinsuki zihosetwa cho vuliizi kapa igauda kapa ipelela kapa zizavalo zidura, ¹⁰ mmi chilukeere vakulwakazi va ishiyeeme va teendera Ireeza. ¹¹ Mukulwakazi a teeke ituto na tontweere nalyi viikite kuunsi. ¹² Ka ni zuminini mukulwakazi kuti a rute kapa ave hewuulu lyo mukwaama, mmi e kalye na tontweere. ¹³ Mukuti Adama ava vuumbwa intaanzi, kuzwa Eva. ¹⁴ Adama kana ava cheengwa, mmi mukulwakazi ava cheengwa mane na luutamulawo. ¹⁵ Nahakuva vulyo, ka haazwa cho kupuluha vaana, mmi havazwiira havusu mwiitumero ne irato ne kulyijoloza cho kulyiwoonda.