Trompet ka dime memulai kanatakut sa ka isa ¹ Balalu,malaikat ka dime nyiwui trompet e, balalu kuki nginni isa kua bintang lawu tekei langit gi entu bumi,balalu napot aye na ami kan kunci tolong jurang maut. ² Aye nguka tolong jurang maut,maka mambai lah atuk tekei tolong hio,sameh atuk tekei tungku sa hante,nihi mate andrau ta angkasa jari mieng gene atuk tolong hio. ³ Udi hio,tekei huang atuk hio balualah belalang-belalang gi entu bumi,nihi here na ami kuasa sameh kuasa kalajengking ta bumi. ⁴ Balalu,napot here na pesenkan mat bakoi nyanrusak rikut-rikut bumi,pamelum-pamelum an,atawa kayu-kayu an,tapi ekat here sa bakoi ampun segel Allah tangar rai here. ⁵ Here bakoi na izinkan mat na wunu here,tapi mat nyansara here salawah 5 wulan;balalu ka rara hio sameh nihi siksa an kalajengking waktu aye nenget murunsia. ⁶ Ta wayah hio,murunsia sagar nupui pampatei,tapi here bakoi kahalu e.here kakan matei,tapi pampatei ngalawit here. ⁷ Wujud belalang-belalang hio sameh kuda-kuda sa na siapkan mat perang;balalu tangar entu ulu here naan isa hal sameh mahkota amas,rai mate here sameh rai murunsia. ⁸ Wulu here sameh wulu wawei nihi dipen here sameh dipen singa, ⁹ balalu dada here sameh baju besi,balalu lengan kalekep here sameh lengan kereta-kereta nihi ajoh kuda sa berpacu tangar medan perang. ¹⁰ Balalu,ikui here sameh kalajengking nihi naan henget e,balalu ta huang ikui here lah naan kuasa mat nampahanang murunsia salawah 5 wulan. ¹¹ Raja sa memerintah here aye hio malaikat jurang maut,sa huang bahasa Ibrani aran e aye hio "Abadon",sedangkan bahasa Yunani aran e aye hio "Apolin". ¹² Bencana sa kaisa haot nangkah,tapi masih naan 2 ka rara lain sa sagar hawi. Trompet ka enem malengan ¹³ Balalu, malaikat sa ka enem nyiwui trompet e,balalu kuki ngarengei lengan tekei ka epat tandruk altar*amas sa naan ta hadapan Allah, ¹⁴ ngeau nihi malaikat ka enem sa negei trompet hio,"sa napas bo ka epat malaikat sa nahuruk ta hungei Efrat sa hante hio." ¹⁵ Balalu,ka epat malaikat hio,sa haot na persiapkan mat jam nihi andrau,wulan nihi taun hio, na sanapas bo mat munu 1/3 umat murunsia. ¹⁶ Jumlah tentara ba kuda here aye hio 200 juta ajoh e; kuki ngarengei jumlah here. ¹⁷ Balalu,kala hio lah kuki nginni huang panginni an * kuda-kuda hio nihi here sa maharung tangar entu e;here sa nunggang e makai lama besi ba warna mariang malelap,biru ma ieng,nihi madintang sameh balerang;nihi ulu kuda-kuda hio sameh ulu singa nihi tekei wawa here balua apui,atuk,nihi balerang. ¹⁸ Nihi ka telu e lah 1/3 murunsia na wunu;nihi apui,atuk nihi balerang sa balua tekei wawa here. ¹⁹ Gene,kakuatan kuda-kuda hio naan ta wawa nihi ikui here.Gene,ikui here sameh nipe balalu naan ampun ulu,palus nihi hio lah here nampahanang. ²⁰ Tapi,murunsia sa selamat,sa bakoi matei ulah bencana hio,tatap bakoi batobat tekei perbuatan-perbuatan tangan here,bahwa here bakoi tau manyembah roh-roh raat nihi berhala-berhala*tekei amas,perak,tembaga,watu,atau kayu;sa bakoi kiuh nginni,ngarengei,atau lei takia, ²¹ balalu here bakoi batobat tekei ba kawunu,sihir,*percabulan,nihi ngalat.