Malaikat nihi puntalan kitab Halus ¹ Balalu,kuki nginni isa malaikat gagah lain e minau tekei surga, ba pakaian awan nihi pelangi naan ta entu ulu e,balalu rai e sameh mate andrau,nihi pee e sameh tiang apui. ² Malaikat hio negei isa kua kitab halus ta uka.Balalu,aye narah pee kawan e ta laut palus pee kawi e ta entu, ³ Balalu kamiak nihi lengan sa mehet,sameh singa sa mengaum;balalu udi aye kamiak,pitu gemuruh guntur namparengei lengan here. ⁴ Katika ka pitu guntur hio haot ba lengan,kuki kakan manulis kan e,tapi kuki karengei lengan tekei surga ngeau,"Segel bo inon sa haot na antuh ulah ka pitu guntur hio!ada manulis kan e!" ⁵ Udi hio,malaikat sa na inni kuki mindri ta laut palus ta entu ngenat tangan kawan e gi langit, ⁶ balalu ba sumpah demi Aye sa welum sa lawah-lawah e,sa menciptakan langit nihi kaluhan isi e,nihi bumi palus kaluhan isi e,palus laut nihi kaluhan isi e,bahwa bakoi sagar naan penundaan lagi, ⁷ tapi tangar wayah lengan malaikat ka pitu,katika aye kakan nyiwui trompet e,maka genep lah rahasia Allah,sameh sa na kahampe aye napot here hamba E: here nabi*." ⁸ Udi hio,lengan sa huni na rengei ku tekei surga ngeau lagi napot kuki,eau e," tulak palus alap lah puntalan kitab ta uka tekei tangan malaikat sa mindri ta entu laut nihi entu hio." ⁹ Maka,kuki tulak napot malaikat hio palus ngalako e ngami puntalan kitab halus hio napot kuki.Balalu,malaikat hio ngeau napot kuki,"alap lah kitab iti palus kuta bo,hio sagar ngulah wuntung nu mapait,tapi ta wawa nu,hio sagar na inam mamis sameh madu." ¹⁰ Balalu,kuki ngalap kitab halus ta tangan malaikat hio palus nguta e,palus ta wawa ku hio ta inam mamis sameh madu;balalu katika kuki haot nguta e,wuntung ku jari mapait. ¹¹ Balalu,aye ngeau napot kuki," kayo harus ba nubuat*lagi tangar hadapan ajoh bangsa nihi kaum nihi bahasa nihi raja-raja."