Anak Domba nguak segel sa ka pitu ¹ Balalu,katika Anak Domba nguka segel sa ka pitu,naan ka sunian ta surga kira-kira satengah jam lawah e. ² Balalu,kuki kakinni ka pitu malaikat sa mindri ta hadapan Allah,nihi pitu trompet na ami kan napot here. ³ Balalu,malaikat lain hawi palus mindri tangar Altar*,negei erang kua pedupaan amas;balalu napot e na amikan ajoh dupa mat na persembahkan hayak doa-doa ulun-ulun kudus ta entu Altar amas sa ta hadap tahkta hio. ⁴ Balalu,atuk dupa hio,hayak nihi doa-doa ulun-ulun kudus,mambai gi hadapan Allah tekei tangan malaikat hio. ⁵ Balalu,malaikat hio ngalap pedupaan palus ngisi e nihi apui sa na alap tekei altar palus nawut e gi bumi;maka ta rengei lah lengan guntur sa nga hayak kilat nihi gempa bumi.Trompet ka isa hampe trompet ka epat na siwui ⁶ Udi hio,pitu malaikat sa negei pitu trompet hio basiap-siap mat nyiwui trompet here. ⁷ Malaikat ka isa nyiwui trompet e,maka jari lah uran es nihi apui ba sampur ira;balalu na santudrak kan gi bumi,maka rakit lah sepertiga bumi nihi sepertiga kakau kayu palus rakit lah kaluhan rikut hijau. ⁸ Malaikat ka rueh nyiwui trompet e,maka isa sameh gunung sa rakit apui na tawut kan gi huang laut;balalu sepertelu tekei laut jari ira, ⁹ Maka sepertelu tekei satua sa naan ta laut balalu ampun welum jari matei,balalu sepertelu tekei kapal na san nenuh. ¹⁰ Malaikat ka telu nyiwui trompet e,maka lawu lah tekei langit isa wua bintang hante,malelap sameh obor,nihi bintang hio nukun sepertelu tekei hungei nihi mate ranu. ¹¹ Ngaran bintang hio aye hio Apsintus.Maka,sepertelu tekei kaluhan ranu hio gene ranu hio haot na jari kan mapait. ¹² Malaikat ka epat nyiwui trompet e,maka ta ompak lah sepertelu mate andrau,sepertelu wulan,balalu sepertelu bintang hampe sepertelu tekei here jari maieng, palus sepertelu ka andrau jari mieng palus sameh hio lei ta andrau kamalem. ¹³ Balalu,kuki nginni nihi ngarengei erang kikui wurung raja wali samiding ta penah-penah langit,ngeau nihi lengan mehet,"salaka,salaka,salaka lah here sa suni ta bumi gene lengan trompet ka telu malaikat lain sa masih sagar na siwui."