Ulun ajoh ta surga nawat Allah ¹ Udi hio,kuki karengei lengan sa mehet sameh sa kumpulan hante ulun ta surga ngeau,"Haleluya!Keselamatan,Kemuliaan,nihi Kekuasaan aye hio ampun Allah takam ² Gene penghakiman E sa wuah palus adil;gene Aye haot mengadili lahung hante hio,sa nyanrusak bumi nihi kebejatan e,balalu haot ngabalas ira hamba-hamba E napot lahung hio." ³ mat karueh kali e,here ngeau,"Haleluya!atuk lahung hio haot mambai hampe kalalawah e." ⁴ Balalu,ka ruam pulu epat tueh-tueh* nihi ka epat satua hio sujud nihi menyembah Allah,sa maharung ta entu takhta,nihi ngeau,"Amin!* Haleluya!" ⁵ Udi hio,ta rengei lah lengan tekei takhta,"Pujilah Allah takam,hai kaon kaluhan sa melayani Aye,maeh sa halus atawa sa hante,sa menghormati Aye!" Pesta kakawinan Anak Domba ⁶ Balalu,kuki ngarengei lengan sameh sakumpulan ulun ajoh,sameh lengan ranu baah,nihi sameh lengan guntur sa hebat,ngeau,"Haleluya!gene,Tuhan Allah takam sa Maha Kuasa memerintah. ⁷ Oi ayu takam basanang palus basurak-surak,nihi ngami kemuliaan napot Aye gene andrau kakawinan Anak Domba haot hawi,nihi pengantin wawei E sa haot siap. ⁸ napot e haot naami kain linen halus sa barasih nihi maraai,mat na pakai gene kain linen hio aye hio gawian wuah sa na ulah ulun-ulun kudus." ⁹ Udi hio,malaikat hio ngeau napot kuki,"Tulis kan lah iti: Naberkati lah ulun sa na undang gi jamuan kakawinan Anak Domba!" Balalu,aye ngeau lagi napot kuki," iti aye hio paneran-paneran sa wuah tekei Allah." ¹⁰ Balalu,kuki sujud ta pee malaikat hio mat menyembah aye.tapi,aye ngeau napot kuki,"ada ngulah hio gene kuki lei walah sameh kayo nihi pulaksanai-pulaksanai nu sa bategei nihi kesaksian Yesus.Sembah lah Allah gene kesaksian Yesus aye roh nubuat.*"Panunggang kuda mahilak ¹¹ Udi hio,kuki nginni surga ta uka,balalu balua lah erang kikui kuda mahilak; sa maharung ta entu e ba ngaran Setia nihi wuah,balalu huang sa wuah aye menghakimi nihi ba perang. ¹² Mate E sameh lelap apui,ta entu ulu E naan ajoh mahkota,nihi aye naan ampun ngaran sa tatulis,sa bakoi na karasa erang kulun lei,kecuali tenga E kakareb. ¹³ Aye makai jubah sa haot na solop gi huang ira,nihi aran E aye hio Firman Allah. ¹⁴ Kaluhan pasukan sa naan ta surga nutah Aye nihi nunggang kuda mahilak balalu bapakaian kain linen halus sa mahilak nihi barasih. ¹⁵ Tekei wawa E,balua isa pedang makumat sa na pakai mat ngompak bangsa-bangsa.Aye sagar memerintah entu here nihi tungkeh besi.Aye sagar miek anggur huang watu kilangan,sa aye hio muruka Allah Sa Maha Kuasa. ¹⁶ Tangar jubah nihi sapak E tatulis aran iti : RAJA ENTU KALUHAN RAJA NIHI TUAN ENTU KALUHAN TUAN. ¹⁷ Udi hio,kuki nginni erang kulun Malaikat mindri ta mate andrau.Aye kamiak nihi lengan mehet napot kaluhan wurung sa samiding ta langit,"ayu,bakumpullah mat umba huang jamuan kuman hante Allah, ¹⁸ Mat kayo kiuh nguta daging here raja,daging here pangalima,daging ulun-ulun kuat,daging kuda-kuda balalu here sa maharung ta entu e,balalu daging kaluhan ulun,maeh hio ulun bebas atawa ulun merdeka,ulun halus atawa ulun hante." ¹⁹ Balalu,kuki kakinni satua hio nihi here raja ta bumi namput pasukan here bakumpul mat baperang nawan Aye sa maharung ta entu kuda mahilak hio balalu nawan pasukan E. ²⁰ Balalu,satua hio na japut,hayak nihi Nabi palsu e sa haot ngagawi tanda-tanda ajaib ta hadapan satua hio,sa nihi e aye nyantawang here sa narime tanda satua hio balalu here sa menyembah patung e.here kaluhan na tawut welum-welum gi huang lautan apui sa malelap-lelap ulah belerang. ²¹ Balalu,tisai e na wunu nihi pedang sa balua tekei wawa Aye sa maharung ta entu kuda mahilak hio nihi kaluhan wurung na ta mising nihi daging here.