Babel na sa nenuh ¹ Udi kaluhan iti,kuki nginni malaikat lain minau tekei surga,sa naan ampun kuasa sa hante,nihi bumi na santarang ulah kemuliaan e. ² Aye kamiak nihi lengan sa mehet,eau e,"runtun!haot runtun Babel sa hante hio!aye haot jari uneng muneng setan-setan nihi penjara gi setiap roh najis,sarang gi setiap jenis wurung sa najis nihi sa na rikang. ³ Gene,kaluhan bangsa haot mahamui anggur nafsu zina e,raja-raja ta bumi haot ba zina nihi aye,balalu pedagang-pedagang ta bumi jari tatau gene hawa nafsu e sa hante." ⁴ Balalu,kuki ngarengei lengan lain tekei surga ngeau,"oi umat Ku,balua lah tekei e mat kayo bakoi umma huang dosa e balalu bakoi narime bencana sa sagar nukun e. ⁵ Gene,dosa-dosa e haot batuyuk hampe gi langit nihi Allah haut ngitung kahala-kahala e. ⁶ Ulah bo kota hio sameh aye haot ngulah e,waleh bo napot aye rueh kali lipat entu gawian-gawian e,balalu huang cawan sa na pakai aye mat nyampur,sampurkan bo rueh kali lipat. ⁷ Kangajoh aye haot memuliakan nihi ngami kemewahan ta tenga e kakareb,ami bo kahanang nihi ka susah napot aye kangajoh hio.Gene,aye ngeau huang atei e,`Kuki maharung sameh erang kulun ratu,kuki bakoilah walu nihi bakoi sagar piji nginni kasusah.` ⁸ Ulah gene hio,huang isa andrau bo bencana-bencana e sagar hawi napot aye,aye hio kapateian,kasusah an,nihi kaluan.aye sagar na tutung nihi apui gene Tuhan Allah sa menghakimi aye hio bakuasa." ⁹ Raja-raja ta bumi,sa haot berzina palus welum huang kemewahan hayak e,sagar nangis nihi meratapi e wayah here nginni atuk apui pa nutung an e, ¹⁰ mindri lawit-lawit gene takut nadap siksaan e,balalu nangis,"Salaka!salaka lah,kota sa hante,Babel,kota sa kuat hio! gene,huang isa malem bo penghakimannu haot hawi!" ¹¹ Pa matang-pamatang ta bumi sagar nangis nihi basusah mat gi kota hio gene bakoi erang kulun sagar midi batangan here lagi, ¹² aye hio amas,perak,permata,mutiara,kain linen halus,kain ungu,kain sutra,kain kirmizi,ajoh jenis barang tekei kayu sa harum enguh e,barang-barang sa na ulah tekei gading,tekei kayu sa larang,tekei tembaga,besi,marmer, ¹³ Kayu mamis,rarampah,harum-haruman,mur,kemenyan,anggur,ilau,tepung halus,gandum,lembu sapi,domba,kuda,kereta,budak,hampe nyawa murunsia. ¹⁴ Here sagar ngeau,"wua sa kanakakan jiwa nu haot jawoh tekei kayo,kaluhan sa mewah nihi maeh haot jawoh tekei kayo,balalu bakoi sagar na kahalu lagi." ¹⁵ Here pambatang barang-barang iti,sa jari tatau gene kota hio,sagar mindri lawit-lawit gene takut nadap siksaan sa na inam kota hio,nelang nangis palus ba kabung. ¹⁶ Here ngeau,"salaka!salakalah kota hante hio,sa bapakaian linen halus;sa makai kain ungu balalu kain kirmizi,nihi bahiaskan amas,watu-watu permata,nihi mutiara! ¹⁷ Gene,huang isa jam bo,kaluhan katatau hio haot na sanjawoh!"kaluahn nakhoda,penumpang,awak kapal,nihi kaluhan ulun sa nupui kuta tekei laut sagar mindri lawit-lawit, ¹⁸ Balalu kamiak katika here nginni atuk tutungan kota hio,"kota awe kah sameh kota hante iti?" ¹⁹ Here namur abu gi ulu here palus kamiak nihi nangis balalu bakabung,eau e,"salaka!salakalah kota hante hio,sa tekei e kaluhan ampun kapal ta laut haot jari tatau gene kalabihan e!gene,huang erang jam bo,kota hio haot na ulah jari suni!" ²⁰ Ba sanang lah entu aye,oi surga,oi ulun-ulun kudus,rasul-rasul,*nihi nabi-nabi!*gene Allah haot nampa lawu hukuman entu kota hio napot kayo. ²¹ Balalu,isa malaikat sa kuat ngenat isa wua watu sa hante e sameh watu kilangan palus nawut e gi laut namput ngeau,"sameh hio lah Babel,kota hante hio,sagra na sanawu nihi bakoi sagar piji ta kahalu lagi. ²² Lengan here pangusik kecapi,pa nyiwui suling,panyiwui trompet,nihi alat musik lain e bakoi sagar tarengei lagi ta huang nu.bakoi naan pengrajin sa kiuh ngualah kaluhan kerajinan,sa sagar na kahalu ta huang nu.lengan panggilingan bakoi sagar terengei lagi ta huang nu. ²³ Cahaya lampu bakoi sagar bacahaya lagi ta huang nu.lengan pangantin laki nihi pengantin wawei bakoi sagar tarengei lagi ta huang nu,gene pedagang-pedagangnu aye hio panga hante-panga hante ta bumi.gene,kaluhan bangsa haot na santawang ulah sihir nu.* ²⁴ Balalu,ta huang kota hio na kahalu ira nabi-nabi,ulun-ulun kudus,nihi ira kaluhan ulun sa haot na wunu ta bumi."