Umat Allah manyanyikan nyanyian bio ¹ Udi hio,kuki nginni Anak Domba mindri tangar bukit Sion,balalu hayak aye naan 144 ribu ulun,sa naan aran Amabah E tangar rai here. ² Kuki ngarengei lengan tekei surga sameh gamuruh ranu sa ajoh nihi sameh lengan guntur sa mehet,tapi lengan sa na rengei kuki hio sameh lengan here pamain kecapi sa ngusik kecapi here. ³ Here menyanyikan isa nyanyian bio tangar hadapan tahkta ta muka ka epat makhluk,namput ta muka tueh-tueh*.bakoi erang kulun lei kiuh mempelajari nyanyian hio sa lain ka jatuh epat pulu ribu ulun sa haot na tewuh tekei bumi. ⁴ Here aye hio ulun-ulun sa bakoi menajiskan tenga nihi wawei-wawei gene here bujang.here aye hio ulun-ulun sa nutah Anak Domba gi awe lei Aye tulak.here na tewuh tekei helang murunsia sameh wua-wua ka isa gi Allah nihi Anak Domba. ⁵ Bakoi naan oso huang wawa here;here bakoi ba hala.Pesen tekei telu malaikat ⁶ Kuki ngini malaikat lain samiding ta penah-penah langit,nunda Injil* kekal mat na kabarkan napot here sa muneng tangar bumi palus napot kaluhan bangsa,suku,bahasa,nihi kaum ⁷ balalu aye ngeau nihi lengan sa mehet,"Takutla napot Allah palus ami bo kemuliaan napot Aye gene wayah penghakiman E haot hampe;sembah lah Aye sa menciptakan langit,bumi,laut,palus kaluhan mate ranu." ⁸ Balalu,malaikat sa lain,sa karueh,nutah nihi ngeau,"Runtun,haot runtun Babel sa hante hio gene aye haot ngulah kaluhan bangsa ngoot anggur nafsu sekseual e sa raat." ⁹ Udi hio,malaikat sa lain,sa katelu,nutah karueh malaikat sa mete e,palus ngeau nihi lengan mehet,"amun hie bo sa menyembah binatang hio namput patung e,balalu narime isa tanda tangar rai atawa tangan e, ¹⁰ ulun hio sagar ngoot anggur muruka Allah,sa na tuang lei nihi kekuatan penu gi huang cawan muruka E,balalu aye sagar na siksa nihi apui namput belerang tangar hadapan malaikat-malaikat kudus nihi ta hadapan Anak Domba ¹¹ Balalu,atuk siksaan here mambai salawah-lawah e.here bakoi naan waktu mat istirahat,maeh kaandrau atawa kamalem,aye hio here sa menyembah satua nihi patung e,atawa hie lei sa narime tanda aran e." ¹² itilah ketekunan ulun-ulun kudus sa nyaga perintah Allah nihi iman here ta huang Yesus. ¹³ Balalu,kuki ngarengei lengan tekei surga ngeau,"tuliskan bo iti:Mulai wayah iti,na berkati lah ulun matei,sa matei ta huang Tuhan."Roh* ngeau,"Wuah,mat here kiuh ba istirahat tekei kauyuh here gene gawian-gawian here nutah here."Bumi na wasi ¹⁴ Balalu,kuki ngini isa awan mahilak balalu maharung ta entu awan hio sameh Anak Murunsia*, makai mahkota amas tangar ulu E balalu arit* sa kumat tangar tangan E. ¹⁵ Balalu,malaikat lain balua tekei Bait Allah,palus kamiak nihi lengan mehet napot Aye sa maharung tangar entu awan,"Guyang bo arit Nu balalu wasi bo gene wayah musim masi haot hampe balalu sa na wasi ta bumi haot mihak." ¹⁶ Balalu,Aye sa maharung ta entu awan ngguyang arit E gi entu Bumi,palus bumi lei na wasi. ¹⁷ Udi hio,malaikat lain balua tekei Bait Allah sa ta surga,balalu aye lei naan arit sa kumat. ¹⁸ Balalu,malaikat lain lagi,sa bakuasa entu apui,balua tekei altar*. Aye kamiak nihi lengan mehet napot malaikat sa negei arit hio,"guyang kan arit nu sa kumat hio palus kumpulkan lah dapung wua anggur tekei kakau anggur ta bumi." ¹⁹ Balalu,malaikat hio ngaguyang arit e gi bumi palus ngumpul dapung wua anggur tekei kakau anggur ta bumi palus nawut e napot huang watu kilangan hante muruka Allah. ²⁰ Pamiek kan wua anggur hio na ulah ta wading kota,balalu ira mangalir tekei alat pamiek anggur hio kira-kira sa entu kekang kuda nihi sa ambau seribu enem jatuh stadia.