Wawei sa nganak nihi Naga ¹ Udi hio,ka tena lah isa tanda sa hante ta langit: erang kulun wawei bapakaian mate andrau nihi wulan ta kapit pee e nihi mahkota tekei rueh belas bintang ta ulu e. ² Wawei hio rahat sa wuntung nihi huang ka rara kakan nganak,aye kamiak kahanang. ³ Udi hio,ka tena lah isa tanda lain tangar langit: erang kikui naga hante ba warna mariang sa naan ampun pitu ulu nihi sepuluh tandruk nihi pitu mahkota tangar ulu e. ⁴ Ikui naga hio nyujut sepertelu bintang ta langit palus nawut e gi bumi.Naga hio mindri ta hadapan wawei sa kakan nganak hio mat katika wawei hio haot nganak,aye tau nelen Anak e. ⁵ Wawei hio nganak erang kulun nakia laki,sa sagar memerintah bangsa-bangsa nihi tungkeh besi;tapi nakia hio na siau balalu na tunda napot Allah nihi gi hadapan tahkta E. ⁶ Wawei hio nempat nutah pulau haket,gi uneng sa nasadiakan Allah napot aye mat ta aro,aye na pelihara salawah saribu rueh jatuh enem pulu andrau. ⁷ Balalu,jari lah peperangan ta surga,Mikhael nihi here malaikat berperang nawan naga hio.Naga hio berperang hayak here malaikat e, ⁸ tapi here bakoi sukup kuat hampe bakoi naan lagi uneng gi here ta surga. ⁹ Naga hante hio na tawut gi kapit, aye nipe matueh hio sa na antuh iblis atawa setan, sa nyantawang kaluhan dunia,aye na tawut gi bumi,nihi here malaikat e na tawut gi kapit hayak e. ¹⁰ Balalu,kuki ngarengei lengan mehet ta surga ngeau,"wayah iti,haot hawi keselamatan,kuasa,nihi kerajaan Allah takam,nihi kekuasaan Kristus*E gene aye penuduh pulaksanai-pulaksanai takam,sa menuduh here ta hadapan Allah kaandrau nihi kamalem,haot na tawud kan gi kapit. ¹¹ Here nampa talau e nihi ira Anak Domba,nihi antuhan kesaksian here;gene here bakoi ngasayang nyawa here,bahkan wayah nadap pampatei. ¹² Gene hio,basanang lah,ui surga nihi kaluhan sa muneng ta huang e! Tapi,salaka lah bumi nihi laut gene iblis haot minau napot kayo huang kasangit e sa hante gene aye karasa bahwa wayah sa ampun aye tawelek." ¹³ Wayah naga hio kakinni bahwa aye haot na tawut gi bumi,aye nampahanang wawei sa haot nganak anak laki huni. ¹⁴ Tapi,wawei hio na ami rueh kalekep wurung raja wali sa hante mat aye kiuh samiding gi pulau haket,gi uneng e,tangar awe aye na samelum salawa isa wayah,rueh wayah,balalu setengah wayah lawit tekei hadapan nipe. ¹⁵ Nipe hio nyamur ranu sa sameh hungei gi arah wawei hio,mat nampataping wawei hio ta huang e. ¹⁶ Tapi,bumi ngawat wawei hio;bumi nguka wawa e balalu nelen ranu sa na sambur naga hio. ¹⁷ balalu,naga jari sangit tuu nadap wawei hio palus tulak mat nam babur nakia-nakia sa lain tekei wawei hio,aye hio ulun-ulun sa memelihara perintah-perintah Allah nihi ba tegei tangar kesaksian Yesus. ¹⁸ Naga hio mindri tangar iring laut.