¹ "Udi hio, Kerajaan Surga akan na umpamakan nihi sepuluh wawei sa nuna pelita-pelita e dan tulak mat panalu mempelai laki-laki. ² dime ta penah here bungul, dan dime lain e bijaksana. ³ Katika sa bungul hio nuna pelita-pelita e, here koi nuna minyak pahengau e. ⁴ Namun, sa bijaksana nuna minyak huang guci halus pahengau nihi pelita-pelita here. ⁵ Wayah ina, katika mempelai laki-laki hio manunda panawi e, here kaluhan kaandre dan mandre. ⁶ Namun, pada entu malem naan kamiak 'mempelai laki-laki hawi! kaluarlah mat manyambut e!' ⁷ udi hio, kaluhan wawei hio mele dan merapikan pelita-pelita here. ⁸ Dan, sa bungul ngantuh ga sa bijaksana, 'Amilah ga kami dadoho minyak nu ulah pelita-pelita kami kakan matei.' ⁹ Akan tetapi, sa bijaksana manjawab, 'Bakoi, koi akan sukup mat ga kami dan hanyu. Lebih maeh, tulaklah ga sa matang minyak dan widilah mat ga arep nu laerai.' ¹⁰ Sementara here tulak mat midi, mempelai laki-laki hio hawi, dan here sa siap, masuk sasameh nihi aye ga perjamuan kawin, dan pintu na tutup. ¹¹ Sahaot hio, hawi lei wawei-wawei sa lain e dan ngantuh, 'Tuan, tuan! Uka ga kami.' ¹² akan tetapi, aye ngajawab, 'Sasabujur e, aku ngantuh ga hanyu, aku koi mangenal hanyu.' ¹³ Oleh karna hio, bajaga-jagalah ulah hanyu koi karasa andrau antawa waktu e." Perumpamaan tentang Telu Pelayan ¹⁴ "Ulah, Kerajaan Surga sama sameh erang kaulun sa akan tulak ga luar negeri, sa nerau hamba-hamba e dan manyarah milik e ga here. ¹⁵ Ga sa erang kaulun, aye ngami 5 talenta. ga sa lain e 2 talenta, dan ga sa lain e lagi 1 talenta. Masing-masing sesuai kemampuan e. udi hio aye tulak. ¹⁶ Ulun sa narime 5 talenta hio langsung tulak, dan ngajalan talenta hio, dan aye ngahasil 5 talenta lagi ¹⁷ Kalahio lei ulun sa narime 2 talenta, aye ngahasil 2 talenta lagi. ¹⁸ Akan tetapi, ulun sa narime 1 talenta hio tulak, ngadi tolong ta tane, dan nyimoh duit tuan e ¹⁹ Lawah sa haot hio, tuan neke hamba-hamba hio hawi dan mangadakan perhitungan nihi here. ²⁰ Ulun sa haot narime 5 talenta hio nadap dan nuna 5 talenta lagi, antuh e 'Tuan, hanyu nyarah 5 talenta ga aku. i'nilah aku ngahasil 5 talenta lagi.' ²¹ Tuan e ngantuh ga aye, 'maeh tu'u, hamba sa maeh dan setia. Hanyu setia nihi hal-hal halus, aku akan ngangkat hanyu hamau ajoh hal, masuklah ga huang suka cita tuan nu.' ²² Dan, ulun sa narime 2 talenta lei nadap dan ngantuh, 'Tuan, hanyu nyarah 2 talenta ga aku. I'ni, aku haot ngahasil 2 talenta lagi.' ²³ Tuan e ngajawab, 'Maeh tu'u, hamba sa maeh dan setia, hanyu setia nihi hal-hal halus, aku akan ngangkat hanyu hamau ajoh hal, masuklah ga huang suka cita tuan nu. ²⁴ Udi hio, ulun sa narime 1 talenta lei nadap dan ngantuh, 'Tuan, aku karasa hanyu ulun sa kejam, menuai ta uneng sa hanyu koi menabur, dan mangumpulkan ta uneng sa hanyu koi menyebarkan wini. ²⁵ Ulah hio, aku takut, dan tulak dan nina talenta nu ta huang tane. I'ni, hanyu memiliki inon sa jari milik nu.' ²⁶ Namun, tuan e ngajawab dan ngantuh ga aye, 'Hanyu hanba sa jahat dan buntus! Hanyu karasa bahwa aku menuai ta uneng aku koi menabur dan mangumpulkan ta uneng sa aku kio menyebarkan wini. ²⁷ Ulah hio, seharus e hanyu nyimoh duit ku ta bank dan katika aku waleng, aku akan narime milik ku waleng nihi bunga e. ²⁸ Alap 1 talenta hio neke aye dan ami ga aye, sa memiliki 10 talenta hio. ²⁹ Ulah, setiap ulun sa memiliki akan na ami lagi, dan aye akan bakelimpahan. Akan tetapi, neke ulun sa koi memiliki, bahkan inon sa aye miliki akan na alap. ³⁰ Tawut hamba sa koi baguna hio ga huang maieng sa paling maieng. Ta uneng hio naan tangisan dan kertak dipen.''' Penghakiman oleh Anak Marasia ³¹ "Katika Anak Marasia hawi huang Kemuliaan-E, dan kawan malaikat pahengau-E, balu Aye akan maharung ta takhta kemuliaan-E. ³² Kaluhan bangsa akan na kumpulkan ta hadapan-E, dan Aye akan nampisah here isa neke sa lain, sameh gembala sa nampisah domba neke kambing-kambing. ³³ Dan, Aye akan nampuneng domba-domba ta tuhi kawan-E, dan kambing-kambing ta tuhi kawi-E ³⁴ Udi hio raja akan ngantuh ga here sa ta tuhi kawan-E, 'Ayu, hanyu sa na berkati oleh Amah-Ku, warisilah kerajaan sa nasadiakan ga hanyu neke pamula dunia. ³⁵ Ulah katika Aku kalauan, hanyu ngami aku kuman. Aku haus dan hanyu ngami Aku ngoot. Aku ulun asing, dan hanyu ngundang Aku masuk. ³⁶ Aku mapoloi dan hanyu masang Aku pama. Aku sakit dan hanyu nyuwuk Aku. Aku na penjara dan hanyu dapot Aku.' ³⁷ Balu, ulun-ulun benar hio akan ngajawab-E, 'Tuhan, auk awe kami katena Hanyu kalauan dan ngami Hanyu kuman, antawa haus dan ngami Hanyu ngoot? ³⁸ Auk awe katena Hanyu ulun asing dan ngundang Hanyu masuk, antawa mapoloi dan masang Hanyu pama? ³⁹ Auk awe kami katena Hanyu sakit antawa na penjara dan kami dapot Hanyu?' ⁴⁰ Raja hio akan manjawab, 'Aku ngantuh sasabujur e ga hanyu, sakalaawe hanyu ngulah tahadap isa neke pulaksanai Ku sa paling halus ina, hanyu ngulah e ga Aku.' ⁴¹ Udi hio, Aye akan ngantuh lei ga here sa ta tuhi kawi-E, 'Tulak neke hadapan-Ku, hanyu sa takutuk, ga huang apui abadi sa haot na siapkan ga iblis dan malaikat-malaikat e. ⁴² Ulah, Aku kalauan dan hanyu koi ngami Aku kuman. Aku haus dan hanyu koi ngami Aku ngoot. ⁴³ Aku ulun asing dan hanyu koi ngudang Aku masuk; mapoloi dan hanyu koi masang Aku pama; sakit dan na penjara, dan hanyu koi nyuwuk Aku.' ⁴⁴ Udi hio, here lei akan ngajawab, 'Tuhan, auk awe kami katena Hanyu kalauan antawa haus, antawa erang kaulun asing, antawa sakit, antawa mapoloi, antawa na penjara, dan koi melayani Nu?' ⁴⁵ Udi hio Aye akan ngajawab here, "Aku ngantuh sa sabujur e ga hanyu, sakalaawe hanyu koi ngulah ta hadap isa neke here sa paling halus ina, hanyu kio ngulah e ga Aku.' ⁴⁶ Dan, here ina akan tulak ga huang penghukuman kekal, tetapi ulun-ulun benar ga huang pangawelum kekal."