¹ Ngocho vene pueni vakua kutambuluitha Kalunga, ngue vana vange vanja yongola. ² Lalo endeni muchiyulo ngue Kilistu mua tuyonguele hakeho ua lihanene vavenia muomu lietu, nkombelo yayingulu naku lihana kuli Kalunga. ³ Vunoni keti kukale vithinganieka via vupangala na madhilo oshe, nampe kuliveyela ndi chipululu ha kati kenu, muomu evi kuvia pandele ku kala mu vantu kujela vaKalunga. ⁴ Keti kukale madhilo, keti kukale vihandeka via shuama nambe kuhandeka via sanda, evi vioshe via ku viha. Vunoni hana pande kukala kushangala. ⁵ Muna dhivuka chili vene naumo uahi nambe muka vukuidhi, ua madhilo, nambe muka chipululu ikeye mu kaku lemetha mahamba ka kakala na vusuana mu vumuene vua Kilistu na Kalunga. ⁶ Keti muitave na umo uahi ami shongangeye na vinguli via mavoko-voko, muomu ku viuma evi vukalu vua Kalunga vukeja kuvakua lithino. ⁷ Ngoco vene keti mulivandakane navo. ⁸ Muomu muakele mumuthithi , ngechi muli mumutanya muli Kalunga. Endeni ngue vana vamutanya. ⁹ (Muomu vushuka vua mutania uli na vuchili vuoshe , na kuvuaha cha chili.) ¹⁰ Na kulilongetha vika viaku ya Kalunga kumbunge. ¹¹ Keti mulivandakane na vushuka vua muthithi, vunoni va vianeni. ¹² Muomu shuama nambe kutumbula vilinge viove kupanga mukushueketha. ¹³ Vunoni viuma vioshe vana vijombolola kumutania, navikevio uatha ku vimona. ¹⁴ Muomu ku vioshe vi jomboloka mumutania, ngocho a handeka nguendi, "Hinduka, ove mukua kundanda, shituka kukuthsa, na Kilistu aku tuile cheke. ¹⁵ Tala vuino vati mo uenda keti ngue va lilayi vunoni muka kudhangama. ¹⁶ Liohiele nthsimbu muomu matangua ana viha. ¹⁷ Ngocho vene keti mukale malayi vunoni uvueni viana yongola Kalunga. ¹⁸ Kati mupende viniu, vije vili na vuhuka vunoni lishulitheni na Mpundhi ya kujela. ¹⁹ Handekeni umo na mukuavo ni visamo na miatho yakulemetha na miatho yaha Mpundhi, yimbeni naku shangala Kalunga na vimbunge vieni vioshe, ²⁰ nthimbu yoshe haneni shangaleni ku nkala evi, mulidhina lia Muene Yesu Kilistu kuli Kalunga Tata, ²¹ lihaneni umo namukuavo na liova lia Kilistu. ²² Vakentu lihaneni ku vamala veni ngue kuli Kalunga. ²³ Muomu liala ikeye mutue ua mukentu, ngue Kilistu naua napu mutue ua ngeleka, ikeye vene muovole ua muvila. ²⁴ Ngocho vene ngeleka ili hana kuli Kilistu, lalo vakentu neni lihaneni ku vamala veni kunkala vioshe. ²⁵ Eni vamala yongoleni vakentu veni, ngue Kilistu mua yongola ngeleka ngeci ua lihanene endi vavenia omo ikeyo. ²⁶ Kilistu ua lihanene endi vavenia linga ku ngeleka linga a lelethe, na kumitoketha nakumu kusha namema alijui, ²⁷ linga akale hangeleka kuliyendi vavenia na vumpahu kajeneke chipenga na munkonia, nkala vilinge ovio, vunoni lileletheni na kuviukilila. ²⁸ Mungila yakulifua vamala yongoleni vakentu veni vavenia ikeyo mivila yeni. Nkala ou ua yongola mukentu uendi ua liyongola endi vavenia. ²⁹ Uahi ua dhinda muvila uendi vavenia, vunoni au lithe naku ulela, ³⁰ ngue omo Kilistulalo mua lelele mbunga yendi. ³¹ Mjuomu tunapu vuilo vua muvila uendi. Muomu mumala a katha yishe na viyina, lalo aka livandakana na mukentu uendi keho voshe vavali vakapua muvila umolika. ³² Ovu vuchili vuaku shueketha - vunoni nji handeka via Kilistu nevi via ngeleka. ³³ Vunoni eni lalo, nkala ou a yongole mukentu uendi vavenia, keho mukentu a thingimike liala liendi.