¹ Ngotjo vene ange ndungo muli muene ndjimikandelela nguange muende ende ngohoni movana mithana vamithanene tjo. ² Nakulikehetha tjoshe naku konkama tjoshe nanthintha ya ngothi liyandeleni hakati keni umo namukuavo na tjilemo. ³ Thangameni mukunyunga vumo vua Spilitu halithitiko lia tjiyulo. ⁴ Kuli muvila umo lika na Spilistu umo lika ngohoni muvana mithana nakulavelela tjimo lika kukuthana tjeni. ⁵ Muene umo lika kuthelela tjomolika kumbitika tjimolika . ⁶ Kalunga umo lika ikeye ishe yavoshe ali helu liavoshe alihakati kavoshe alimulivoshe. ⁷ Vunoni kavumbi vana kahana kulietu muntu ku muntu, ngohoni kutjitheteko tjavuana vua Kilistu. ⁸ Ngotjo nguendi: mualondele muilu ua tualele vandungo uahanene vuana ku vantu. ⁹ Vunoni etji ua londele tjiketjo tjika nga keti ku tumbula nga tjiye ikeye uashulukile lalo kuinthi lia mavu. ¹⁰ Uye uashukile ikeye lalo uye ualondele kuili navua lia melu oshe, linga ashulithe viuma vioshe. ¹¹ Keho ikeye uahakele vamo vapue vaPolofeto, vamo vaPolofeto vamo vakua kuambulula,muthimbu uatjili vamo tuniungi, vamo valongithi. ¹² Mukutantu luitha vakua ku jela, mukupanga viapanga mukutungitha muvila ua Kilistu. ¹³ Noho etu voshe tuhete ku vumo vua kuthelela, nakuthivuka muna Kalunga noho tupue vantu vakukola tuheteku tjitheteko tja tjitso tja kushula tja Kilistu. ¹⁴ Kati pue lalo vanike vakuhungu muka noku noku nakupekumuka nampunthi yoshe yaviye vivalongetha naku kuitha tjavantu, mukuthangama thangameni nakushevuitha. ¹⁵ Vunoni mukuhandeka vutjili na tjilemo tukoleni muviuma vioshe muli ikeye Kilistu ikeye mutue. ¹⁶ Kuli ikeye muvila uoshe ualitokakana muatjili ua kundama kumo namanungu oshe ahana ko, kutjisheteko tjavipanga via vilio via uo muvila uli kulitha nakulitungitha mu tjilemo. ¹⁷ Ngotjo vene ndjihandeka etji naku tjitumbula vukaleho mulimuene nguange keti muende ngohoni vakua vifuti muvutha vua vimbunge viavo. ¹⁸ Mu vana thivala kumana avo vana lihanguna ko ku muono ua Kalunga movatjili kuthimba muomu kukalu ua kuvimbunge viavo. ¹⁹ Vakevo kavethi na shuama vana lihana kumasungu akuviha, mukupanga mathiko oshe natjipululu. ²⁰ Vunoni eni Kilistu uoshe ka mualilongethele nga tjiye. ²¹ Nga muna muvu, keho nga vana milongetha muli ikeye ngohoni omo vutjili vuli muli Jesu. ²² Ngetji ye thuleni muntu uye uala ya natjifua tja muono ua laya, uye uakuviha namashungu akukuitha. ²³ Keho pueni vantu vavaha mutjithithimbi tja vimbunge vieni. ²⁴ Thaleni muntu uye ua muha, ivana panga natjifua tja Kalunga muvu viuke naku yela tja vutjili. ²⁵ Ngotjo vene etheleni vishaki handekeni vutjili muntu namukuavo muomu tunapu vilio via muvila umo lika. ²⁶ Handukeni vunoni keti mulinge via kuviha litangua keti litoke navukalu vueni. ²⁷ Satana keti mu muthile muhela. ²⁸ Uje ua puanjele keti apuanje lalo vunoni muatjili apange namavoko endi vije via tjili, ngotjo aka hanekouye navijeneka. ²⁹ Linjui liakuviha keti lituhuke mutunua tueni, ku vanga lijui liatjili mukukoletha ou na lijeneka. Linga lihane muatjili kulia va lito lilila. ³⁰ Keti muvavalethe Spilitu ua Kalunga ikeye tjitantekeso tjeni na kulitangua lia kuovoka. ³¹ Nyanya yoshe, navukalu, namatoto, namu yoyo, navishaki , vitunde hakati keni naithi yoshe. ³² Vunonipueni umo namukuavo vakua vimbunge via tjili vakua tjikeketima lietjeleni umo namukuavo ngohoni Kalunga lalo muana mietjela milonga yeni muli Kilistu.