¹ Ghethire wa dikumi no hawadi pofotjino kuwapa ngcamu no marawero gho kuhinga mupepo dhodhimango no kwirura mahamba. ² Ghawatumine hakayaghure yoghufumu waNyambi no kwirura hakorwi. ³ Ghaghambire kukwagho,''Kadiko yi shomushimbe muruyendo- keheyino, kadiko ndjato, kadiko ghuroto, kadikomasherenyi, kadiko yitere yimweya. ⁴ Kehe dhino ndhugho mwakungena, mwakukare momo kate mwakutundemo. ⁵ Kehe kuno hakudhira kumutambura, apa mwakutunda mo mudoropa, kukukumune mbundu kumaghuru thikare thineghedhitho thokukutjaka nagho.'' ⁶ Podiyo hafungurukire no kuyenda kupita mumukunda, ghuyuvitha mbudhi dhodhiwa no kwirura kehe kuno. ⁷ Podiyo Herodesi ghayuvire yoyihe yi yahokokire, ghapimbanine, yoyishi ghayighambire ghumwe eshi Johannesi ghapindukire mukufa, ⁸ no hamweya haghambire eshi Elijah ghanamoneka, no shime hamwe eshi ghofotji ghopawa porofeta ghokare ghana vumbuka. ⁹ Herod ghaghambire,'' Ame natetire Johannesi. Dye yu gho kuhatera oyu nakuyuva gho yinu yo?'' Podiyo ghayerekire kumumona. ¹⁰ Apa ha apostoli hakahukire, hana mutongwere yoyihe yi hatendire. Podiyo ghawa shimbire, no hayendire mughudhindo kudoropa dhaBethsaida. ¹¹ Apa dhayiyuvire mbunga yinu yi, hamukuthire. Ghawa tambure no kughamba kukwagho kuhatera ghufumu waNyambi, no gherure awa hanyandire merukero. ¹² Diyuwa dyakarire pepi noghuhura, nowa dikumi nohawadi heyire kukwendi no kughamba,''Mutume mbunga dhikayende eshi hayende kumikunda dhopepi kashana kokurara noyidya, yoyishi tudi twe kuno kopithetu.'' ¹³ Ene ghaghambire kukwagho,''Muwape keheyino yokudya.'' Haghambire,''Kadi tudi nokupitakana mughuroto makwoko no tuthi tuwadi-shimengwa tuyende tukaghure yidya yowa hanu.'' ¹⁴ (Hakarire hanu pepi no mayovi kwoko.) Ghaghambire kwawakathishongero wendi,''Mukare muna hungumana mumambunga ghohanu makumi kwoko.'' ¹⁵ Podiyo hatendire yi, hatendire hanu hahungumane. ¹⁶ Ghashimbire maghuroto makwoko no tuthi tuwadi, ghakengire mudiwiru, nokuyikandadheka no kughuyondaghura, no ghatapire kwawakathishongero mukutura kughutho gho mbunga. ¹⁷ Wahe hadire no hakutire, no oyi yathigharireko hayidhamune-dikumi no yiwadi yindeyindeyi yoyipindhi. ¹⁸ Yeyire oku Jesusi kuna kurapera papendi, hakathishongero hakarire nendi. Gha wepurire wo, ghughamba,''Nye dhi mbunga dhina kughamba eshi yame dye?'' ¹⁹ Hamuhuthire''Johannesi gho muka Diyoghero. Ene hamwe kuna kughamba Elijah, no hamwe kuna kughamba eshi ghumwe ghomuporofete ghokare ghana kavumbuka.'' ²⁰ Podiyo ghaghambire kukwagho,''Ene dye muna ghamba eshi yame dye?'' Peter ghahuthire,''Kristusi gho Nyambi.'' ²¹ Ene ghawashwenekire thikuma mukutongwera yi kwakeheyuno, ²² ghughamba,''Mwana Munu ghakona kunyanda kuyinu yoyingi no kumushwena hakuru no hapristeri shokuru nawakamarukwaro, no nanyi ghakumupaghe no mudiyuwa dyo ghuhatu mboghana vumbuka.'' ²³ Podiyo ghaghambire kukwagho wahe,''Ngeshi keheyuno ghana shana kwiya nange, ghakona kukushwena thinda no kushimba thikurushe thendi no kunikutha me. ²⁴ Kehe yuno ghokukunga ghuparo wendi nanyi ghakughuyongarithe, ene keheyuno gho kuyongaritha ghuparo wendi pamurandu wange ghana kughutureka. ²⁵ Ghuwa munye pamunu mukuwana yoyihe yokaye, ene kuyongaritha endi kukukungura thinda? ²⁶ Keheyuno ghokufa honyi me no manando ghange,naye Mwana Munu nanyi ghakamufe honyi apa ghakakara mumangcamu gha Wihe no kwawa engeli hokupongoka. ²⁷ Ene nakughamba ghushemwa, pohadihana kwimana pano awa hakudhira kuyereka yifa kughutho gho kumona ghfumu waNyambi.'' ²⁸ Kunyima dhomayuwa kwoko no hahatu apa Jesusi ghamanine gha manando, ghashimbire Peter naJohannesi naJakobusi hayendire kudirundu hakaraperere. ²⁹ Oku yene pakuraperera, rupara rwendi rwakutjindire, noyitere yendi yakutjindjire yoyikenu. ³⁰ Kenge, hanu hawadi haghambire nendi, Moses na Elijah, ³¹ oyu ghamonekire mungcamu, kuna kughamba nendi kuhatera kuyenda kwendi, oyi ghakarire eshi tamba yikume kughuhura muJerusalema. ³² Pano Peter no wo hakarire nendi hakarire hana rara, ene apa hapindukire,hamonine mangcamu no hatutughuru hawadi awa hemanine nendi. ³³ Thika di hayendire kutunda kwaJesusi, Peter ghaghambire kukwendi,''Mukuru, thiwana twe kukara pano. Ninge tutende mumvure dhihatu, ghofotji ghoye, ghofotji waMoses, ndani ghumwe waElijah.'' (Kadi ghadimukire eyi ghaghambire.) ³⁴ Apa ghaghambire yinu yi, divuyi dyeyire no kuwafika wo, no hakarire hanayapa apa hengenine mudivuyi. ³⁵ Diywi dyeyire kutunda mudivuyi, ghughamba,''Oyu ne Mwanange, oyu natorora; mutegherere kukwendi.'' ³⁶ Apa diywi hadighambire, Jesusi ghakuwanine pithendi. Hakarire hana porera no kutongwera kadiko mugho mayuwa keheyino kuhatera yi hana mono. ³⁷ Pano diyuwa dyokurandako, apa heyire kutunda kudirundu, mbunga dhodhikuru dhamuwanine. ³⁸ Kenge, katughuru mumbunga ghadirire ghukuyerera, ghughamba, ''Muhongi, nakukanderera kenge mwanange, aye ne yo mwanange pithendi. ³⁹ Mone, mupepo ghuna shimbi marughaneno papendi no kudira; yina muretera ghakare no mandhingwe podiyo ghakare no difudhi kukanwa. Ghukukutu mukumuthiya no kumurughanitha ghumango. ⁴⁰ Nakumbera hakathishongero ghoye mukuthigheneka haghushwayithe panunda, ene kadi hana kono.'' ⁴¹ Jesusi ghahuthire no kughamba,''Amwe mwakakupira kutawa no muhoko ghuhakuta, rure rokukuma kupi sho nikare nenu no kutura nenu? Murete mwanoye kuno.'' ⁴² Oku mungaghu pakwiya, mupepo ghoghumango wamuvukumine pamuve no wamuvukumine no mandhingwe. Ene Jesusi ghashwenine mupepo ghoghumango no gheruthire mungaghu yu, no ghamupire kwa wihe. ⁴³ Podiyo wahe hatetukire kughukuru waNyambi. Oku wahe hana tetuka kuyoyihe yi ngatetanga, ghaghambire kwawakathishongero wendi, ⁴⁴ ''Ninge gha manando ghangene mumatwi ghenu: Mwana Munu nanyi hakumuhete mumoko ghawanu.'' ⁴⁵ Ene kadi hatjwathane thighamba thi. Thakuhorekire kukwagho, podiyo kadi hadimukire yitongora yatho, no karo hakarire hanayapa mukwipura kuhatera thighamba thi. ⁴⁶ Podyo dikanyi dyatangire mukatji kagho kuhatera eshi dye pakatji kagho ghakukara mukuru. ⁴⁷ Ene Jesusi, ghudimuka ruhuthitho rwagho mumitjima dhawo, ghashimbire mwanuke gho mumbiru no kumutura kumutara wendi ⁴⁸ no kughamba kukwagho,''Keheyuno gho kutambura yuno mwanuke mudinadyange, ghana nitambura; no keheyuno gho kunitambura, ghanatambura yu ghanituma me. Keheyu gho mumbiru mukatji kenu ne mukuru.'' ⁴⁹ Johannesi ghahuthire,''Mukuru, tuna mono ghumwe ghana kuthineneka kushwayitha mupepo ghoghumango mudina dyoye no tuna mushweneka, yoyishi kadi ghatukutha twe.'' ⁵⁰ ''Kadi mumushaghekithe,'' Jesusi ghaghambire,''yoyishi keheyuno oyu ghana dhiri kumwimanganyena mwe ne wenu.'' ⁵¹ Apa mayuwa ghakokore pepi ye mukumushimba, ghaturire rupara rwendi mukuyenda muJerusalema. ⁵² Ghatumine hashimbi mbudhi kughutho wendi, no hayendire no kangena muSmaritan mukaroyitha yoyihe yendi. ⁵³ Ene hanu kadi hamutambure ye yoyishi ghaturire rupara rwendi mukuyenda kuJerusalema. ⁵⁴ Apa hakathishongero wendi haJakobusi naJohannesi hamonineyi, haghambire,''Fumu, ghuna shana turawere mudiro wiye pamuve kutunda mudiwiru no kuna wayungura wo?'' ⁵⁵ Ene ghathetukire no kuyiwashwenena, ⁵⁶ no hayendire kumukunda ghumwe. ⁵⁷ Oku wo ne pakuyenda kumbadi dhothitavura, ''nanyi ni kukuthe kehekuno shoyende.'' ⁵⁸ Jesusi ghaghambire kukwendi,''Mambungu ghakara no makwina ghawo, no yinyunyi mudiwiru yakara no yitunguru yayo, ene Mwana Munu kadi ghadino kokuthatera mutwi wendi.'' ⁵⁹ Podiyo ghaghambire kwaghumweya,''Nikuthe me.'' Ene ghaghambire,''Fumu, pakutanga nitawedhere tango ni kavumbeke tate.'' ⁶⁰ Ene ghaghambire kukwendi,''Thiye hafu hakuvumbeke hathinda. Yoye ko we, yende no karoyithe kayenda no ghuyaghuyu gho ghufumu waNyambi.'' ⁶¹ Ghumweya ghaghambire,''Nanyi ni kukuthe, Fumu, ene pakutanga ninge ni kamorore waya nathighi kudimbo.'' ⁶² Jesusi ghamuhuthire,''Kadiko yu ghokuturanyara dhendi no kukenga kunyima gharoghera mughufumu waNyambi.''