¹ Yahokokire popo kamanana kughutho Jesusi ghatangire kuyenda kumadoropa ghomakuru no kumikunda, ghuyuvitha no kughamba mbundhi dhodhiwa dhokuhatera kughufumu waNyambi. Awa dikumi no hawadi aghoghakarire, ² pofotji nawambuyama hamwe awa hapwire kwirura kumupepo ghoghumango no mahamba: Maria oyu hethire eshi Magdalena, kutunda mudhimupepo kwoko nodhiwadi hadhitjidhire panunda; ³ Joanna, muna Chuza, Herod mukuru; Susanna; no hanu hohengi, awa, hatundire muyiwana, hatapire kuyinyanda yagho. ⁴ Oku mbunga dhodhikuru dhawanu dhakonganine, no hanu heyire kukwendi kutunda kudoropa yenda doropa, ghaghambire dithaghano: ⁵ ''Ndjimi ghayendire ghakakune mbuto dhendi. ⁶ Oku yene pakukuna, dhimwe dhawerere kumbadi dhothitavura no hadhidjatire no mapadhi, no yinyunyi yomuwiru yadhingomongorire. ⁷ Dhimwe dhawerere mukatjikomughunga, no mughunga wakurire pofotji nombuto no wadhitjurire. ⁸ Ene dhimwe dhawerere mumuve ghoghuwa no dhamenine eyi yakarire dithere yikandho wingi.'' Kunyima Jesusi ghaghambire yi yinu, ghethire, ''Keheyuno ghakara no matwi ghokuyuva, gha yuve.'' ⁹ Hakathishongero wendi hamwipure eyi yatambire matadhi gha. ¹⁰ Ghaghambire, ''Maghano gho ghudhindo gho ghufumu waNyambi haghutapa kukwenu, ene kwawamwe eyi nighamba mumathaghano, podiyoshi 'kumona ene kadi wakumona, no kuyuva ene kadi wakutjwathana.' ¹¹ Pano eyi ne yoyitongora yoghano maghanekeritho: Mbutone nando dha Nyambi. ¹² Edhi dho kumbadi dho ndhira ne awa hokuyuva, ene mupepo ghoghumango ghuna kwiya no kuna dhishimba nando kutunda kumutjima dhawopodiyo kadi hakutawe no kupara. ¹³ Edhi dho pamawe ne awa ho, pakuyuva nando, kudhitambura noruhafo. Ene kadi dhakara no mudhi; kutawa kamanana, no paruvedhe romayerekero awo kuwa. ¹⁴ Muto dhiya dhawerere mukatji ko mughunga ne hanu ho kuyuva nando, ene pakuyenda mundhira ghawo, hana kudhingomongora awa hakakudhipakera thinga no hatungi no hapepaghuri gho yipara, no mbuyodhapo ne kadi wakugora. ¹⁵ Ene mbuto dhi dhawerere mumuve ghoghuwa, awa ne hanu awa, kuyuva nando no ghushemwa no mutjima ghoghuwa, kudhikwata thiwana no kureta mbuyo no mataterero gho mawa. ¹⁶ ''Kadikoyu ghokumuneka ramba no kumufika no thindeyindeyiendi kumutura mwishi dhoghudidi. Ene, ghanakumutura pokutura ramba podiyo keheyu gho kungena ghakona kumona thishe. ¹⁷ Kadiko yi yo kuhoreka eyi yakupira kudimukitha, endi keheyino yoghudhindo eshi kadi hakuyidimuka nokwiya kuthishe. ¹⁸ Podiyo tegherere thiwana, koyu gho kukona, yingi nanyi hakuyimupe, ene koyu ghapira, ngambi yu ghaghayaranga eshi ghakara nanyi ghaku yishimbekukwendi.'' ¹⁹ Podiyo nyina no hakurwendi heyire kukwendi, ene kadi hakonine kukara nendi popepi pamurandi gho mbunga. ²⁰ Hamutongwere, ''Nyoko nohakuroye hanemana panunda, hana shana kukumona yowe.'' ²¹ Ene Jesusi ghawahuthire no kughamba kukwagho, ''Nawe no wakurwange ne waya hokuyuva nando dhaNyambi no kuyitenda.'' ²² Diyuwa dimwe ghangenine muwato nohakathishongero wendi, no ghaghambire kukwagho, ''Ninge mutuyende kuthambo diya dyo dikuruviya.'' Hatangire kuyenditha wato. ²³ Oku wone pakuhinga wato ghakothire. Mupepo ghoghukuru weyirepadikuruviya, no wato wagho wakarire ghuna kungena meyu no hakarire mughukukutu. ²⁴ Podiyo hakathishongero waJesusi heyire kukwendi no kuna mupindutha, ghughamba, ''Mukuru! Mukuru! Tamba tufe!'' Ghapindukire no ghashwenekire mupepo no mangumbi gho meyu, no ghashayekire, no ghakuturire. ²⁵ No ghaghambire kukwagho, ''Kupi matwero ghendu?'' Ene hayapire no hatetukire, no hakwipurire hathinda, ''Dye nane yu, eye kurawera ngambi mupepo no meyu, no yina kumutawa?'' ²⁶ Havuyire kuditunga dyawa Gerasene, kutjinana dikuruviya kutunda muGalileya. ²⁷ Apa Jesusi ghadjatire pamuve, ghakuwanine na katughuru ghumwe kutunda mudoropa dhodhikuru oyu ghakarireno mupepo dhodhimango. Ruvedhe rorure kadi ghavata yitere, no kadi ghatungire mundhugho ene mukatji komambira. ²⁸ Apa hamonine Jesusi, ghadirire nokuwa kughutho wendi no kughambano diywi dyodikuru, ''Nye yo kukona ghutende nange, Jesusi, Mwana ghoMukuru Kuwiru Nyambi? Nakukanderera, wanitjitjupitha me.'' ²⁹ Jesusi gharawere mupepo ghodidhiro mukutunda mwakatughuru. Ruvedhe rorwingi wamukwata, ngambi kengeshi hamughanga no menge no hamutura mukumukengerera, ghana tjoro menge ghendi no nanyi ghumuhinge mupepo ghoghumango mumuthitu. ³⁰ Podiyo Jesusi ghamwipure, ''Yowe dye dina dyoye?'' Ghaghambire, ''Legion,'' thingi dho mipepo dhodhimango dhangenine mumwendi. ³¹ Dhatwikere kumukumbera eshi ghadhituma mumamboreya. ³² Pano muraka ghoghukuru ghoyinguru wakarirepo ghuna kudya mumarundu. Mupepo wakumbere mukughutawedhera ghungene mwayo, no ghadhitawedhere. ³³ Podiyo mupepo dhodhimango dhatundire mwakatughuru no kuyenda muyinguru, no muraka watambukire kughurumuka mudiviya no kurowera. ³⁴ Awa hahayire yinguru hamonine eyi yahokokire, hatjirire nokatongora kuhatera yi mudoropa dhodhihe no kumukunda. ³⁵ Podiyo hanu hayendire hakamone eyi yina hokoka, podiyo heyire kwaJesusi no kunamuwana katughuru omu watundire mupepo ghoghumango. Ghahungumane kumapadhi gha Jesusi, hamuvatekire no mumaghano ghendi ghomawa; no hayapire. ³⁶ Awa hayimonine ghawatongwere ngepi katughuru yu wamuna mupepo ghoghumango edi ghana mwirura. ³⁷ Podiyo hanu wahe homumukunda ghuya wa Gerasene hepurire Jesusi ghatundemo, awo hakarire no woma ghoghukuru. Podiyo ghangenine muwato podiyo hatange kuhuka. ³⁸ Katughuru yu mu watundire mupepo ghoghumango ghakumbere ye mukumuninga ghayende nendi, ene Jesusi ghamutumine, ghughaamba, ³⁹ ''Huke kudimbo dyoye no katape thishupo tho yinu eyi Nyambi ghana kutendera.'' Katughuru ghayendire mundhira dhendi, ghukutapa mudoropa dhodhihe eyi Jesusi ghana tendi kukwendi. ⁴⁰ Apa Jesusi ghakahukire, mbunga dhamtambure ye, no wahe hamutatere. ⁴¹ Mukenge, katughurugho dina Jairus, oyu ghakarire ghofotji wapawapiterithi gho synagogue, gheyire no ghawerere kumapadhi ghaJesusi, no ghamukumbere mukuyenda kundhugho dhendi ⁴² yoyishi mwanendi pithendi, mushengeteya gho myaka dikumi nodhiwadi, kuna kufa. Oku Jesusi mundhira, mbunga dhawanu dhamudhingire. ⁴³ Podiyo mbuyama ghakarire po oyu ghapitire manyinga ghure ghomyaka dikumi nodhiwadi no ghatapire masherenyighendi ghomahe, no kadi ghakonine kumwirura keheyuno. ⁴⁴ Gheyire kunyima dhaJesusi no ghakwatire kughuhura gho thivata thendi, popo kupita manyinga kwendi kwashayekire. ⁴⁵ Jesusi ghaghambire, ''Dye yu ghana ni kwata me?'' Wahe hayikanane, Peter ghaghambire, ''Mukuru, mbunga dhawanune dhinakudhingi no hana kwimanganyena.'' ⁴⁶ Ene Jesusi ghaghambire, ''Ghumweya ghana ni kwata me, ame nadimuka eshi ngcamu dhina tundumumwange.'' ⁴⁷ Apa ghamonine mbuyama eshi kadi wakukona ghanyetuke, gheyire ghututuma no ghawire kughutho wendi. Kughutho ghohanu wahe ghakutapire nye ghamukwatere no ngepi edi ghamwirrurepopo. ⁴⁸ Podiyo ghaghambire kukwendi,''Mwanange, matawero ghoye ghana kwirura. Yende muthiraro.'' ⁴⁹ Oku yene pakughamba, ghumwe gheyire kutundera mudighumbo dyamupiterithi synagogue, ghughamba, ''Mwanoye ne ghana fu. Kadi mupethe muhongi karo.'' ⁵⁰ Ene apa Jesusighayiyuvire yi, ghahuthire Jairus, ''Kadi ghuyaoe; tawe ngenyu, no nanyi gheruke.'' ⁵¹ Apa gheyire mundhugho, kadi ghatawedhere keheyuno mukungena nendi, kutundithako Peter na Johannes naJames, na wihe mwanuke na nyina. ⁵² Pano wahe hakarire hana kudira ye mwanuke, ene ghaghambire kukwagho, ''Mwadira; kadi ghana fu ene kuna rara.'' ⁵³ Ene hamuhekire, ghudimuka eshi ghana fu. ⁵⁴ Ene ghamushimbire ye panyara no ghethire, ghughamba, ''Mwanuke, wi mane!'' ⁵⁵ Mupepo wendiwakahukire, no ghemanine popo. Ghawarawere mukamuwanena yimwe yokudya. ⁵⁶ Hakuruwendi hahafire, ene ghawarawere eshi kadi hakatongwere keheyuno eyi yina hokoka.