¹ Apa Jesus gha manine kughamba yoyiheya yi gha ghambire awo hanu kuna kuyiyuva, gha ngenine muCapernaum. ² Mukurughoyita ghumweya gha karire nomupika yu gha mu kutekerire thikuma, aye gha karire ghana kukorwa no tamba kufa. ³ Apa gha yuvire yo kuhatera kwaJesus mukurughoyita yu, gha mu tumene hakuru hohayuda mu kumwitha no gherukithe mupikendi. ⁴ Apa hana kumina kwaJesus ha mu kandere thikuma ghu ghamba, "Gha royera kuyimurughanena yi, ⁵ yoyishi gha haka ditunga dyetu, yoyiye karo gha tu tendera yu sinagoge." ⁶ Jesus gha yendire nawo mundhira dhendi. Apa gha kumine pepi no dighumbo, mukurughoyita yu gha tumine hayendhendi ha ka mutongwere eshi, "Fumu, mbadi ghu kughayithe ghothinda, yoyishi ame ne mbadi na yoyerera eshi wiye mudighumbo dyange. ⁷ Pamurandu gho kemo, shime karo mbadi na royerera mu kwiya koye, ene ghambe ngenyu nando, mupikange nanyi gheruke. ⁸ Name no munu yu gha kara no ngcamu dhomarawero, nawa kayita awa na piteritha. kukona kughamba koyu eshi, 'Kayende' naye gha kona ka yenda, kwa ghumweya eshi 'Wiye' naye gha kona kwiya, kwamupikange eshi, 'Rughane kemo' naye gha kona kurughana thikadyo ⁹ Jesus gha tetukire apa gha yi yuvire, no gha pirukire kumbunga edhi dha mu kuthire ghu ghamba eshi, "Ni na kumutongwera, matawero ghokemo ne mbadi na gha wana nomuIsrael temba." ¹⁰ Apa ha ka kumine kudighumbo wa gha tumine, ha ka wanine thipika yu ne gha neruka. ¹¹ Kapupi kamanana, Jesus gha yendire mudoropa dhaNain, hakathishongero wendi nombunga dhi dha yendire nendi. ¹² Apa gha kumine pepi no thero dyodoropa dhi, gha monine katughuru hana kutwara panunda oyu gha fire, aye ne yo mwana ghopithendi ghokatughuru panyina (ghomudhike), no hanu waheya homudoropa dhi ha karire nendi. ¹³ Apa gha mu monine Fumu, gha mu ferere neke thikuma no gha mu tongwere eshi, "Porere." ¹⁴ Munyima kokuyenda kwendi gha ka kwate pathitondo ethi ha mushimbere, awa ha mu shimbire hemanine. Gha ghambire eshi, "Katughuru, yowe na kutongwera, pinduke." ¹⁵ Mufu katughuru yu gha pindukire, kuhungumana no gha tangire kughamba, Jesus gha mu tapire kwanyina ¹⁶ Kuyapa kwaretire ghuwa kowahe, nohatwikere kukarera Nyambi, ghughamba, ''Muporofeta hamurera mukatji ketu'' no ''Nyambi ghakengire pohanu wendi.'' ¹⁷ Odhi mbudhi kuhatera Jesusi dhakutapire muJudeya ghomuhe no matunga gho kukuhata. ¹⁸ Hakathishongero wendi hamutongwere yoyihe yinu. ¹⁹ Podiyo Johannesi ghethire hawadi hakathishongero nokuwatuma kwaFumu mukaghamba, ''Owe ne yowe ghuna kwiya, endi twakona kukenga ghumweya?'' ²⁰ Apa heyire pepi naJesusi, hanu haghambi,''Johannesi gho mukaDiyoghero gha tumine kukwenu nokughanda, 'Yowe ghuna kwiya, endi twakona kushana ghumwe.''' ²¹ Muviri dhiya gherukithire hanu hohengi kutunda kumatjitju no yimweya nokutunda kumupepo dhodhimango, no kwawakunga ghawamonithire. ²² Jesusi ghahuthire no kughamba kukwagho, ''Apa shomuyende mumandhira ghenu, mukatongore kwaJohannesi eyi muna mono no kuyuva. Hakunga kunakumona, harema kunakuyenda, hakayinondwe kuna kukena, hakakufa matwi kuna kuyuva, hanu wahafa kuna kawavumbura no hayumi, no hanyandi mbudhi dhomoyo kuna kuwatongwera mbudhi dhodhiwa. ²³ Munu yu ghokudhira kushayeka kutawamumwange yoyishi yitenda yange ne ghayitungeka.'' ²⁴ Kunyima namutumi waJohannesi ghayendire, Jesusi ghatangire kughamba kumbunga kuhatera Johannesi, ''Nye muna yendera mumamburundu mukamone? Kambu kana kukunyunga kumupepo? ²⁵ Ene nyemuna yendera panunda mukamone? Katughuru yu ghana vata yitere yoyirereya? Kenge, awa havatanga yitere yo ndhiro no kupara thiwana yira hafumu mumambara. ²⁶ Ene nye muna yendera mukamone panunda? Muporofeta? Kemo, Amenakughaghamba kukwenu, no kupitakana muporofeta. ²⁷ Oyu ne yodiye oyu hatjangire, 'Kenge, Ame kuna kutuma katumi wange kughutho gho rupara rwenu, oyu ghakumuroyithera ndhira dhenu mwe.' ²⁸ Nakughamba kukwenu, mukatji kowo hareta hambuyama kadiko gho kupitakana Johannesi. Ene ngambi kemo yodiye gho mumbiru mughufumu waNyambi.'' ²⁹ (Apa hanu wahe hayiyuvire yi, kupakerera nohaketethi, hatawire eshi Nyambi ne muhunga, yoyishi hawayoyire no diyoghero dya Johannesi. ³⁰ Ene haPharisee no hadimuki ho muragho hashwenine thitambo thaNyambi papawo, pamurandu eshi kadi hawayogha mwaJohanessi.) ³¹ ''Kunye keho, ndani, kukona nirikanyithe hanu hoghuno muhoko? Nye hapitura? ³² Hadi yira hanuke hanakupepa mudyango dyomaghurithero, awa hana hungumana no kukwitha hathinda no kughamba, 'Tuna pepi membo kukoye, no kadi ghuna kini. Tunembi membo gho yifa, no kadi ghuna diri.' ³³ Aye Johannesi ghoDiyoghero gheyire kadiko ghuroto no kunwa no vinyu, no ghuna kughamba, 'Ghakara no mupepo ghoghumango.'' ³⁴ Mwana Munu gheyire ghudya no kunwa, no ghuna kughamba, 'Kenge, oyu mukakateri gho katughuru no mungorwi, muyendha waketethi no haharure!' ³⁵ Ene ghudimuki ne haghukarera wahe kohanendi wahe.'' ³⁶ Pano ghofotji ghopawa Pharisee ghethire Jesusi ghadye nendi. Podiyo apa Jesusi ghengenine mundhugho dhamuPharisee, ghahungumane kutishi ghadye. ³⁷ Kenge, pakarire mbuyama mudoropa oyu ghakarire thiharuri. Apa ghamonine eshi kuna kuhungumana kutishi mundhugho dhamuPharisee, podiyo ghakaretire kopi gho maghadhi gho kunuka thiwana. ³⁸ Apa ghemanine kunyima dhendi pepi nomapadhi ghendi, ghudira, ghatangire kuyuritha mapadhi ghendi nomaruhodhi ghendi, no ghaghakuyure no huki dhendi dhokumutwi no ghancumitire mapadhi ghendi no kughawethera no maghadhi gho kunuka thiwana. ³⁹ Apa haPharisee awa hethire Jesusi hamonine yi, ghaghayarire papendi, ghughamba, ''Oyu katughuru ngo muporofeta, ngo kukona ghadimuke dye no mbuyama munye oyu ghakumukwata, eshi yene thiharuri.'' ⁴⁰ Jesusi ghahuthire no kughamba kukwendi, ''Simoni, nidi noyimweya nakughamba kukoye.'' Ghaghambire, ''Yighambe, Muhongi!'' ⁴¹ Jesusi ghaghambire, ''Mukakutapa masherenyi ghumweya ghakarire no hakathikoroti wendi hawadi. Oyu ghofotji ghamukorotire madenarii matherekwoko, no ghumwe makumi kwoko. ⁴² Apa hadhirire kumufuta, ghawathigherere wahe. Podiyo, yupi ghakumuhaka thikuma?'' ⁴³ Simoni ghamuhuthire no kughamba, ''Ame ne ngo yo ghapire yoyingi.'' Jesusi ghaghambire kukwendi, ''Ghuna kengi thiwana.'' ⁴⁴ Jesusi ghapirukire kwambuyama no kughamba kwaSimoni, ''Eyi ghumona yu mbuyama. Ame nangeni mudighumbo dyoye. Kadi wanipire meyu gho mapadhi ghange, ene ye ghana yuritha mapadhi ghange no maruhodhi no kughakuyura no huki dhendi. ⁴⁵ Kadi wani ncumitire, ene kutunda pa neya mwishi kadi ghana shayeka kuncumita mapadhi ghange. ⁴⁶ Kadi ghuna wethera mutwi wange no maghadhi, ene ghanawethera mapadhi ghange no maghadhi ghokunuka thiwana. ⁴⁷ Podiyo nakughamba kukwenu mwe, maharwero ghendi, agha ghadi shimengi, ghana ghamuthigherera- yoyishi aye ghahakire thikuma. Ene ghofotji yu ghathigherera kamanana, kuhaka kamanana.'' ⁴⁸ Podiyo ghaghambire kukwendu, ''Maharwero ghoye ne ghanapu kuthigherera.'' ⁴⁹ Awa hana hungumana pofotji hatangire kughamba kukwagho, ''Yidye yu gho kuningakuthigherera maharwero?'' ⁵⁰ Podiyo Jesusi ghaghambire kwa mbuyama, ''Matawero ghoye ghana kwirura. Yende muthiraro.''