¹ Mudiyuwa dyoSabata, Jesus gha pitere mudipya, hakathishongero wendi kututune no kudya mbuyo. ² Ene hafarasyi hamweya ha ghambire eshi, "Pashanye muna kuraghanena yinu yi ha shweneka kurughana mudiyuwa dyoSabata?" ³ Jesus gha wa huthere eshi, "Mbadi mwa toya eyi gha rughanine David apa gha yuvire Ndhara, naye nawatutughuru wa ha karire nendi? ⁴ Gha yendire mundhugho dhaNyambi gha shimbire ghuroto ghomuyambo no gha dire ghumweya, no gha pire hatutughuru wa ha karire nendi nawo hadye, ngambi kemo eshi hapristeri pithagho ha tawedhera kudya ghuroto ghu." ⁵ Munyima koku wa tongwera eshi, "Mwana Munu ne Fumu ghoSabata." ⁶ Sabata ghumweya gha yendire musinagoge no gha ka hongire hanu. Pa karire katughuru gho kukukuta dyoko dyorudyo. ⁷ Hakamarukwaro nawafarasayi ha mu kenegere thikuma ngeshi kukona gherukithe mudiyuwa dyoSabata, podigho eshi ha kone kuwana ngcamu dho kumurundera. ⁸ Ene gha dimukire yighayara yawo no gha tongwere katughuru ghodyoko dyokukukuta eshi, "Wimane wiye pakatji kawaheya." Katughuru naye ghemanine. ⁹ Jesus gha wepurire, "Kuna kumwipura, pathinamuragho kurughuna ghuwa endi kurughana ghuyi mudiyuwa dyoSabata, kuparitha moyo endi kughuyipitha?" ¹⁰ Gha kengire kwawaheya no gha tongwerire katughuru yu, "Ghorore dyoko dyore." Gha rughanine kemo, dyoko dyendi dyerukire. ¹¹ Ha patire no ha kuyongire mukatji kawo eyi mbo ha kona kurughana Jesus. ¹² Mumayuwa agha yendire kudirundu gha ka raperere. Gha twarire kughutho kuraperera ghuthiku ghoghuheya kwaNyambi. ¹³ Apa dya vire diyuwa, ghethire hakathishongero wendi no gha tororire po dikumi nohawadi, awa karo ghethirire eshi hatumi. ¹⁴ Mena wo hatumi wa ne; Simon (oyu gha tire eshi Peter) na minendi Andrew, James, John, Phillip, Bartholomew, ¹⁵ Matthew, Thomas, James mwana Alphaeus, Simon yu hethire eshi Zealot, ¹⁶ Judas mwana James na Judas Iscariot oyu gha karire muheti. ¹⁷ Jesusi gha shurukire kudirundu nawo no ghemanine pamuve nombunga dhawakathishongero wendi, pofotji no mbungadhawanu homuJudea naJerusalem nawa ha kara kumbombwa dhomakuruviya gha Tyre naSidon. ¹⁸ Heyire mu kuna mu tegherera no kuwerukira kuyikorwa yawo. Hanu wa ha karire no mupepo ghoghumango nawo hapwire kwirukitha. ¹⁹ Keheyuno mumbunga dhi gha kondjire kumukwata, yoyishi ngcamu dhomerukithero ne mumwendi dha shwayire no gha werukithire waheya. ²⁰ Gha kengire kwawakathishongero wendi no kughamba eshi, "Mwakafiyaghudhi mwe mwahepwe, yoyishi ghufumu waNyambi ne wenu. ²¹ Mwakafiyaghudhi mwe muna kufa ndhara pano, yoyishi mbo nekuta. Mwakafiyaghudhi mwe muna kudira pano, yoyishi mbo muna heki. ²² Mwakafiyaghudhi ngeshi hanu hana mu nyengi, kumushwayitha kuyinu, kumutharuka no kumunyatha eshi mwa yi pamurandu waMwana munu. ²³ Mbo mu shamberere mudiyuwa dyo no kuregha ghushamberera, yoyishi mbo muna wana ndjambi dhenu mudiwiru, hatukuru wawo dyo ha rughanine haporofeta kemo. ²⁴ Diguvo kukwenu mwatungi, yoyishi mwa wana kare mahengawero. ²⁵ Diguvo kukwenu mwe mu nekuta pano, yoyishi mbo muna fu ndhara kunyima dhoruvedhe. Diguvo kukwenu mwe muna kuheka pano, yoyishi mbo muna kara muyindhivi no madiro munyima dhoruvedhe. ²⁶ Diguvo kukwenu mwe, ngeshi hanu waheya kuna kughamba yoyiwa kuhatera kwenu, yoyishi hatukuru wenu dyo ha rughanine kwawaporofeta hombango kemo. ²⁷ "Ene ni na kumutongwera mwe muna kutegherera eshi, hake hanyathi ghoye no rughane ghuwa kowa ha kunyenga. ²⁸ Tungeke awa hana kukukuta no raperere po awa hana kukupetha. ²⁹ Oyu ghana kungcambura kuditama dyofotji, mu pe dimweya. Ngeshi ghumweya gha shimbi thivata thoye, mbadi wa kona kushwena kutapa thivata thoye shime. ³⁰ Tape kwa keheyuno ghana kukuromba, mbadi wa kona kumutongwera eshi gha ka thi huthe. ³¹ Thika di ghuna shana eyi sho ha kurughanene hanu, wa rughanene thikadyo. ³² Ngeshi we ne kuhaka hanu wa ha kuhaka pithagho, pamurandu munye mbo wanena ndjambi? Yoyishi hayiharuri nawo kuhaka awa ha wa haka. ³³ Ngeshi ha ghu rughana ghuwa kowa hana kukurughana ghuwa, pamurandu munye mbo wanena Ndjambi? Yoyishi hayiharuri nawo kurughana kemo. ³⁴ Ngeshi ha ghu tapa kwawa ghuna kurupera eshi mbo hana kuhuthera, pamurandu munye mbo wanena ndjambi? Hayiharuri nawo kutapa kwawayiharuri, podiyo eshi ha kuwane dhodho ndjambi dhofotji. ³⁵ Ene mu hake hanyathi wenu no kuwarughana ghuwa. Tape, ene mbadi ghu kurupere eshi gha kuhuthere, no ndjambi dhoye ne mbo dhina kara dhodhikuru, no mbo muna kara hana waShokuru, yoyishi aye ne munongo kwawanu hokupira kutumera na wayi. ³⁶ Mu kare noneke, yoyishi wihenu naye gha kara no neke. ³⁷ Mbadi wa kona kuteterandhango, nowe mbadi mbo ha kuteterandhango. Mbadi wa kona kushweneka, no mbadi mbo ha kushweneka. Thiyerere po hamweya, nowe mbo ghuna pu kuthiyerera. ³⁸ Tape, nowe mbo hana kupa. Ndjambi dhoneke dhokupakerera nokuyarera mbo hana dhi notwera pamaghuru ghoye. Kehethino ghuna kurughanitha kwa ghumweya, mbo hana thi rughanitha kukoye. ³⁹ Munyima gha wa tongwere thiyedhekeritho. "Mukunga ne kukona kukoka mukunga muyendhendi ndi? ngeshi kemo, waheya mbo hana weya mudikwina, endi mbadi mbo ha wera mo? ⁴⁰ Mukathishongero ne mbadi mukuru kupitakana muhongi wendi, ene keheyuno apa mbo gha pwa kudeghura ne mbo ghana kara yira muhongi wendi. ⁴¹ Nye mwakukengera ku kapindhi kokambiru aka kadi mudiho dyamukuroye, ene kadi wakudimuka ethi thidi mudiho dyoye ghothinda? ⁴² Ngepi di shoghambe kwamukuroye, 'Mukurwange, ninge nikushwayithe thipara ethi thidi mudihodyoye,' oku we gho thinda kadi ghuna dimuka ethi thidi mudiho dyoye? Mwahayidena! Pakutanga shimbe thipara ethi thidimudiho dyoye, ndani poshomone thiwana mukushwayitha thipara mudiho dyamukuroye. ⁴³ Mbadiko thitondo thothiwa tho kwima mbuyo dhokwora, kemo thikadyo eshi, mbadiko thitondo thokwora tho kwima mbuyo dhodhiwa. ⁴⁴ Kehe thino thitondo kuthidimukitha kumbuyo edhi themanga. Mbadiko munu gho kuya ghukuyu kumakona endi mandjembere kuthitondo thimweya. ⁴⁵ Munu ghomuhunga kuneghedha ghuwa wendi gho kutunderera eyi gha pungura mumutjima wendi ghoghuwa, no munu ghomuyi kuneghedha ghuyi wendi gho kutunderera moyi gha pungura mumutjima wendi. Aye kughamba eyi ya yara mumutjima wendi. ⁴⁶ 'Pashanye muna kunithera eshi, "Fumu, Fumu,' ene mbadi muna kukutha eyi na kughamba? ⁴⁷ Keheyu munu gho kwiya kukwange no kuyuva manando no kughakutha, ni na ka mu tongwera eshi ngepi gha pitura. ⁴⁸ Ghana kupitura na katughuru yu ghana kutenda ndhugho, oyu gha thimine mumuve no kushokekera ndhugho dhi padiwe. Apa dyeyire divavure, kapupo ka pumure ndhugho dhi, ene mbadi dha kunyungire, yoyishi gha dhi tendire thiwana. ⁴⁹ Ene munu yu gho kuyuva manando ghange no kushwena kughakutha, aye ghana kupitura na katughuru yu gha shokekere ndhugho dhendi pamuve apa pa pira matatekero. Divavure dyeyire no kukupumura kundhugho dhi, dha wire popo no dha yipire thikuma."