¹ Hanu ha kukongawedhire kwaJesus no ha tegherere kunando dhaNyambi, aye ghemanene kumbadi dhothiviya thaGennesaret. ² Gha monine mato mawadi hana thekera mudiya dyothiviya thi. Haka kushana thi ha shwayire mo no ha karire hana kuyogha makwe ghawo. ³ Jesus gha dhinine muwato ghofotji ghopogho mawadi, wato waSimon no gha mu tongwere gha thekurure ha shwaye kudiya. Munyima, gha hungumanine muwato no gha hongire hanu. ⁴ Apa gha manine kughamba, gha tongwere Simon eshi, "Henyithe wato ghu popadhungi gho teghe makwe ghoye, nanyi ghu kwate." ⁵ Simon gha huthire eshi, "Fumu, tuna rughana ghuthiku ghoghuheya, ene mbadi tuna kwata, nanyi ni teghe makwe pamurandu eshi ghuna ghamba kemo." ⁶ Munyima dho kurughana kemo, ha kwatire thi dhodhingi, makwe ghawo gha tangire kutjinuka. Hethire hayendhagho homato ghamweya no ha wa ghamwene. ⁷ Heyire no ha yarithire mato ghomaheya kare gha tangire kurowera. ⁸ Apa gha yi monine Simon Peter, gha tongamenine kughutho waJesus ghughamba eshi, "Ni thiye ghuka yende, yoyishi nothiharuri me, Fumu." ⁹ Gha tetukire, thika wayeheya wa ha karire nendi apa ha kwatire thi. ¹⁰ Pakarire James naJohn, hanaZebedee, ghayendha Simon. Jesus gha tongwere Simon eshi, "Mbadi ghu yape, yoyishi kutunda pano, ghuna ka kwata hanu." ¹¹ Munyima dho kuthekera mato ghawo, ha thiyire yoyiheya popo no ha mu kuthire. ¹² Oku aye shime mudoropa dhimweya, katughuru ghoyinondwe naye mogha karire. Apa gha monine Jesus, gha kuvamine no kumukanderera eshi, "Fumu, ngeshi ghuna himi ne kukona ghuni kenithe." ¹³ Jesus gha ghorore dyoko dyendi, gha mu kwatire no gha ghambire eshi, "Na himi. Ghupwe kukenitha." Popo vene, yinondwe ya mu shwayire. ¹⁴ Gha mu rawere eshi mbadi gha ka tongwere keheyuno ene gha mu tongwere eshi, "Yende kwamupristeri ghuka tape muyambo ghomakenithero, kukutha marawero ghaMoses, mumamatjangwa." ¹⁵ Mbudhi dhokuhatera kwendi dha kuhanyine thikuma, no hanu hohengi heyire no ha yuve yihonga yendi no kuwerukira kuyikorwa yawo. ¹⁶ Ene kehepano ye nga wa thiyanga gha yende kumango gho pithendi gha ka raperere. ¹⁷ Diyuwa dimweya oku yene kuna kuhonga, pakarire hafarasayi nawahongi ghomiragho awa ha hungaminine po kutunda mumikunda dhomuGalilee, Judea naJerusalem. Ngcamu dhaFumu dhokwirukitha dha karire nendi. ¹⁸ Hatutughuru hamweya ha retire katughuru ghokughara yirama padisharo, no ha shanine ndhira dho kumwingeneka mwishi podighoshi ha mu ture kughutho waJesus. ¹⁹ Mbadi ha wanine ndhira pamurandu ghombunga dhawanu, ha dhinine pawiru dhondhugho no ha tendire ndhira edhi ha pitithere katughuru yu aye shime padisharo dyendi pakatji kawanu, kughutho waJasus. ²⁰ Apa gha monine matawero ghawo, Jesus gha ghambire eshi, "Katughuru, maharwero ghoye ne ghana pu kuthiyerera." ²¹ Hakamarukwaro nawafarasayi ha tangire kwipura eshi, "Yidye yu gho kukutura mudyango dyaNyambi? Yidye karo gho kuthiyerera maharwero ngeshi mbadi Nyambi pithendi?" ²² Ene Jesus gha dimukire yighayara yawo, gha wa huthere eshi, "Pamurandu munye muna kukwipwera yi mumitjima dhenu? ²³ Yipi yoyiredhu kughamba, 'Maharwero ghoye ghana pu kuthiyerera' endi kughamba eshi 'Wimane ghuyende'? ²⁴ Podigho mu dimuke eshi Mwana Munu ne ha kara nongcamu pamuve dhokuthiyerera maharwero," gha tongwere katughuru ghokughara yirama eshi, "Ghushemwa na kukutongwera, dhamune disharo dyoye ghuyende kudighumbo dyoye." ²⁵ Popo vene, ghemanine kughutho wawo no gha dhamunine disharo dyendi edi gha rarire. Munyima po gha yendire kudighumbo dyendi, ghu kugha Nyambi. ²⁶ Waheya ha tetukire no ha kughire Nyambi. Hakarire nowoma ghughamba eshi, "Tuna mono yinu yokupitakana dyarero." ²⁷ Munyima dhoyihokoka yi, Jesus gha shwayire padyango di no gha monine muketethi ghodinaLevi ghana hungumana kutende wamuketethi. Gha mu tongwere eshi, "Ni kuthe." ²⁸ Levi naye ghemanine gha mu kuthe, kuthiya yinu yoyiheya. ²⁹ Levi gha tamburire Jesus mudighumbo dyendi no thirika thothikuru. Pakarire haketethi hohengi no hanu hamweya wa ha karire nawo kutishi awa gha dire nawo. ³⁰ Ene hafarasayi nohakamarukwaro wawo ha shivanine kwawakathishongero wendi ghu ghamba eshi, "Pashanye muna kudyera nokunwa nawaketethi noyiharuri?" ³¹ Jesus gha wa huthere eshi, "Hanu hondjewandjewa ne mbadi ha nyanda nganga; ene awa hana kukorwa. ³² Mbadi neya kukwitha hahunga, ene yiharuri kumapirukero." ³³ Ha mutongwere eshi, "Hakathishongero waJohn ne kuraperera no kudhirerekedha, no hakathishongero wawafarasayi nawo kurughana kemo. Ene hakathishongero woye ne kunwa nokudya." ³⁴ Jesus gha wa tongwere eshi, "Yidye ghokukona kudhirerekedhitha hakareripo wakatughuru yu ghana kuyekitha oku ye ne nawo shime ghadi? ³⁵ Ene mayuwa mbo gha neya apa mbo gha mu shwayitha mukatji kawo, ndani mbo hadhirerekedha." ³⁶ Jesus gha wa tongwere mayedhekeritho. "Mbadiko gho kuteta thivata thendi thothipya podigho eshi gha roghithitheko thivata thendi tho kare-kare. Ngeshi ghana ka rughana kemo, kuteta thivata thothipya, thikehe thokuthivata thothipya mbadi thina kakurikanya nothivata thokarekare. ³⁷ Mbadiko gho kurokera vinyu ghomupya mumapungwero-vinyu ghokarekare. Ngeshi ghana ka rughana kemo, vinyu ghomupya ghana ka payura mapungwero-vinyu gha, vinyu yu ghana ka notoka no kuyipitha mapungwero-vinyu. ³⁸ Ene vinyu ghomupya gha kona kumurokera mumapungwero-vinyu ghomapya. ³⁹ Mbadiko gho kushana kunwa vinyu ghomupya munyima dhokunwa vinyu ghomukurukuru, ghana kughamba eshi, 'Hasha yoyu ghomukurukuru.'"