¹ Jesus ghamwingenine Mupepo Ghokupongoka, munyima dho kutunda kurware rwaJordan no gha mu twarire kumamboreya, ² Satani gha mu yerikire ghure gho mayuwa makumi nomane agha gha karire mumamboreya. Gha dhirerekire apa ghaka karire mumamboreya no gha yuvire ndhara munyima dhomayuwa ghaya. ³ Satani gha tongwere eshi, "Ngeshi ghomwana Nyambi ne, thitunune gha mawe ghakare ghuroto." ⁴ Jesuss gha huthire eshi, "Yapwa kutjanga, 'Munu mbadi wa kupara ghuroto pithagho'" ⁵ Satani gha twarire Jesus kuwiru no gha mu neghedhire ghufumu ghoghuheya ghokaye muruvedhe rorupu. ⁶ Satani gha ghambire eshi, "Ni na ka kupa ngcamu noghuwa ghoghuheya, yoyishi ha yi ni pa, name kukona kuyitapa kwakeheyuno na himi. ⁷ Ni na ka yi kupa ngeshi ghu tongamene kughutho wange ghuni kughe." ⁸ Jesus gha mu huthere eshi, "Yapwa kutjanga, 'Mbo ghuna kughu Fumu Nyambi ghoye, yoyiye pithendi wa kona kukarera.'" ⁹ Satani gha twarire Jesus muJerusalem no kumutura pawiru dhotembeli, kokumutongwera eshi, "Ngeshi ghomwana Nyambi ne kukuthiyerere ghuwe. ¹⁰ Yapwa kutjanga eshi, 'Mbo ghana rawera haEngeli wendi no ha kukunge,' ¹¹ no, 'mbo hana kuyeyura mumoko ghawo, podigho eshi mbadi ghuna ka were padiwe'" ¹² Mu kumuhuthera, Jesus gha ghambire eshi, "Yapwa kughamba, 'Mbadi wakona kuyereka Fumu Nyambi ghoye.'" ¹³ Satani gha manine kuyereka Jesus munyima ko kumuthiya gha ka yende kare ruvedhe rokurandako. ¹⁴ Jesus gha hukire kuGalilee mungcamu dhaMupepo Ghokupongoka, mbudhi dho kuhatera kukwendi dha kuhanyine mumikunda dhokuthiyarako. ¹⁵ Gha tangire kuhonga mumasinagoge, hanu waheya ha mu kuyire. ¹⁶ Gheyire kuNazareth, omu gha kurera, thikadi tha karire thitjo thendi, gha yendire musinagoge mudiyuwa dyoSabata no gheyukire kutoya wima. ¹⁷ Ha mu pire rukwaro rwamuporofita Isaiah. Gha fikurire rukwaro ru apa ha tjanga, ¹⁸ "Mupepo waFumu ne papange ghu di, yoyishi gha ni tungeka ni tware mbudhi dhodhiwa kwawahepwe. Gha ni tuma mukutongwera mashutukero kwawa ha kwata, hamikunga ha mone no kushutura hapika, ¹⁹ no kutongwera mwaka ghoneke dhaFumu" ²⁰ Gha fikire rukwaro no kurutapa kwamughamweni, munyima ko kuhungumana. Waheya wa hakarire musinagoge ha mu kengurure. ²¹ Gha tangire kughamba nawo, "Dyarero ne muna yuvu mayarithero ghomatjangwa." ²² Waheya ha ghambire yoyiwa kuhatera kukwendi no ha tetukire kumanando ghoneke agha gha ghambire, no hepurire eshi, "Mbadi mwanaJoseph yu ndi?" ²³ Ghawa tongwere eshi, "Shemwa mbo muna ni tongwera dino dithaghano, 'Nganga, kwirukithe ghothinda. yoyiheya yi twa yuva wa tenda muCapernaum, tende kemo mudoropa dhoghukakoghatji koye.'" ²⁴ Ene gha ghambire eshi, "Ghushemwa na kumutongwera, mbadiko muporofeta yu ha tambura mudoropa dhoghukakoghatji kendi. ²⁵ Ghushemwa na kumutongwera, hengi hadidhi hakarire muIsrael ruvedhe rwaElijah, apa kwapwire kuyandhera kwiwiru ghure ghomyaka dhihatu notughonda kwoko nokofotji, diyerenge dyeyire pamuve. ²⁶ Elijah mbadi gha mu tumine kwawaheya, ene kwa Zarephath, mudidhi ghomuSidon. ²⁷ Hengi hanu ha korwire yinondwe ruvedhe rwaElisha ghomuporofeta, ene mbadi waheya herukire, Naaman pithendi ghomukaSyria." ²⁸ Hanu waheya musinagoge ha patire apa ha yuvire yinu yi. ²⁹ Hemanine no ha mu thiyenekire gha shwaye mudoropa, ha mu twarire kughuhuraghodirundu dyodoropa dhawo, podigho eshi ha ka mu thindeke. ³⁰ Gha pitire mukatji kawo gha yende kudyango dimweya. ³¹ Gha yendire kuCapernaum, doropa dhomuGalilee, no gha tangire kuwahonga muSabata. ³² Ha tetukire thikuma kuyihonga yendi, yoyishi gha ghambire nongcamu. ³³ Musinagoge mwakarire katughuru yu gha karire no mupepo wasatani, gha kuyererire thikuma eshi, ³⁴ "Ah! yinu munye tuna kutendi, Jesus ghomukaNazareth? Ghu neya no tu hanyaghure ndi? Na ku dimuka eshi yowe dye--Mupongoki waNyambi!" ³⁵ Jesus gha tjidhire mupepo ghu wasatani eshi, "Porere! Shwaye mumwendi!" Munyima dhokuvukumena katughuru yu pakatji kawanu, mupepo wasatani wa shwayire mumwendi, ene mbadi wa mu remekire. ³⁶ Hanu waheya ha tetukire no ha twarire kughutho kuyighambaghura mukatji kawo. Ha ghambire eshi, "Manando munye gha? Kurawera mupepo dhodhimango nongcamu, nadho kokushwagha." ³⁷ Mbudhi dhokuhatera kwendi dha tangire kukuhanya mumikunda dhokuthiyarako muditunga diya. ³⁸ Jesus gha shwayire musinagoge no gha kengenine mudighumbo dyaSimon. Ngumwenya Simon gha korwire no ha mu kandererire po kwaJesus. ³⁹ Ghemanine pepi nendi no kutjidha yikorwa yi no ya mu shwayire. Popo paruvedhe rofotji ghemanine no gha tangire kuwa yumbura. ⁴⁰ Pakutokera kodiyuwa, hanu ha retire kwaJesus hakorwi hoyikorwa yokukutjakatjaka. Gha kambekire dyokodyendi pakeheyu no gha werure. ⁴¹ Mupepo dhimango dha shwayire mumwawo ghu kuyerera eshi, "Yowe mwanaNyambi!" Jesus gha tjidhire mupepo dhodhimango no mbadi gha dhi tawedhere dhi ghambe, yoyishi ha dimukire eshi yodiye Kristusi. ⁴² Mathikuthiku thikuma, gha yendire kudyango dyopithendi. Hanu ha mu shanine no heyire koko kudyango gha karire. Ha kondjire kumushweneka eshi mbadi gha wa thiye. ⁴³ Gha wa tongwere eshi, "Na kona kuyaghura mbudhi dhodhiwa dhoghufumu waNyambi mumadoropa ghamweya ghomengi, yoyishi yo ghani tumena." ⁴⁴ Gha twarire kughutho kuyaghura mumasinagoge ghomuJudea.