¹ Mumwaka ghodikumi nokwoko ghoghuraghuri waTiberius Caesar- oku Pontius Pilate ne nguvuru ghomuJudea, Herod ne fumu ghoIturaea naTrachonitis, Lysanias yene fumu waAbilene, ² oku Annas naCaiaphas ne shime hapristeri hohakuru- Nyambi gha tumine John mwanaZechariah mumamboreya. ³ Gha yendire mikunda dhodhiheya dhopepi naJordan ghuyaghura diyoyero dyomapirukero nomathiyerero ghomaharwero. ⁴ Thikadi ya pwa kutjanga mumbapira dhamuprofeta Isaiah, "diywi dyoyu ghana kwitha mumamboreya, 'Royithe ndhira dhaFumu, ghorore mayira ghendi. ⁵ Kehe muronga mbo ghuna pu kututhera, kehe dirundu mbo dina pu kumbandangedha, mayira ghomaheya mbo ghana pu kughorora nomambombwera mbo ghana kara mayira, ⁶ hanu waheya mbo hana mona makomweneno ghaNyambi.'" ⁷ John gha tongwere wa heyire kwendi kudiyoyero eshi "Amwe hana yiyoka! Yidye ghana mu yapitha mutjire ghupata ghuna kwiya? ⁸ Mwa kona tango kuneghedha mbuyo eshi muna piruka, mbadi mu ghayare eshi 'Abraham ne wihetu,' yoyishi Nyambi ne kukona kutjindja gha mawe gha kare hana Abraham. ⁹ Kamo hana ka tura kumidhi dhoyitondo. Kehe thitondo dhokupira kwima mbuyo dhodhiwa hana kuthiteta no kuthivukumena mudiraradiro." ¹⁰ Hanu ha mwipaghurire thikuma, "Yinye keho sho tu rughane?" ¹¹ Gha wa huthere eshi, "Oyu ghadi noyivata yiwadi gha pe ko yu ghana piri, oyu ghadi noyidya naye gha rughane kemo." ¹² Haketethi heyire kudiyoghero no hepurire eshi, "Muhongi, nyinye sho tu tende?" ¹³ Gha huthire eshi "Mbadi mwa kona kushimba mutero kupitakana edi hana mu rawera mu ka shime." ¹⁴ Hakayita hamweya nawo ha mwipurire eshi, "Atwe ne yinye sho tu rughane?" Gha wa huthere eshi, "Mbadi mwakona kushimba manyinga ghawanu mungcamu, mbadi karo mwa kona kurundera hanu. Mu tambure ndjambi dhenu." ¹⁵ Hanu ha tatererire mwiyero waKristus, ha kundhundhire mumitjima dhawo eshi John kukona gha kare yodiye Kristus. ¹⁶ John ghwahuthere eshi, "Ame kuna kumuyogha nomeyu, ene yu ghana kwiya ghokupitakana me, makuha ghendi mbadi na roghera kughashutura. Aye mbo ghana muyogho naMupepo Ghokupongoka nomudiro. ¹⁷ Ghadi no thikuro munyara dhendi kuna kukomba thindanda gha ture mavumbukiro muthishete thendi. Mungu ghana ka ghu tumekera nomudiro ghopira kudhimana." ¹⁸ Nomatjokedhero ghomengi, John gha yaghurire mbudhi dhodhiwa kwawanu. ¹⁹ Munyima dho kukutununa Herod pamurandu gho kuyeka mbuyama waminendi Herodias noghuyi ghoghuheya ghu gha rughana, ²⁰ kupakerera yinu yoyiheya yi, Herod gha tjaperire John mukashitiko. ²¹ Munyima dho kuyogha hanu waheya, Jesus naye gha mu yoyire, oku aye shime kuna kuraperera, diwiru dya yandhurukire, ²² Mupepo Ghokupongoka gha temberere papendi yira dikutji nodiywi dya shwayire mudiwiru eshi, "Oyu ne mwanange na haka. Na shamberera thikuma mumwendi." ²³ Jesus gha tangire thirughana thendi nomyaka makumi mahatu. Aye ne mwana (kukutha edi ha ghayarire hanu) Joseph, ghomwana Heli, ²⁴ mwana Matthat, gho mwana Levi, mwana Melchi, gho mwana Jannai, gho mwana Joseph. ²⁵ Joseph gho mwana Mattathias, gho mwana Amos, gho mwana Nahum, gho mwana Esli, gho mwana Naggai, ²⁶ gho mwana Maath, gho mwana Mattathias, gho mwana Semein, gho mwana Josech, ghomwana Joda. ²⁷ Joda ne mwana Joanan, gho mwana Rhesa, ghomwana Zerubbabel, ghomwana, ghomwana Salathiel, ghomwana Neri, ²⁸ ghomwana Melchi, ghomwana Addi, ghomwana Cosam, ghomwana Elmadam, ghomwana Er, ²⁹ ghomwana Joshua, ghomwana Eliezer, ghomwana Jorim, ghomwana Matthat, ghomwana Levi. ³⁰ Levi ghomwana Simeon, ghomwana Judah, ghomwana Joseph, ghomwana Jonam, ghomwana Eliakim, ³¹ ghomwana Melea, ghomwana Menna, ghomwana Mattatha, ghomwana Nathan, ghomwana David, ³² ghomwana Jesse, ghomwana Obeb, ghomwana Boaz, ghomwana Salmon, ghomwana Nahshon. ³³ Nahshon ghomwana Amminadab, ghomwana Admin, ghomwana Arni, ghomwana Hezron, ghomwana Perez, ghomwana Judah, ³⁴ ghomwana Jacob, ghomwana Isaac, ghomwana Abraham, ghomwana Terah, ghomwana Nahor, ³⁵ ghomwana Serug, ghomwana Reu, ghomwana Peleg, ghomwana Eber, ghomwana Shelah. ³⁶ Shelah ghomwana Cainan, ghomwana Arphaxad, ghomwana Shem, ghomwana Noah, ghomwana Lamech, ³⁷ ghomwana Methuselah, ghomwana Enoch, ghomwana Jared, ghomwana Mahalaleel, ghomwana Cainan, ³⁸ ghomwana Enos, ghomwana Seth, ghomwana Adam, ghomwana Nyambi.