¹ Ruvedhe ruya, Caesar Augustus gha tapire marawero gho kutara hanu kaye kokaheya. ² Roghokutanga kutara hanu waheya mumayuwa ghoghunguvuru waQuirinius muditunga dyaSyria. ³ Hanu waheya ha hakukahukire mumadoropa ghawo kuditjango dyothivarero thi. ⁴ Joseph naye gha tundire muGalilee, mudoropa dhaNazareth gha yende muJudea, mudoropa dhaDavid dhodina Bethlehem, yoyishi aye ne mukanunderero dhodiko dyaDavid. ⁵ Gha yendire pofotji naMary kuditjango di, mbuyama yu hapwire kwandekera kwendi aye karo gha karire nodira. ⁶ Ruvedhe romushamurukero rwa kumine po oku awo shime muBethlehem. ⁷ Gha wanine mwanuke ghokatughuru, mbedi dhendi, gha mu dhingerire dikehe no kumutura muwato gho kunwena ngombe, yoyishi mbadi ha wanine ndhugho. ⁸ Pa karire hadithi muditunga diya wa ha karire mumapya, kuna kukunga ndjwi dhagho ghuthiku. ⁹ MuEngeli waFumu gha monekire kwawo no ghuyerere waFumu wakarire nawo, ene awo ha yapire thikuma. ¹⁰ MuEngeli gha wa tongwerire eshi "Mbadi mu yape, yoyishi na mu retera mbudhi dhodhiwa dho kureta yishamberera yoyikuru kwawanu waheya. ¹¹ Mukomononi ne hana mu shamuruka dyarero mudoropa dhaDavid! Yodiye Kristus ghoFumu! ¹² Muna ka wana thidimukitho thino: nanyi mu ka wane mwanuke muwato ghokunwena ngombe hana mu dhingerera dikehe ¹³ kapupi kamanana kokumoneka mbunga dhawaEngeli ghu kugha Nyambi eshi ¹⁴ "Gha fumane Nyambi, pakaye pakare thiraro mukatji kawanu awa hana kumushambereritha." ¹⁵ Munyima dho kuhuka haEngeli, hadithi wa hakuyongire eshi "Tu yende kuBethlehem tu ka mone thihokoka thi ghana tu tongwera Fumu." ¹⁶ Ha tambukire wangu no ha ka wanine Mary, Joseph namwanuke ghana rara muwato ghokunwena ngombe. ¹⁷ Munyima dhokumona mwanuke, ha tongorire eyi hawa tongwere haEngeli yokuhatera kwamwanuke yu. ¹⁸ Waheya wa ha yuvire yi ha ghambire hadithi ne ha hakamanine thikuma. ¹⁹ Mary ne gha kundhundhire yi gha yuvire mumutjima wendi. ²⁰ Hadithi ha hukire ghukugha Nyamba kuyoyiheya yi ha yuvire no kumona thika di ha yi wa tongwerire. ²¹ Munyima dhodikeneno, ha mu tire dina Jesusi, dina di gha mu tire muEngeli oku yene nongagharo temba. ²² Apa gha pwire mayuwa ghomakenithero ghendi, kukutha miragho dhaMosesi, ha mu retire mutempeli muJerusalem kughutho waNyambi. ²³ Thikadi yapwa kutjanga mumiragho dhaFumu eshi, "Keheyu mbedi ghokatughuturu mbo ghana mu tungeka kwaFumu." ²⁴ Ha tapire muyambo thikadi yapwa kutjanga mumiragho dhaFumu "Makutji mawadi ngambi maputukuwaghana mawadi" ²⁵ MuJerusalem mwakarire katughuru ghodina Simeon ghomuhungami yu gha tatererire mahengawero ghaIsrael, Mupepo Ghokupongoka gha karire papendi. ²⁶ Mupepo Ghokupongoka gha mu dimimukithire eshi mbo ghana mono Kristusi waFumu kughutho gho kufa. ²⁷ Mupepo Ghokupongoka gha muneghedhire no gha yendire mutembeli. Mwanuke Jesus ha mu retire mutembeli no ha tende kukutha thitjo thomiragho. ²⁸ Gha mu dhamunine ghukugha Nyambi eshi, ²⁹ "Mupikoye kukona gha yende muthiraro, Fumu, kukutha matoyedhero ghoye. ³⁰ Na mono makomweneno ghoye, ³¹ agha ghuna royitha kughutho wawanu waheya: ³² Thishe thomahokwero kwahayidena no ghuyerere kwawanu ghoye hakaIsrael." ³³ Wihe nanyina ha hakamanine koyi gha ghambire yo kuhatera kwendi. ³⁴ Simeon ghawa tungekire no gha tongwere Mary eshi "Oyu mwanuke ne gha pwa kutorora kumawero no matanerero ghohanu hohengi muIsrael no thidimukitha kwawa ha shwena- ³⁵ thimende thina kuna kutwa mudhimu ghoye podiyo eshi yighayara yomitjima dhawanu yipwe kuhokora." ³⁶ Muporofeta ghombuyama ghodina Anna naye mo gha karire. aye ne mwana Phanuel ghonunderero dhodiko dyaAsher. Mbuyama yu ne gha kuruparire thikuma. Gha karire myaka kwoko-wadi pofotji nakatughuru wendi munyima dhoghumadjaho wendi, ³⁷ ene mudhike ghure ghomyaka makumi-kwoko nomahatu no myaka ne. Kehepano yene nga karanga mutembeli kudhirerekedha no nokuraperera ghuthiku nomutenya. ³⁸ Paruvedhe roro rofotji gha henyine kwawo no gha tangire kutumera Nyambi no gha ghambire yokuhatera yu mwanuke kwakeheyu gha taterera mashutwero ghaJerusalem. ³⁹ Apa ha manie yoyiheya yi heyere kukutha miragho dhaFumu, ha hukire mudoropa dhawo dhaNazareth muGalilee. ⁴⁰ Mwanuke gha kurire, gha tanarire, gha kurire mughunyanyami no neke dhaNyambi dhakarire pendi. ⁴¹ Hakuru wendi nga ha yendanga kehe mwaka kuJerusalem kuthirika thoPassover. ⁴² Apa gha karire nomyaka dikumi nodhiwadi, ha yendire kuthirika thi thikadi tha karire thitjo thawo. ⁴³ Hemanine ha huke kudighumbo munyima dho ka karako mayuwa ghokurikanya. Mwanuke Jesus gha thiyarire muJerusalem ene hakuru wendi mbadi ha yi dimukire. ⁴⁴ Ha ghayarire eshi naye kuna kwiya munyima dhawo pofotji nawa ha yendire nawo, ha yendire ghure ghodiyuwa. Ha tangire kumushana, hepurire hapawo nawa yendhawo. ⁴⁵ Ha mu shanine ene mbadi ha mu wanine, ha hukire kuJerusalem ha ka mu shane. ⁴⁶ Munyima dhomayuwa mahatu, ha ka mu wanine mutempeli ghana hungumana pakatji kawahongi kuna kuwategherera no kuwepura mepwero. ⁴⁷ Waheya wa ha muyuvire ha tetukire kumahuthero ghendi. ⁴⁸ Ha yapire apa ha mu monine. Nyina ko kughamba eshi "pamurandu munye ghuna tu tendera kemo? name nawiho ne tuna ghaya kukushanashana." ⁴⁹ kokuhutha kwendi eshi, "Pamurandu munye muna ni shanena? mbadi mwa dimuka eshi na kona kurughana yirughana yaTate ndi?" ⁵⁰ ene mbadi ha tjwathanine yi gha tambire. ⁵¹ Gha hukire nawo kuNazareth no gha karire mwanuke ghomutumanithi. Nyina pakuyimona no kuyitura mumutjima wendi. ⁵² Gha kurire shime mumaghano nopayirama, Nyambi nawanu ha mu hakire.