¹ Pano kunyima dhoyi yinu, Fumu gha kutire mathere kwoko no hamweya, no kuwatuma panunda hawadi kughutho wendi mukehe doropa no dyango oku thinda oku ghakarire ghana kuyenda. ² Ghaghambire kukwagho,''Mukesho ne wingi, ene harughani ne hapu. Podiyo murombe Fumu gho mukesho ghatume harughani mumukesho wendi. ³ Muyende mundhira dhenu. Mumone, Ame kuna kumutuma mwe eshimwandjwighana mukatji ko mambungu. ⁴ Kadi mushimbe ndjato dho masherenyi, endi ndjato dhomuruyendo, endi yisandari, no mwamorora keheyuno mundhira. ⁵ Kehe dhino ndhugho mwakutangerera kungena, pakutanga mwakona kughamba, 'Ninge thiraro thikare modhi ndhugho!' ⁶ Ngeshi munu ghothiraro pwadi po, thiraro thenu nanyi thakuturumuthe papendi, ene ngeshi kadipo, nanyi thakumuhukere thinda. ⁷ Mwakukare mudhugho dhodho dhofofotji, kudya no kunwa eyi hakumupa, murughani ne mudyo kundjamb dhendi. Kadi mukayendaghure kutunda dighumbo yenda dighumbo. ⁸ Kehe muno mudoropa mwakungena, no kamutambura mwe, mwakadye keheyino hanamuturera kughutho wenu ⁹ no kerura hakorwi awa hakara ko. Mwakaghambe kukwagho,'Ghu fumu waNyambi ghuneya pepi nagho.' ¹⁰ Kehe pano gho kungena mudoropa no kadi hakumutambura mwe, mushwaghemo muyende mutundhira ghana no kughamba, ¹¹ 'Ngambi mbundu dho mudoropa dhenu edhi dhina kukukumuka kumaghuru ghetu kuna kudhikukumuna pamurandu wenu! Ene mudimuke yi: Ghufumu waNyambi ghuneya popepi.' ¹² Nakughamba kukwenu eshi mudiyuwa dyomatheko nanyi hakuyitawedhere muSodom ndani modhiyadoropa. ¹³ Woe kukwenu, Chorazin! Woe kukwenu, Bethsaida! Ngeshi yoyikuru yirughana eyi gharughane mumwenu ghayitendire muTyre naSidon, ngo hapirukire karekare, kuhungumana muyitere no mututwi. ¹⁴ Ene nanyi nakuyitawedhere muTyre naSidon mumatheko ene kadi mwe. ¹⁵ Amwe, Capernaum, mwakughayara eshi ngahakamutambure mudiwiru? ka, nanyi hakamuhuthe pamuve kwaHade. ¹⁶ Kehe yu gho kumutegherera mwe kutegherera kukwange, noyu gho kumushwena mwe kushwena me kushwena yu ghanituma me.'' ¹⁷ Awa makumi kwoko nomawadihakahukire no kuhafa, ghughamba,''Fumu, ngambi mupepo ghoghumango ghuna kutapa kukwetu mudina dyoye.'' ¹⁸ Jesusi ghaghambire kukwagho, ''Ame narorera Shatani ghakuwa kutunda kudiwiru yira mushoro. ¹⁹ Kenge, namupa mangcamu dhina nge, ndani mangcamu ghomahe ghawanyathi, no kadiko keheyino yakumuyuvitha tjitju. ²⁰ Ngambi kemo mwahafa ngenyu poyi, eshi mupepo ghuna kutapa kukwenu, ene muhafe thikuma eshi mena kadi hana ghavumbeka mudiwiru.'' ²¹ Paruvedhe rofotji ghahafire thikuma muMupepo gho Kupongoka, no kughamba, ''Nakukugha we, Tate, Fumu gho diwiru no kaye, yoyishi we wakungure yinu yi kwawanyanyami nokwawatjwathani no kuyinegha o kowa hadhira kukuhonga, yira hanuke hohambiru. Kemo, Tate, kemo yakarire thiwana kukuhafitha mumeho ghoye. ²² ''Kehe yino yinu ghayitura mumwange Tate, no kadiko yu ghadimuka Mwana kutundithako Tate,no kadiko yu ghadimuka Tate kutundithako Mwana no woawa Mwana ghatorora kumunegha ye.'' ²³ Podiyo ghapirukire kwawakathishongero wendi no kughamba mughudhindo, ''Awa hatungeka ne awa hokumona yinu eyi mwamona mwe. ²⁴ Nakughamba kukwenu, thingi thawa porofeta no ha fumu hashanine kumona yinu yi mwamonanga, no kadi hayimonine wo, no kuyuva yinu yi mwayuvanga, no kadi hayiyuvire wo.'' ²⁵ Kenge, mudimuki muragho ghemanine podiyo ghamuyereke, ghughamba, ''Muhongi, nye shonitende mukupinga ghuparo ghokuroruheya?'' ²⁶ Jesusi ghaghambire kukwendi,''Nye hatjanga mumuragh? Ngepi di waghutoya?'' ²⁷ Ghatapire dihuthero no kughamba, ''Mwakona kuhaka Fumu Nymbi wenu no mutjima wenu ghoghuheya, no mudhimu ghoghuhe, no mangcamu ghomahe, no maghano ghenu ghomahe, namukamaparaghumbo henu thika mwathinda.'' ²⁸ Jesusi ghaghambire kukwendi,''Ghuna hutha thiwana. Tende yinu yi, no nanyi wakupare.'' ²⁹ Ene ye, kuhaka kukushupera thinda, ghaghambire kwaJesusi, ''Dye muka maparaghumbo ?'' ³⁰ Jesusi ghamuhuthire ye no kughamba,''Katughuru ghumwe ghayendire kutunda muJerusalema ghayende kuJericho. Ghawerere mwawatjori, awa hamukungure yinu yendi, no hamupumure, no hamuthighire pakatji kokufa. ³¹ Paruvedhe mupristeri ghumweya ghaghurumukire dhodhiya ndhira, nopa ghamumonine, ghapitire ndhira dhimweya mutara ghumwe. ³² Ghakupitura naLevite naye, apa gheyire kudyango no kumumona ye, ghapitire ndhira dhimweya. ³³ Ene ghumwe mukaSamaritan, oku yene muruyendo, gheyire kughakarire. Apa ghamumonine, ghayendire no dikuto. ³⁴ Ghakumine kwendi no ghadhingune yitombo yendi,no ghayinotwere maghadhi no vinyu papaya. Ghamuturire pathiyama thendi thinda, noghamuretire yodiye, no kumupakera thinga yodiye. ³⁵ Diyuwa dyokurandako ghashimbiremawadi madenarii, no ghaghatapire kwamutamburi, nokughamba,'Mupakere thinga yu, no keheyino yokuwedhera kutapa, apa nakahuka, nanyi nakuna kufute.' ³⁶ Yidye ghopowa hahatu ghuna kughayara ghakarire mukamaparaghumbo kukwendi oyu ghakarire mukatji kawatjori?'' ³⁷ Ghaghambire,''Oyu ghana moneka thineke kukwendi.'' Jesusi ghaghambire kukwendi,''Yende ghukatende yinu yofotji.'' ³⁸ Oku wo ne muruyendo pofotji, hengenine mumukunda ghumwe, no mbuyama ghumwe gho dina Martha ghamutambure ye mundhugho dhendi. ³⁹ Ghakarire na minendi ghodina Maria, oyu ghahungumane kumaghuru ghaFumu no ghayuvire nando dhendi. ⁴⁰ Ene Martha ghakarire no yirughana yo kuroghitha mukutapa yidya. Gheyire kate kwaJesusi no kughamba,''Fumu, kadi wakukudhekera eshi mukurwange nathighi me no kuna tapa pithange? Podiyo mumutongwere nanighamwene.'' ⁴¹ Ene Fumu ghamuhuthire no kughamba, ''Martha, Martha,ghunapata no kuna kukupetha yinu yoyingi, ⁴² ene thinu thofotji tharoyera. Maria ghatorora eyi yamuroghera, eyi kadi hakuyishimba kukwendi ye.''