¹ Podiyo Mukandi gho Mayondawero Ghuroto wakokere, oghu hana kwitha eshi Pasika. ² Mukuru waprisiteri nawa kamarukwaro hakuvurekire ngepi edi hakutura Jesusi mukufa, awohayapire hanu. ³ Podiyo Shatani ghengenine mwaJudas Iscariot, oyughakarire ghofotji ghopowa dikumi nohawadi. ⁴ Judas ghayendire kwa mukuru waprisiteri no hakuru no kakuvureka nagho ngepi edi hakuheta Jesusi kukwagho. ⁵ Hahafire no hatawire kutapa masherenyi. ⁶ Ghashanine no kukenga kambenene mukamutapa ye kukwagho kutunda mumbunga. ⁷ Dyeyire diyuwa dyo ghuroto, diyuwa dyoPasika ndjwi muyambo. ⁸ Podiyo Jesusi ghatumine Peter na Johannes, ghughamba, ''Yende no karoyithe Pasika murarero, podiyo tu kadye.'' ⁹ Haghambire kukwendi, ''Kupi ku ghuna shana shotukaroyithere?'' ¹⁰ Ghawahuthire, ''Kenge, apa muna ngeni mudoropa, katughuru ghana kwaterera dikandina dyo meyu nanyi mumuwane mwe. Mukamukuthe kate kudighumbo kushakangene. ¹¹ No mukaghambe kwathinda shadighumbo, 'Muhongi ghana ghamba kukoye, ''Kupi ngonda dhawagenda, oku sho nidyere Pasika nawaka thishongero?''' ¹² Nanyi gha kumuneghedhe ghukuru gho ngonda dhi haroyitha. Mukatende maroyithero kokuya.'' ¹³ Podiyo hayendire, no hakawanine yoyihe thika di ghayighambire kukwagho. Podiyo hakaroyithire yo murarero ghoPasika. ¹⁴ Apa rweyire ruvedhe,ghahungumane nawa apositoli. ¹⁵ Podiyo ghaghambire kukwagho, ''Ame nahimi kukuma kudya yino Pasika nenu kughutho gho kunyanda. ¹⁶ Ame nakughamba kukwenu, Ame kadi nakudya karo kate kuyikumithamo mughufumu waNyambi.'' ¹⁷ Podiyo Jesusi ghashimbire kopi, no apa ghatapire ndangi, ghaghambire, ''Mushimbe thi, no mukutapere mukatji kenu mwathinda. ¹⁸ Ame nakughamba kukwenu, Ame kadi nakunwa kumbuyo dho vinyu kate ghufumu waNyambi wakwiye.''' ¹⁹ Podiyo hashimbire ghuroto, no paghamanine kutapa ndangi, ghaghuyondore, no ghaghutapire kukwagho, ghghamba, ''Eyi ne yirama yange, eyi nakutapa kukwenu. Mutendange yi mumavurukero ghange me.'' ²⁰ Ghashimbire kopi mundhira dhofotji pakupwa murarero, ghughamba, ''Oyu kopi ne thothineghedhitho thothipya mumanyinga ghange, agha ghakunotoka mumwenu. ²¹ Ene mukare muna tegherera. Oyughakuniheta me ne nendi nidi kutishi. ²² MwaMwana Munu nanyi ghakuyende thikadighayihima. Ene ghupata koya katughuru kupitera moyu ghamuheta!'' ²³ Hatangire kukuvureka mukatji kagho eshi dye mukatji kagho oyu ghakutenda yinu yi. ²⁴ Podiyo patamekire dikanyi mukatji kawo eshingo dye oyu sho ghakare mukuru. ²⁵ Ghaghambire kukwagho, ''Hafumu wawaGentile ne hakuru papawo, noyu ghakara no muragho pakatji kagho ne awa harughananga ghuwa ko hanu wawo. ²⁶ Ene kadi yakukare kenge nenu. Ene, muninge oyu ghomukuru mukatji kenu ghakare yodiye mwanuke,no muninge oyu gho mudyo ghakare oyu ghana tapanga. ²⁷ Oyu gho mukuru, oyu gho kuhungumana kutishi, endiyu gho kurughanena? Endi kadi yu ghana hungumana kutishi? Ene amene mukatji kenu nidi mwe muna kurughanena. ²⁸ Ene yamwe mwakutwikera nange mumayereko ghange. ²⁹ Nakumupa ghufumu, ngambi kenge Tate ghatapire ghufumu kukwange, ³⁰ eshi amwe mwakudye no kunwa kutishi wange mughufumu wange, nonanyi mwakuhungumane kuthipura ghutheka marughi dikumi no mawadi ghawa Israel. ³¹ ''Simon, Simon, takamithe, Shatani ghana shana ghakushimbe we, ghana shana ghakutjipe yira mavumbukiro. ³² Ene nakuraperera we, eshi matawero ghoyekadi ghawe. Kunyima apa wahukire munyima karo, tanarithe hakuroye.'' ³³ Peter ghaghambire kukwendi, ''Ame nakuroyithera mukuyenda noye kokuhe mudorongo no mukufa.'' ³⁴ Jesusi ghamuhuthire, ''nakukutongwera, Peter, ngondovoro kadi shoghadire dyarero, kughutho ghuna nikanana ruhatu eshi wanidimuka.'' ³⁵ Podiyo Jesusi ghaghambirekukwagho, ''Apa namutumanga panunda mwapira ndjato, ndjato dho maghamweno, endi makuha, mwanyandire keheyino?'' Hahuthire, ''Kadiko.'' ³⁶ Podiyo ghaghambire kukwagho, ''Ene pano, oyu ghadi no ndjato, ninge ghakashimbe, no ndjato dho maghamweno. Keheyuno ghanapiri thimende ghakona kughuritha viri dhendi no kaghura thofotji. ³⁷ Ame nakughamba kukwenu, eyi hatjanga kuhatera me yakona kukuma mo, 'Hamutarire nowa hokupira muragho.' Eyi hathinganyekere kuhatera me ne kuna kuyikumithamo.'' ³⁸ Podiyo haghambire, ''Fumu, kenge! Yino ne yimende yiwadi.'' Ghaghambire kukwagho, ''yina rikanya.'' ³⁹ Jesusi ghayendire, thikadi ngayitendanga, kudirundu dyaOlive, no hakathishongero hamukuthire. ⁴⁰ Apahakakumine, ghaghambire kukwagho, ''Muraperere eshi kadi mwakungene mumayerekero.'' ⁴¹ Ghawatundire ghure ghokuvukuma diwe, no ghatongamene no kuraperera, ⁴² ghughamba, ''Tate, ngeshighuna himi, tundutheko kopi yu kukwange. Ngambi kenge eshi kadi mahimeno ghange, ene ghoye ghatende.'' ⁴³ Podiyo mu engeli kutundera mudiwiru ghamonekire kukwendi, ghumutanaritha ye. ⁴⁴ Kukara mukunyanda, gharapere thikuma, no diyuywa dyendi dyakarire yira kundoka ko manyinga ghana kuwa pamuve. ⁴⁵ Apa ghamanine kutunda mumandapero, gheyire kwawakathishongero no kuna wawana shime hararera pamurandu ghokukasha ⁴⁶ no ghawepure, ''Nye muna kurarera? Mupinduke no kuraperera, eshi kadimungene mumayerekero.'' ⁴⁷ Oku shime kuna kughamba, kenge, mbunga dhamonekire, naJudas, ghofotji ghopowa dikumi nohawadi, kuna kuwapiteritha. Gheyire pepi na Jesusi no kuna muncumita, ⁴⁸ ene Jesusi ghaghambire kukwendi, ''Judas kuna kunyandeka Mwana Munu no kumuncumita?'' ⁴⁹ Apa wa hakarirepo hamonine Jesusi eyi yahokokire, haghambire, ''Fumu, tuwamwashure no makatana ndi?'' ⁵⁰ Podiyo ghofotji ghopapawo gha mwashure mupika wamupristeri shokuru, no kumuteta ditwi dyendi dyorudyo. ⁵¹ Jesusi ghaghambire, ''Oyo ne yina rikanya!'' Ghakwatire ditwi dyendi, no ghamwirure. ⁵² Jesusi ghaghambire kwamupristeri shokuru, kwawakuru ho tembeli, nokwawakuru awa hakarire hana mwimanganyena, ''Amwe kwiya no kwimanganyena yira mwidhi, no maghonga no yingandekitha? ⁵³ Apa nakarire nenu mayuwa gho mahemutembeli, kadi mwaturire manyara ghenu papange. Ene dhino ne dhhoviri dhenu, no mangcamu gho dikokore.'' ⁵⁴ Ghumwimeka ye, hamutwarire no kumureta kudighumbo dyamupristeri shokuru. Ene Peter ghamukuthire kokayenda. ⁵⁵ Apa hamanine kukonera mudiro mukatji komukunda no hahungumanine, Peter ghahungumanine mukatji kagho. ⁵⁶ Ghumwe mbuyama gho mupika ghamumonine oku ghana hungumana muthishe tho mudiro no ghakengire ghumughororoka no kughamba, ''Oyu katughuru naye nendi ghana kara.'' ⁵⁷ Ene Peter ghakanane yi, ghughamba, ''Mbuyama, kadi namudimuka yo me.'' ⁵⁸ Kapupi kamanana ghumweya naye ghamumonine, no ghaghambire, ''Nowe ghofotji gho papagho.'' Ene Peter ghaghambire, ''Katughuru, kadi name.'' ⁵⁹ Kunyima dho viri katughuru ghumwe ghathinenekire no ghaghambire, ''Ghushemwa oyu katughuru naye nendighana kara, aye ne muka Galileya.'' ⁶⁰ Ene Peter ghaghambire, ''Katughuru, kadi nadimuka eyi ghuna kughamba.'' Popo, oku yene pakughamba, ngondovoro gheyire. ⁶¹ Ghuthetuka, Fumu ghakengire Peter, naPeter ghavurukire nando dhaFumu, apa ghaghambire kukwendii, ''Kughutho gho kwiya ngondovoro dyarero ghuna kunikanana paruhatu.'' ⁶² Peter ghayendire panunda no ghakadirire. ⁶³ Nakatughuru yu gha kungire Jesusi ghamuhekire no kumupumura. ⁶⁴ Hamuturire tho kufika no kumwipura, ghughamba, ''Muporofeti! Dye yu ghana kupumura?'' ⁶⁵ Haghambire yinu yoyingi kwimanganyena Jesusi, no kumushwahura. ⁶⁶ Popo vene padyakarire diyuwa, hakuru wahanu hakonganine pofotji, wahe na hakuru wapristeri nawakamarukwaro. Hamutwarire kumbara ⁶⁷ no kughamba, '''Ngeshi yowe Kristusi, tutongwere.'' Ene ghaghambire kukwagho, ''Ngeshi ni mutongwere, kadi shomutawe, ⁶⁸ no ngeshi ni mwipure, kadi shomunuhuthe. ⁶⁹ Ene kutunda pano, Mwana Munu nanyi ghakuungumane kurudyo rodyoko dyo ngcamu dhaNyambi.'' ⁷⁰ Wahe haghambire, ''podiyo owe gho Mwana Nyambi?'' Jesusi ghaghambire kukwagho, ''Amwe kuna kughamba eshi ame.'' ⁷¹ Haghambire, ''Nye twanyandera mushupi? Atwe twathinda tuna yuvu mukanwa kendithinda.''