¹ Mbunga dhodhihe dhemanine no kureta Jesusi kughutho waPilatusi. ² Hatangire kumurundera, ghughamba, ''Tuna muwana yu katughuru ghana kuyipitha ditunga dyetu, kushweneka kutapa yitapa kwaMuketethi, no kughamba eshi aye yithinda ne Kristusi, fumu.'' ³ Pilatusi ghamwipure, ghughamba, ''Yowe gho Fumu wawaJuda?'' Jesusi ghamuhuthire noghahambire, ''Dyo makughamba kengeyo.'' ⁴ Pilatusi ghaghambire kwa mukuru wapristeri no hohengi, ''Kadi nawana murandu moyu katughuru.'' ⁵ Ene hathinenekire, ghughamba, ''Aye kudhongera hanu, kuhonga muJudeya gho muhe, kutangerera kuGalileya kate kodino dyango.'' ⁶ Podiyo apa ghayuvire Pilatusi yinu yi, ghepure ngeshi yu katughuru ne mukaGalileya. ⁷ Apa ghayiwanine eshi ghakarire mungcamu dhaHerodesi, ghatumine Jesusi kwaHerodesi, aye yithinda ghakarire muJerusalema mogho mayuwa. ⁸ Apa Herodesi ghamonine Jesusi, hakutumere, yoyishi ghashanine mukumumona kare. Aye ghayuvire kuhatera ye o gha himine kumona yitetukitha yi ngatendanga ye. ⁹ Herodesi ghepurire Jesusi no manando gho mengi, ene Jesusi kadiko yi ghamuhuthire. ¹⁰ Mukuru wawaprisiteri ghemanine, mughupata no kumurundera. ¹¹ Herodesi nohakayita wendi hatukire Jesusi no hamuhekire. No hamuvatekire muyitere no kumutuma kwaPilatusi. ¹² Herodesi na Pilatusi hakarire hakaghuyendha kutunda diya diyuwa, kunyima hakarire hakaghukore. ¹³ Pilatusi podiyoghethire pofotji hakuru waprisiteri no hapiterithi no mbunga dhawanu ¹⁴ no kughamba kukwagho, ''Muna ni retera yu katughuru oyu ghakupiteritha mbunga dhikare mughumango, no mukenge, ame, apa namwipura kughutho wenu, kadi nawana ghuyi moyu katughuru kuhatera yinu yi muna kumurundera ye. ¹⁵ Ka, endi naye Herodesi, podiyo ghana kamutumena kukwetu, no mukenge, kadiko eyi yapita yifa eyi gha rughana yu katughuru. ¹⁶ Nanyi ni mu humbithe no kumuthiya.'' ¹⁷ Pano Pilatusi ghashanine kuwashwaghithera ha Juda mukadorongo ghofotji pamukandi. ¹⁸ Ene wahe hadirire pofotji, ghughamba, ''Ghatushwaghe yu katughuru, no yushwayithere Barabbasi!'' ¹⁹ Barabbasi ghakarire katughuru oyu haturire mudorongo pamurandu ghoharura yo mudoropa no ghupayi. ²⁰ Pilatusi ghawatongwere karo, nahaka kushwayitha Jesusi. ²¹ Ene hakuyere, ghughamba, ''Mumupamarere, mumupamarere.'' ²² Ghayighambire karo paruhatu, ''Nye, nye yoyimango eyi ghatenda? Kadiko yi nawana eyi yoroghera kumupagha aye. Podiyo munyima dho kumuhumbitha nanyi ni mushwayithe.'' ²³ Ene hathinenekire no maywi gho makuru, ghushana aye hamupamarere. Maywi ghawo ghangerekire Pilatusi. ²⁴ Podiyo Pilatusi mukutenda yihima yawo. ²⁵ Ghashwayithire oyu harombire oyu ghakarira mudorongo pakutenda ghumango no kupagha. Ene gha tapire Jesusi mumahimeno ghawo. ²⁶ Oku pakumutwara mundhira dhendi, hemekire Simoni waCyrene, kutunderera muditunga, nohaturire thikurushe thendi papendi ghathidhamune, ghukutha Jesusi. ²⁷ Mbunga dhodhikuru dhawanu, no dhawambuyama hakashire no hadirire ye, no hamukuthire ye. ²⁸ Ene kuhuka kukwagho, Jesusi ghaghambire, ''Mwahana wa Jerusalema, mwadira me, ene mukudire mwathinda no haanenu. ²⁹ Mumone, mayuwa ne kuna kwiya omu mbohaghamba, 'Hatungeki na wa hadhira kureta no mara ghokudhira kureta, no mere agha ghadhira kuyamweka.' ³⁰ No nanyi hakutange kughamba kumandundu, 'We papetu,' no kuyighuru, 'tufike twe.' ³¹ Ngeshi kuyitenda yi oku thitondo ne shime thina mahako, nye yakuhokoka ngeshi tho thina kukuta?'' ³² Hamwe hanu, hamatjotji hawadi, ghawatwarire nendi mukawapagha. ³³ Apa hana kumine kudyango edi hana kwitha eshi ''Dikorongongi,'' okuya hawapamarere nendi nohamatjotji- ghofotji kurudyo rwendi no ghumweya kurumoho rwendi. ³⁴ Jesusi ghaghambire, ''Tate, wathigherere, kadi hana dimuka eyi hana kutenda.'' Podiyo hamuvukumine, no kudjadjaghura yivata yendi. ³⁵ Hanu hemanine ghurorera hapiterithi okukuna kumuheka ye, ghughamba, ''Gha parithire hamwe. Mumuthiye ghakuparithe thinda, ngeshi yodiye Kristusi waNyambi, oyu ghatorora.'' ³⁶ Hakayita nawohamupumure ye, ghumuwana, kumuwethera mungwa, ³⁷ nokughamba, ''Ngeshi yowe Fumu wawaJuda, kuparithe ghothinda.'' ³⁸ Thakarire karo thidimukitho papendi, ''Oyu ne yoFumu wawaJuda.'' ³⁹ Ghofotji ghopowa matjotji oyu ghandhendhere ghamutukire ghughamba, ''Kadi yowe Kristusi? Kuparithe ghothinda natwe.'' ⁴⁰ Ene humwe ghamushenekire, ghughamba, ''Kadi wayapa Nyambi, oku mwe mwahe muthighamba thofotji mudi? ⁴¹ Atwe ne tudi pano kamanana, atwe kuna kuwana eyi yaturoghera kuyirughana yetu. Ene yu katughuru kadiko yi ghana tendi yoyimango.''' ⁴² Podiyo ghaghambire, ''Jesusi,wakunivuruke apa wakwiya ghufumu ghoye.'' ⁴³ Jesusi ghaghambire kukwendi, ''Ghushemwa nakukutongwera we, dyarero nanyi ghukare nage muparadisa.'' ⁴⁴ Yakarire yira viri dhoghukwoko nodhofotji, no makokore gheyire pamuve ghoghuhe kate viri dhoghukwoko no ghune ⁴⁵ apa thishe thodiyuwa thawire. Podiyo makehe gho tembeli ghadjadjukire paruwadi. ⁴⁶ Kudira no diywi dyodikuru, Jesusi ghaghambire, ''Tate, mumoko ghoye natapa mupepo wange.'' Apa ghayighambire yi, gha fire. ⁴⁷ Apa hanu hamonine eyi hatendire, gha tumere Nyambi, ghughamba , ''Ghushemwa oyu ne katughuru ghomuhunga.'' ⁴⁸ Apa mbunga dhoghihe dhakonganine mukushupa yimona eyi hatendire, hahukuire ghupumura mere ghawo. ⁴⁹ Ene wahe wa hamudimukire, nahambuyama wahamukuthire kutunda muGalileya, hemanine kokayenda, ghurorera yinu yi. ⁵⁰ Mukenge, pwadi katughuru gho dina dyo Joseph, oyu ghakarire muhati gho mbunga. Ghakarire katughuru gho muwa no ghomuhunga. ⁵¹ Oyu katughuru kadi ghatawire yitokora yombunga no yitenda yawo. Aye kwatundere kuJudeya mudoropa dha Arimathea, no ghashanine ghufumu wa Nyambi. ⁵² Oyu katughuru, kukokera kwaPilatusi, hepurire yirama yaJesusi. ⁵³ Ghayitwarire pamuve, no kuyidhingera mudikehe dyodirereya, no ghakayiturire mumbira edhi hatetire diwe, oku kwakarireeshikadiko ghumwe oyu havumbeka ko. ⁵⁴ Dyakarire Diyuwa dyo Makuroyithero, no diyuwa dyoMapeghu dyakarire pepi matangero ghadyo. ⁵⁵ Hambuyama awa heyire naJesusi kutunda muGalileya hakuthire no kamonambira no ngepiedi hayirangekire yirama yendi. ⁵⁶ Hakahukire no kunaroyitha maghadhi. Podiyo muMapeghu haturumuthire kukutha kumarawero.