¹ Jesusi ghakengire kuwiru no kumonahanu hohatungi awa haturire yitapera yawo mothokutura. ² Ghamonine mbuyama yu ghafitha mukafumu wendi ghomuhepwe ghatapire tuwaditumbumburu. ³ Podiyo ghaghambire, ''Ghushemwa nakumutongwera mwe, oyu mbuyama gho muhepwe ghana tura kupitakana waheya. ⁴ Wahe wa kuna tapa kutunderera kughutungiwagho. Ene yu mbuyama, kutunda mughuhepwe wendi, ghanatura yoyihe yighakarire nayo kutunga pano.'' ⁵ Shika hamwe haghambire kutembeli, ngepi di hadhiyengire no mawe ghomawa no kutapa, gha ghambire, ⁶ ''Poyi yinu yi muna kumona, mayuwa nanyi ghakwiye okudiwe dyofotji nanyi ghakuthithiye kwaghumwe edi ghakudhira kudjovora pamuve.'' ⁷ Podiyo hamwipure ye, ghughamba, ''Muhongi, nako munye yahokokire yinu yi? Thineghedhitho munye thakukara apa yakuhokoka yinu yi?'' ⁸ Jesusi ghawahuthire, ''Mutakamithe eshi kadi hamuhongaghure. Hengi hakwiya mudina dyange, ghughamba, ame yodiye, 'Ruvedhe ne pepi ghudi.' Mwakuwa kutha hanu wo. ⁹ Apa mwakuyuva yita no marwanamvo, no kadimwakuyape, eyi yinu yakona kuhokoka pakutanga, ene ghuhura kadiwakuhokoka popo.'' ¹⁰ Podiyo ghaghambire kukwagho, ''Matunga nanyi ghaku kwimanganyene no matunga ghamwe, no ghufumu no ghufumu. ¹¹ Nanyi kwakukare kututuma muvekokukuru, nomumango ghakukara no mburundu. Nanyi yakukare yihokoka yo kuyapitha no yineghedhitha kutunda mudiwiru. ¹² Ene kughutho ghoyi yinu, nanyighakuture manyara papenu mukuna mutheka mwe, mukumushutura mumasynagogue no madorongo, mukumureta kughutho wamafumu no nunguru yoyishi pamurandu gho dina dyange. ¹³ Nanyi yakukutware kumaghuwa gho matongwenena. ¹⁴ Podiyo mukoshonone mumitjima dhenu kadi mukukuroyithera mukukukandana kughutho gho ruvedhe, ¹⁵ nanyi nakumupe manando no ghudimuki no kadi wakukona kushwena endi kukudhina. ¹⁶ Ene nanyi ghakumushuture nawa kuru, hakurwenu, hapenu, no hayendhenu, no nayi hakuture mwamweya mukufa. ¹⁷ Nanyi hakumunyenge kehewanopamurandu gho dina dyange. ¹⁸ Ene kadiko kahuki kokumutwi wenu kakuyongara. ¹⁹ Mumakutureromo ghenu nanyi mwakuwane mudhimu wenu. ²⁰ ''Apa mwakumona Jerusalema ghana mudhingumwetedha hakayita, mwakona kudimuka eshi mahanyawero ne pepi ghadi. ²¹ Mwakona kutawedhera awa hadi muJudeya mukutjirera mumarundu, muninge awa hadi mumadoropa hatundemo, nowa hadi panunda dhoditunga kadi hangene mudoropa dhi. ²² Agha ne gho mayuwa ghorunyando, podiyo eshi yoyihe eyi hatjanga yikumenemo. ²³ Ghupata kowa hadimudira no kowa hana kuyamweka mogho mayuwa! Awo nanyi hakukare noyikudhekera pakaye, no ghupata kowa hanu. ²⁴ Nanyi hakuwere kughuhura gho thimende, no nanyi ghakuwapiterithe munwato mumatunga gho mahe, na Jerusalema nanyi ghakututume kwawa Gentile kate ruvedhe rwaGenitel hakurukumithemo. ²⁵ ''Nanyikwakukare yineghedhitha kudiyuwa, mukaghonda, no kumatungwedh, no pakaye. Matunga nanyi ghakukare muyikudhekera, ghupata pamurandu gho kupuka ko dikuruviya no mangumbi. ²⁶ Nanyi hakukare hanu hana kupwerera kutunda kuwoma no kuyitaterera kuyinu yi yina kwiya mukaye. Mangcamu gho diwiru ne nanyi ghakughanyunge. ²⁷ Podiyo nanyi hakumone Mwana Munu ghana kwiya mumavuyi no ngcamu no ghukuru gho ngcamu. ²⁸ Ene apa yi yinu yakutanga kuhokoka, mwakwimane no kuyeyuraa dhimutwi dhenu, yoyishi mashutwero ghenu ne kuna kwiya pepi.'' ²⁹ Jesusi ghawatongwere dithaghano, ''Mukenge kuthitondo thoghukuyu, no yitondo yoyihe. ³⁰ Apa yina yunukanga mayura, kuyimona mwathinda no kudimuka eshi ditenya ne pepi didi. ³¹ Napo karo, apa mwakumona yi yinu yina kuhokoka, mwakona kudimuka eshi ghufumu waNyambi ne pepi ghudi. ³² Ghushemwa nakumutongwera mwe, ghuno muhoko kadi wakufa kate yoyihe yi yinu yakuhokoke. ³³ Diwiru no kaye nanyi yakupwe, ene manando ghange kadi ghakufa ngambi ngepi. ³⁴ "Ane mwakona kukutegherera mwathinda, podiyo mitjima dhenu kadi dhina remupa pamurandu gho kuna kupitakana endi yikudhekera yo yipara, no diyuwa dyo kadi dyakuyandhera mwe popo yira thiraha. ³⁵ Adyo nanyi dyakwiye kwakeheyuno ghana kupara kurupara rokaye kokahe. ³⁶ Ene mwakona kukara muna taterera kehe ruvedhe, kuraperera podiyo mwakukare munatanara mukuhenduka yinu yoyihe yi yakuhokoka, no kwimana kughutho waMwana Munu.'' ³⁷ Podiyo mogho mayuwa ghahongire mutembeli, no paghuthiku ghayendire panunda no ghakakrire kudirundu dya Olive. ³⁸ Wahe hanu heyire mathikuthiku mukuna muyuva mutembeli.