¹ Pogha ghambire ditadhi nawo eshi ngo ngepi edi haroghera kuraperera nombadi hakuyongarithe matjokedhero, ² ghughamba eshi, ''Mumbara dhimweya mwakarire mupanguri oyu gha pirire kuyapa Nyambi no mbadi gha kutekerire hanu. ³ Mwakarire mudidhi mumbara dhi, aye ngeyanga kukwendi kehe pano, ghughamba, 'Ni ghamwene niwane mashutukero kwawaka nore dhange.' ⁴ Munako dhodhire mbadi gha himine kumughamwena, ene paruvedhe rumwe gha kutongwere thinda eshi, 'Ngambi kenge eshi mbadi nayapa Nyambi endi kukutera hanu, ⁵ ene yoyishi oyu mudidhi ne kuna kuni tjukumitha, nanyi ni mughamwene ghawane mashutukero, podigho eshi mbadi ghani ghayithe kehe pano noyinu yofotji.''' ⁶ Pogha ghambire Fumu eshi, ''Mutegherere eyi ghana kughamba mupanguri gho kupira thinga. ⁷ Kenge Nyambi naye mbadi mbo gha kareta mashutukero kwawa ghatorora awa hamudirera ghuthiku no mutenya ndi? Nanyi mbo gha dhiyame kuwahuthera ndi? ⁸ Kuna kumu tongwera eshi ghana kuwapa mashutukero pawangu-wangu. Kenge, apa gha kwiya Mwana Munu, nanyi gha kuna wane shime matawero pamuve ndi?'' ⁹ Pogha ghambire ditadhi dino kwawamwe awa ha tawire hathinda eshi awo ne hakushuki no ha nyathire hanu hamwe, ¹⁰ '''Ha tutughuru hawadi hayendire mutembeli haka raperere-ghumwe muFarasayi no ghumwe ne muka kukongawedha mutero. ¹¹ MuFarasayi ghemanine no kuraperera yino yinu kuhatera kwathinda, ''Nyambi, na kutumera eshi amene mbadi yira hanu hamwe-hakawidhi, hakakupira ghukushuki, hakarungu-endi yira kenge yuno muka kukongawedha mutero. ¹² Ame kudhirerekedha ruwadi muthivike. Ame kutapa thofotji kudikumi kukehe yi nawananga.' ¹³ Ene muka kukongawedha mutero, ghemanine kokure, mbadi gha konine karo kuyeyura meho ghendi kudiwiru, ene ghakwatire pamuyidi wendi, ghughamba eshi. 'Nyambi, nifere neke me nothiharuri.' ¹⁴ Kuna kumutongwera, katughuru yu gha hukire kudighumbo dyendi nomashutukero kupitakana muyendhendi, yiyishi kehe yuno gho kukuyeyura thinda mbo hana mumbirupitha, ene kwakehe yu gho kukumbirupitha thinda mbo hana muyeyura.'' ¹⁵ Hanu hamureterangire karo hanawo podigho eshi ghawa kwate, ene apa ha yimonine haka thishongero wendi, hawa shwenekire. ¹⁶ Ene Jesusi ghethire hanuke wa kukwendi, ghughamba eshi, ''Mutawedhere hanuke hohambiru heye kukwange, nomwawa shweneka. GhuFumu waNyambi kwagho haghutoyedhera. ¹⁷ Ghushemwa na kumu tongwera, kehe yu gha kupira kuwana ghuFumu waNyambi yira mwanuke mbadi gha kughungena.'' ¹⁸ Muraghuri ghumwe ghamwipurire eshi, ''Muhongi ghomuwa, Yinu munye shoni kone kutenda na shore yipara yororuheya?'' ¹⁹ Jesusi ghamu huthire eshi, ''Pashanye ghuna kunithera eshi no muwa? Mbadiko ghomuwa, shimengwa Nyambi thinda. ²⁰ Mwadimuka miragho-wahondera, wapagha, wedha, waghamba ghumbango, kutekere wiho nanyoko.'' ²¹ Muraghuri ghaghambire, ''Yoyihe yi yinu na yi kuthanga kutunda kuwanuke wange.'' ²² Apa gha yiyuvire Jesusi, gha mutongwerire eshi, ''Thinu thofotji ethi thina kupumbwa. Wakona kughuritha yoyihe eyi wakara nayo no kuyitapera kwawahepwe, no mbo ghuna ka wana maghuwa mudiwiru-no wiye noni kuthe.'' ²³ Ene apa gha yiyuvire muraghuri yi, gha kashire thikuma, yoyishi aye gha karire mutungi thikuma. ²⁴ Munyima Jesusi, kumumona edi ghana kasha ghaghambire eshi, ''Ghukukutu kwawa tungi kungena mughuFumu waNyambi! ²⁵ Ayo ne ghuredhu kwangameno kungena mudiho dyothonga, kupitakana mutungi gha ka ngene mughFumu waNyambi.'' ²⁶ Awa hayiyuvire haghambire, ''Yidye keho ghokupwa kughamwena?'' ²⁷ Jesusi ghawahuthire eshi, ''Yinu eyi yakara ghukukutu kwamunu ghuredhu kwaNyambi.'' ²⁸ Peturusi ghaghambire eshi, ''Thiwana, atwe twa thigha yinu yetu yoyihe no tuna kukukutha.'' ²⁹ Pogha ghambire Jesusi kukwagho, ''Ghushemwa na kumutongwera mbadiko oyu ghana thighi ndhugho, endi munuwendi, endi hakurwendi endi haminendi, endi hakuruwendi, endi hanendi pamurandu ghoghuFumu waNyambi, ³⁰ oyu gha kupira kwana yinu yoyingi muno mukaye, nomukaye aka kakwiya, moyo ghororuheya.'' ³¹ Apa ghamanine kukongawedha hadikumi nohawadi kukwendi, ghaghambire kukwagho, ''Mukenge, atwe kuna kuyenda kuJerusalema, no yoyihe eyi hatjanga haporofeta kuhatera kwaMwana Munu yina kakuyaritha. ³² Aye mbo hana kamutapa kwawa hayidena, nombohana musherera, nokumufitha honyi, no kumuthipera. ³³ Apa ha kumana kumumwashura, nanyi ha kumupaghe, ene mudiyuwa dyoghuhatu ne mbaghana kavumbuka karo.'' ³⁴ Mbadiko ethi hatjwathanine poyi yinu, no dhi edhi nando hadhihoreka kukwagho, nombadi ha tjwathanine yinu eyi gha ghambire. ³⁵ Yahokokire eshi, oku Jesusi pakukokera muJericho, katughuru ghumwe ghomukunga gha hungumanine kumbadi dhondhira ghukumbera, ³⁶ no ghuyuva dikuta dyohanu dina kupita, ghepurire eshi nye yina kuhokoka. ³⁷ Ha mu tongweghere eshi Jesusi mukaNazareth ghana kupita. ³⁸ Mukunga yu podigho keho gha kuyere eshi, ''Yesusi, mwana David, nifere neke.'' ³⁹ Awa ha karire kughutho dhodikuta di hashingire mukunga yu, ghumutongwera eshi gha porere. Ene ye ko kukuyera kwendi karo thikuma eshi, ''Mwana David, ni fere neke.'' ⁴⁰ Jesusi ko kwimana kwendi nokurawera eshi ha mu retere mukunga yu. Pakukokera popepi mukunga, Yesusi gha mwipure eshi, ⁴¹ ''Nye wa kushana ni kutendere?'' Ko kughamba eshi, ''Fumu, na shana kumona,'' ⁴² Jesusi ko kughamba eshi, '' Wane merukithero ghoye. Matawero ghoye ghana kwirura.'' ⁴³ Wangu-wangu mukunga gha monine no gha kuthire Yesusi, ghukugha Nyambi. Hanu wahe ha shoyerere Nyambi pakumona thihokoka thi.