¹ Jesusi ghengene no gha pitire muJericho. ² Mwa karire katughuru ghodina Zacchaeus. Gha karire mukuru wawaketethi no gha karire mutungi. ³ Gha kondjire kumona eshi dye napo Jesusi, ene mbadi gha konine kumona mudifwa, yoyishi mufupi. ⁴ Podiyo keho gha dhondokire kughutho no ka dhina kuthitondoto gha ka mu mone, yoyishi dho ndhira gha tambire Jesusi. ⁵ Apa gha ka kumine po Jesusi, gha kengire kuwiru no gha ghambire eshi, Zacchaeus, shuruke popano, yoyishi dyarero na kona ka kara mudighumbo dyoye. ⁶ Ko kushuruka kwendi wangu-wangu noghamutamburire ghushamberera. ⁷ Apa ha yi monine yi, wahe ko kunyeghenya kwawo, ghughamba eshi, ''Jesusi ghana piti mudighumbo dyothiharuri gha ka dhingure.'' ⁸ Zacchaeus kokwimana no kughamba kwaJesusi eshi, ''Mone, Jeususi, dihenda dyo yiwana yange yoyihe nina kutapa kwawahepwe, no ngeshi nedha ko keheyu thinu, mbona ruwera rune mukuhutha kehe yi na shimba ko kehe munu.'' ⁹ Jesusi gha ghambire eshi, ''Dyarero makomwenone gha neya mudighumbo dino, yoyishi nowe ghomwana Abraham.'' ¹⁰ Yoyishi Mwana Munu gheya mukunashana nokuna komonona hanu wa hayongara.'' ¹¹ Oku awo pakuyuva yoyihe yi, gha twarire kughutho no kuwatongwera ditadhi, yoyishi gha karire pepi naJerusalem, no ha ghayarire wo eshi ghufumu waNyambi ne tamba ghumoneke wangu-wangu. ¹² Podigho keho gha ghambire eshi, '' Pakarire katughuru ghokuhungama yu gha yendire muruyende rokuditunga dyokayenda ghana kushanene thinda ghufumu munyima kadya muthighu. ¹³ Ko kwitha kwndi hapika wendi no kuwapa didhimawe nokuwarawera eshi, 'Muyendithe ngeshefa kare pa na ka hukera.' ¹⁴ ''Ene hakaditunga dyendi hamunyengire no ha mu tumene hakareripo wawo, ghughamba eshi, 'Mbadi sho gha tu raghure yu katughuru.' ¹⁵ Yahokokire eshi ghana ka huka karo, noghufumu, no gha rawere hapika wa gha pire didhimawe heye kukwendi, podiyo eshi gha dimuke yiwana mo yomungeshefa. ¹⁶ Mupika ghokutanga ko kwiya kwendi, ghughamba eshi, 'Jesusi, didhimawe dyenu ne nga ni diwedherera mumuyendero ghodikumi.' ¹⁷ ''Katughuru ghomuhungami yu gha ghambire kukwendi eshi, 'Ghuhunga, mupika ghomuwa. yoyishi ghuna kara ghutawedhi muyoyipu, mbo ghuna kara keho nongcamu dhokuraghura mumambara dikumi.' ¹⁸ Mupika ghoghuwadi ko kwiya, ghughamba eshi, 'Didhimawe dyenu ne, dina kwerukura muyikokwo.' ¹⁹ ''Katughuru ghokuhungama yu gha mu huthere eshi, 'Owene raghure mambara makokwo.' ²⁰ Mupika ghumwe ko kwiya ghughamba eshi, 'Jesusi, didhimawe dyenu ne dino, na di horekire pakakehe, ²¹ na kuyapire, yoyishi owene kughamba thikuma, wa kara yira ghomunu ghokukesha mu wa pira kukuna. ²² ''Muraghuri shokuru gha mutongwerire eshi, 'Mumanando ghoye ghothinda nanyi ni kupangure, owe gho murughani gho mukarakathi. Wadimukire eshi amene nomunu gho kushana yinu yihokoke dyodi nashana, ame ghokushimba eyi napiri kuturamo, ame gho kuyangura eyi napira kukuna. ²³ Munyima eyi wapirire kutura manyinga ghange mumbanga, podigho eshi ngo mukwiya kwange na kuna wane ko ghana kuwedherera?' ²⁴ Katughuru yu gha ghambire kwawa hemanine popepi, 'Mushimbe yo sherenyi ghadi nendi, no mumutape koyu ghadi no masherenyi dikumi.' ²⁵ Hamuhuthire eshi, 'Fumu, ghadi no masherenyi dikumi.' ²⁶ '''Kuna kumu tongwera eshi, kehe yu gha kara nayo nanyi hakumupe yoyingi, ene koyu ghapira kukara nayo, noyi gha kara nayo nanyi mbo ha yi mukungure. ²⁷ Ene wa ha ka nore dhange, awa hadhirire kushana eshi niwa piterithe, muwa rete kuno no muwa paghe kughutho wange.''' ²⁸ Apa gha manine kughaghamba yinu yi, gha twikere kuyenda kuJerusalema. ²⁹ Yakarire kemo eshi apa gha kokere muBethipage naBetani, pandundu edhi ha toya eshi Oliveti, gha tumine haka thishongero wendi hawadi, ³⁰ ghughamba eshi, ''Muyende mumukunda gho kurandako, nanyi muka wane dongighana oyu ha pira kudhina rumweya. Muka mushuture no muka murete kukwange. ³¹ Ngeshi kehe yuno gha ka mwipure eshi, 'Pashanye muna kumushutwera?' muka huthe eshi, 'Fumu ghana kumushana.''' ³² Awa gha tumine hayendire no haka muwanine dongighana thika edi gha yi wa tongwere Jesusi. ³³ Mukumushutura kwawo, hathinda haghambire kukwagho eshi, ''Pashanye muna kumushutwera dongighana?'' ³⁴ Hahuthire eshi, ''Fumu ghana kumushana.'' ³⁵ Haka muretire kwaJesusi, haturire po yishupata yagho padongighana naJesusi ghadhinine po. ³⁶ Apa gha yendire, ha yarire karo yitere yagho pamuve ghapiterepo. ³⁷ Apa gha kokerire padyango apa dyaghurumukera dirundu dyoOLiveri, mbunga dhidhihe dhawaka thishongero hatangire kushogherera no kushogherera Nyambi nomaywi gho kuyeyuka kuyinu yoyikuru eyi hamona, ³⁸ ghughamba eshi, ''Ghapwa kutengeka ne fumu oyu gho kwiya mudina dyaFumu! Thiraro mudiwiru nodifumanekero dyo kuyeyuka!'' ³⁹ HaFarasayi hamwe mumbunga haghambire kukwendi eshi, ''Muhongi, kutunune haka thishongero ghoye.'' ⁴⁰ Jesusi ghawa huthire eshi, ''Kuna kumu tongwera, ngo hana porera ne, gho nanyi gha ni shogherere mawe.'' ⁴¹ Pakukokera Jesusi mumbara, ghadhiferere neke, ⁴² ghughamba eshi, ''Ngo mwa dimuka eshi muno mudiyuwa, ngambi nga yamwe yinu eyi ya kumuretera thiraro! Ene pano ayo ha yihorka kumeho ghenu. ⁴³ Mayuwa ne mbo ghana neya apa ha ka nore dhenu ha kumutendera dikuma kumbadi dhenu no kumudhingumutwedha no kumuthunda kumitara dhodhihe. ⁴⁴ Nanyi mbo hana muwithera pathirambo, pofotji nohanenu. Mbadi mbo ha thiya kehe diwe pawiru dhamuyendhadyo yoyishi mbadi mwa yi nongononine apa gha kondjire Nyambi kumughamwena.'' ⁴⁵ Jesusi ghenengenine mutembeli no gha tangire kuhanyaghura awa ha ghurithire, ⁴⁶ ghuwa tongwera eshi, ''Yapwa kutjanga, 'Ndhugho dhange ne dhugho dho mandapero,' ene muna dhi tendi dho kwidhera yinu.'' ⁴⁷ Podigho Jesusi nga honganga kehe nadiyuwa mutembeli. Mukuru wawaruti nohaka marukwaro nohapietrithi wahanu hashanine kumupagha, ⁴⁸ ene mbadi ha wanine kambenene yoyishi hanu wahe hamu tegherere kukwendi ghudheghetera.