¹ Jesusi gha ghambire kwawaka thishongero wendi, ''Ghushemwa vene eshi mbo pana kara yinu eyi yakutuningitha twakuharure, ene dihudhi koyo munu gha kuyituritha yihokoke! ² Kukara hasha kukwendi ngeshi kumughangerera thinu thothiremu muthingo no ka muvukumena mudikuruviya kupitakana eshi ghaningithe wano hohambiru haharure. ³ Mukukengurure mwathinda. Ngeshi ghumwe ghana harura, kutunune, ngeshi ghana piruka, muthighererepo. ⁴ Ngeshi ghana kuharwera rukandho kwoko noruwadi mudiyuwa, rukondho kwoko noruwadi runa kuhukera, ghughamba eshi, 'Na piruka,' wakona kumuthighererapo.'' ⁵ Ha apostoli haghambire kwaFumu, ''Wedherere matawero ghetu.'' ⁶ Fumu ghawa huthire eshi, ''Ngo mwakara nomatawero yira nanda dho dhimbiru, ngo kukona mughambe kuthitondo, 'Dhuruke, no kakutapeke mudikuruviya,' no mbo thina tendi kemo. ⁷ Ene yidye gho papenu, oyu gha kara nomurughani ghana kupurura endi kuna kukunga ndjwi, gha kughamba nendi apa gha ka shwagha kumapya, 'Wiye wangu nohungumane nodye?' ⁸ Mbadi gha kumuninga eshi, 'Niroyithereko yinu yokudya, no ture muya mumbunda dhoye no ni rughanene kare nimane kudya nokunwa'? ⁹ Mbadi ghana kutumera murughani yoyishi ghana rughana yoyihe eyi ghana raghura, endi ngepi? ¹⁰ Ngambi nga yamwe, ngeshi oku ghuna mana kurughana yoyihe eyi ghana kurawera eshi ghurughane, ghambe eshi, 'Atwene twa rughani ghokupira kufumana. Atwene tuna tendi ngenyu eyi twa roghera kutenda.''' ¹¹ Yakarire kemo apa gha yendire kuJerusalema, ghapitire dhomururani waSamaria naGalileya. ¹² Apa ghengenine mumukunda ghumweya, gha kuwanine nohatutughuru dikumi awa hakarire noyinondwe. Hakarire kayenda nendi ¹³ nohayuyure maywi ghawo ghughamba eshi, ''Fumu Jesusi, tufere neke.'' ¹⁴ Apa ghawa monine, ghawa tongwere eshi, ''Muyende muka kuneghe mwathinda kwawaruti.'' Apa ha kayendire hapwire kwirura. ¹⁵ Apa gha kumonine ghumwe ghopa pawo eshi gheneruka, ghapirukire munyima, nodiywi dyo kuyeyuka gha kuyire Nyambi. ¹⁶ Gha nyongamine kumaghuru ghaJesusi, ghumu tumera. Aye gha karire mukaSamarita. ¹⁷ Pogha ghambire Jesusi eshi, ''Awo dikumi ne mbadi haneruka ndi? Kupi hadi hakwoko nohane? ¹⁸ Mbadiko karo hamwe awa hana piruka no hatumere Nyambi ndi, kushwayithako yu mutundakure?'' ¹⁹ Gha mutongwerire eshi, ''Wimane, ghukayende. Matawero ghoye ghana kwirura.'' ²⁰ Pakumwipura haFarasayi eshi ruvedhe munye wakwiya ghuFumu waNyambi, Jesusi gha wa huthire ghughamba eshi, ''Ghufumu waNyambi ne mbadi kwiya noyidimukitho. ²¹ Nombadi mbo ha ghamba eshi, 'Mukenge, ogho ne ghu!' endi 'Agho ne ghuya!' Mukenge, ghuFumu waNyambi ne mumwenu wakara.'' ²² Gha ghambire kwawakathishongero wendi, ''Mayuwa ne ghana kumu apa mwa kushana kumona mayuwa ghamwe ghaMwana Munu, ene mbadi mwa kughawana. ²³ Poha kumutongwera eshi, 'Mukenge kuya! Mukenge kuno! Ene mwa kushwagha panunda endi mwa kuwa tjirere, ²⁴ thika edi wavyathanga mushoro kumitara dhodhihe muwiru, kemo dyombo dikara diyuwa dyaMwana Munu. ²⁵ Ene pamutangerero gha kona kunyanda nowakona kumushwena ghuno muhoko. ²⁶ Thika edi yahokokire mumayuwa ghaNowa, kemo dyo mbo yihokoka mumayuwa ghaMwana Munu. ²⁷ Hadire, hanwine, hakuyengire, nohawa tapire muyiyeka kate diyuwa edi ghengenine Nowa mudiwato-ruhandjo rweyire norwana hanyanyughure wahe. ²⁸ Kemo, kenge yahokokire mumayuwa ghaLoti-hadire nokunwa, kughura nokughuritha, kutapeka no kutenda. ²⁹ Ene diyuwa edi gha tundire Loti muSodomu, warokire mudiro kutunda mudiwiru nowahanyaghure hanu wahe. ³⁰ Pakupwa yikara yokemo mumayuwa gho Mwana Munu mboghana hokoka. ³¹ Mudiyuwa dyo mwakutawedhera oyu gha kukara pawiru dhondhugho gha kughurumuke ghaka shimbe yinu yendi mundhugho, mwakutawedhere oyu gha kukara mudipya ghaka huke. ³² Muvuruke muna Loti. ³³ Kehe yu gho kukondja eshi gha kunge yipara yendi nanyi gha kuyiyongarithe, ene kehe yu gho kuyongaritha yipara yendi ne mbo ghana yiwana. ³⁴ Kuna kumutongwera, mughuthiku gho hanu hawadi mbo hana kara paghudidi ghofotji, ghumwe ghopapagho nanyi hakumushimbe, ghumwe nanyi ha kumuthighe. ³⁵ Mbo pana kara hambuyama hawadi hana kutwa. Ghumwe ghopapagho nanyi ghakumushimbe, noghumwe mboghana thighara.'' ³⁶ Mbo hana kara hawadi mudipya, ghumwe mbo hana mushimbi, noghumwe mbo ghana thighara. ³⁷ Hamwipurire, ''Kupi, Fumu? Gha wa huthire eshi, ''Kokukara mwimba, makwi nagho kogha kuku kongawedhera koko.''