¹ Podiyo Jesusi ghapitire, ghamonine katughurughomukunga kutunda kumushamurukero. ² Hakathishongero wendi hamwipure,''Muhongi, yidye ghaharura, oyu katughuru endi hakuruwendi, podiyo hamushamuruke ghafa meho?'' ³ Jesusi ghawahuthire,''Ngambi yu katughuru kadi ghaharura, ngambi hakuru wendi, ene pamurandu yirughana yaNyambi hakuyihokore kupitera mumwendi. ⁴ Twakona kurughana yirughana yendi oyu ghanituma oku shime diyuwa. Ghuthiku kwiya oku noyofotji temba ghokukona kurughana. ⁵ Oku mene shime mukaye,ame yame thishe thokaye.'' ⁶ Kunyima Jesusi ghaghambire yinu yi, ghathipere pamuve, ghatendire thighuru no mate, noghathirambire pameho ghendi. ⁷ Ghaghambire kukwendi,''Yende, kakuyoye muSiloam'' (eyi hatoroka eshi''Kutuma''). Podiyo katughuru ghakayendire, gha kakuyoyire, no ghakahukire ghumona. ⁸ Haka maparaghumbo wakatughuru nowa hamumonine eshi aye ne mukakurombaghura haghambire,''Oyu ne kadi yokatughuru yu ghana hungumananga no kuromba?'' ⁹ Hamwe haghambire,''Yodiye.'' Hamwe haghambire,''Ka, ene kuna kumoneka yira yodiye.'' Ene ghaghambire ye,''Yo yame.'' ¹⁰ Haghambire kukwendi,''Ngepi edi ghana yandhuruka meho ghoye?'' ¹¹ Ghawahuthire,''Katughuru yu hetha eshi Jesusi ghana tendi thighuru no kuthiramba tho pameho ghange no kughamba kukwange,'Kayende kuSiloam no kakuyoghe.' Podiyo nayendi no kakuyogha, no nawana mamoneno ghange.'' ¹² Haghambire kukwendi,''Kupi ghadi?'' Ghahuthire?'' Ghahuthire,''Kadi sho nidimuke.'' ¹³ Haretire katughuru yu ghakarire mukunga kwawaPharisee. ¹⁴ Pano kwakarire diyuwa dyoMapeghu apa Jesusi ghatendire mughundumuki no kuyandhurura meho ghendi. ¹⁵ Podiyo karo haPharisee hamwipure eshi ngepi di gherukire. Ghaghambire kukwagho,''Ghashimbire thighuru no kutura mumeho ghange, nakuyoghire, no pano kukona kumona.'' ¹⁶ Hamwe haPharisee haghambire,''Oyu katughuru ne kadi kwaNyambi ghatunda yoyishi kadi ghatureka diyuwa dyoMapeghu.'' Hamwe haghambire,''Ngepi katughuru ghothiharuri gharughane yidimukitha ?'' Pakarire makutawero mukatji kagho. ¹⁷ Podiyo hepure katughuru gho mukunga karo,''Nye ghuna kughamba kuhatera ye, kutunda pa ghana yandhurura meho ghoye?'' Katughuru ghomukunga ghaghambire,''Aye ne muporofeta.'' ¹⁸ Pano haJuda oku shime kadi hatawa mwendi eshi aye ghakarire mukunga no ghana wana mamoneno kate pahethire hakuru wendi oyu ghawanine merukero. ¹⁹ Hepurire hakuruwendi,''Oyu ne yomwanenu yu mwaghambanga shi hamwereka okuyene mukunga? Ngepi edi ghana kumona pano?'' ²⁰ Hakuru wendi hahuthire,''Tuna dimuka eshi oyu ne mwanetu no kwamuretire ye mukunga. ²¹ Ngepi pano kuna kumona, kadi tuna dimuka, no dye ghana yandhurura meho ghendi, kadi tuna dimuka. Mumwipure, aye ne mukuru. Kukona ghaghambe papendi.'' ²² Hakuru wendi haghambire yinuyino, pamurandu hayapire haJuda. HaJuda wo ne hatawire kare eshi ngeshi ghumwe ghatawe eshi oyu ne Kristusi, nanyi hamuvukuma ghatunde mu synagogue. ²³ Pamurandu ghoyi, hakuru wendi haghambire,''Aye ne mukuru, mumwipure.'' ²⁴ Paroghuwadi hethire katughuru yu oyu ghakarire mukunga no kughamba kukwendi,''Tape ngcamu kwaNyambi. Tuna dimuka eshi oyu katughuru ne thiharuri.'' ²⁵ Katughuru ya ghahuthire,''Kadi nayidimuka ngeshi thiharuri. Thinu thofotji nadimuka: Ame nakarire no mukunga,ene pano ne kumona.'' ²⁶ Podiyo haghambire kukwendi,''Nye ghana tendi kukoye? Ngepi edi ghana yandhura meho ghoye?'' ²⁷ Ghahuthire,''Namutongwera kare, no kadi muna tegherera! Nye muna shanena kuyiyuva karo? Kadi muna kushana kukara mwakathishongero wendi namwe, endi munashana? ²⁸ Hamutukire no kughamba,''Amwe mwakathishongero wendi, ene atwene twakathishongero waMoses. ²⁹ Twadimuka eshi Nyambi ne ghaghambire kwaMoses, ene kadi tuna dimuka yu eshi kupi ghatunda.'' ³⁰ Katughuru ghaghambire no kughamba kukwagho,''Eyi ne kutetukitha, amwe kadi mwadimuka oku ghatunda, no ghana yandhurura meho ghange. ³¹ Twadimuka eshi Nyambi ne kadi ghateghereranga kwawaharuri, ene ngeshi ghumwe hakumbirupitha no kurughana yihima yendi, aye kumutegherera. ³² Kutunda kumatangero gho kaye kadi hayiyuva eshi ghumwe ghana yandhura meho ghamukunga. ³³ Ngeshi yu katughuru ngo kadi kwatunda kwaNyambi, ngo kadiko yi ghatendire.'' ³⁴ Hahuthire no kughamba kukwendi,''Amwe kwamureta mumaharwero, nowe kuna kutuhonga?'' Podiyo hamuvukumine panunda. ³⁵ Jesusi ghayuvire eshi hana mutjidha mu synagogue. Ghamuwanine no kughamba,''Watawa mwaMwana Munu?'' ³⁶ Ghahuthire no kughamba,''Dye yo,Fumu, podiyo nitawe mumwendi?'' ³⁷ Jesusi ghaghambire kukwendi,''Wamumona, noyodiye yu ghana kughamba noye.'' ³⁸ Katughuru ghaghambire,''Fumu,natawa,'' no gha mutumere. ³⁹ Jesusi ghaghambire,''Makengwerero neya mukaye kano podiyo kowa ghokudhira kumona hamona podiyo awa hokumona hakukare hakunga.'' ⁴⁰ Hame haPharisee awa hakarire nendihayuvire yinu yi nohepurire ye,''Atwe natwe ne twakunga ndi?'' ⁴¹ Jesusi ghawahuthire,''Ngo mwakunga, ngo kadiko maharwero, ene pano kughamba,'Atwe kumona,'podiyo maharwero ghenu ghemana.''