¹ ''Ghushemwa, ghushemwa, nakughamba kukwenu, kehe yu gho kupira kwingenena kuthero kuthikora tho ndjwi, ene ghana kudhina mundhira dhimwe, oyo katughuru ne mwidhi no mutjori. ² Oyu gho kungena kuthero ne mukungi gho ndjwi. ³ Mukakuyandhura muvero ghamuyandhwere. Ndjwi dhayuvire diywi dyendi, no kwitha ndjwi dhendi pamena no kudhishwayitha panunda. ⁴ Pakushwayitha dhodhihe dhendi, kokuyenda kughutho dhadho, no ndjwi dhina kumukutha, adho dhadimuka diywi dyendi. ⁵ Kadi wakukutha yu dhadhira kudimuka ene kumuthiya, kadi dhadimuka maywi ghohanu hahonagho.'' ⁶ Jesusi ghaghambire mumathaghano, ene kadi hamutjwathane nye yatambire yinu yi eyi gha ghambire kukwagho. ⁷ Podiyo Jesusi ghaghambire kukwagho karo,''Ghushemwa, ghushemwa, nakughamba kukwenu, ame ne yame thero dho ndjwi. ⁸ Kehe yu gheya kughutho dhange ne mwidhi no mutjori, no ndjwi kadi dhawategherere. ⁹ Ame yame thero. Ngeshi keheyuno ghengena kupitera mumwange, nanyi ghakupwe kukunga; nanyi ghakungene no kushwagha no nanyi ghakuwane yinu. ¹⁰ Mwidhi kadi gheyanga kutundithako kwidha no kupagha no kuyipitha. Ame neya podiyo hakuwane moyo no kukara nagho kehe pano. ¹¹ Ame ne no mukungi gho muwa. Mukungi ghomuwa kutapa yipara yendikundjwi. ¹² Mukungi gho kuhira ne kadi mukungi no kadi wakumuna ndjwi dho. Pakumona windhi ghana kwiya ghana kudhithiya no kutjira, no windhi ghuna kutjombora dho no kudhihanyaghura. ¹³ Aye kutjira yoyishi kwamuhira mupika yu no kadiko thinga tho ndjwi. ¹⁴ Ame ne yame mukungi ghomuwa, no nadimka yange, no yange yanidimuka me. ¹⁵ Tate ghanidimuka me, no nadimuka Tate, no natapa yipara yange kundjwi. ¹⁶ Nakara no ndjwi edhi dhakara eshi kadi dhomu muthikora. Nakona kudhireta nadho,no nanyi dhiyuve diywi dyange podiyo dhikare muraka ghofotjino mukungi ghofotji. ¹⁷ Eyi ne yoghanihakera Tate me: Amekutapa yipara yange podiyo nakuyishimbe karo. ¹⁸ Kadiko gho kukona kughushimba kukwange, ene me ne kughutapa nothinda. Nakara no ngcamu dhokughutapa, no nakarano ngcamu dhokughushimba karo. Natambure marawero gha kutunda kwaTate.'' ¹⁹ Makutaghuro ghakarire mwawaJuda pamurandu ghogha manando. ²⁰ Thingithagho haghambire,''Ghadi no mupepo gho ghumango no ghana ghundumuka. Nye mwakumutegherera ye?'' ²¹ Hamwe haghambire,''Aghane kadi manando ghakatughuru yu ghuna munu mupepo ghoghumango. Mupepo gho ghumango kukona kuyandhurura meho ghamukunga?'' ²² Podiyo yakarire ruvedhe romukandi gho kutapera Jerusalema. ²³ Kwakarire pakufu, naJesusi ghakarire ghana kuyenda mutembeli mundhugho dhaSolomon. ²⁴ Podiyo haJuda hamudhingire no kughamba kukwendi,''Rure rokukuma kupioru shotukwatetuna kukutamangera? Ngeshi yowe Kristusi, tutongwere ghuna yandhuruka.'' ²⁵ Jesusi ghawahuthire,''Na mutongwere mwe, ene kadi mwanitawire. Yirughana yi natendanga mudina dyaTate, agha matongweneno ne kuhatera kukwange. ²⁶ Ene shime kadi muna kutawa yoyishi kadi mwandjwi dhange. ²⁷ Ndjwi dhange ne kuyuva diywi dyange;nadhidimuka, no adho kunikutha me. ²⁸ Nadhipa moyo ghororuheya; kadi dhakufa, no kadiko yu ghaku dhini tjombora munyara dhange. ²⁹ Tate, oyu ghawanipire me, ghapitakana wahe, no kadiko ghokukona kuwanishimba kutunda munyara dhaTate. ³⁰ Ame na Tate ne twayofotji.'' ³¹ Podiyo haJuda hashimbire mawe nokumuvukuma. ³² Jesusi ghawahuthire,''Ame namuneghedha yirughana yange yoyiwa kutunda kwaTate. Oyu yirughana yo muna kunipumwera me?'' ³³ HaJuda hamuhuthire,''Kadi tuna kukupumura we kukehe yirughana yoyiwa, ene kudishamu, yoyishi owe, kathughuru,kunakukutenda ghothinda Nyambi.'' ³⁴ Jesusi ghawahuthire,''Kadi hayitjanga mumuragho wenu,'Na ghamba,''Amwe ne mwa nyambi'''? ³⁵ Ngeshighawethire ha nyambi, oku dhatunda nando Nyambi (no matjangwa kadi wakukona kughatjora), ³⁶ Kughamba kukwendi kwa Mihe oyu ghana tura mutara ghumwe no kumutuma mukaye,'Amwe muna tetuka,'yoyishi ame naghamba,Áme no Mwana Nyambi'? ³⁷ Ngeshi me kadi nakurughana yirughana yaTate, mwani tawa. ³⁸ Ene ngeshi kuna kuyitenda, ngambi ngokadi sho munitawe me, mutawe muyirughana podiyo mwakudimuke no kutjwathana eshi Tate ne mumwange no ame nemwaTate.'' ³⁹ Hayerekire kumushaghekitha karo, ene ghayendire kutunda munyara dhagho. ⁴⁰ Ghayendire karo kupitakana Jordan kudyango oku Johannesi ghatangerekuyogha, noghakakarire ko. ⁴¹ Thingi thawanu heyire kukwendi no kughamba,''Johannesi kadi ghatendire yidimukitha, ene yoyihe yi Johannesi ghaghambire kuhatera yu katughuru ne yashemwa.'' ⁴² Thingi thawanu hamutawire kuya.