¹ Jesusi ghayendire kudirundu dyaOlives. ² Mathikuthiku gheyire kutembeli karo, nohanu wahe heyire; ghahungumane no ghawahongire. ³ Hakamarukwaro nawa Pharisee haretire mbuyama oyu hanawanine ghana kuhondera. Hamuturire pakatji. ⁴ Podiyo haghambire kukwendi,''Muhongi, oyu mbuyama ne hana mukwata ghana kuhondera. ⁵ Pamuragho, Moses gharawere mukuwapawa hanu hokenge; nye wakughamba kuhatera ye?'' ⁶ Haghambire yoyihe yi podiyo eshi hamukwate podiyo eshi hakare noyimwe yokumurundera, ene Jesusi ghanyongokire no kutjanga pamuve no munwe wendi. ⁷ Apa hatwikere kumwipura mepwero, ghemanine no kughamba kukwagho,''Ghofotji mukatji kenu oyu ghapira kuharura, ninge ghatangere kumuvukuma diwe yo mbuyama.'' ⁸ Podiyo ghahungumane, no kutjanga pamuve no munwe wendi. ⁹ Apa hayiyuvire yi, ghatundirepo ghofotji ghofotji, katangera nohakuru. Paghuhura Jesusi hamuthighire pithendi, nambuyama yu ghakarire pakatji. ¹⁰ Jesusi ghemanine no kughamba kwambuyama,''Mbuyama, kupi hadi wahana kurundera? Kadiko yu ghana kurundera?'' ¹¹ Ghaghambire,''Kadiko, Fumu.'' Jesusi ghaghambire,''Name nokukurundera shi. Yende no wakaharura karo.'' ¹² Karo Jesusi ghaghambire kukwagho,''Ame ne no munyenge gho kaye; keheyu ghokunikutha kadi gha kukara mumakokore ene nanyi ghakukare muthishe.'' ¹³ HaPharisee haghambire kukwendi,''Wakona kukara ghushupi papoye ghothinda; mughupi ghoye ne kadi ghushemwa.'' ¹⁴ Jesusi ghawahuthire no kughamba kukwagho,''Ngambi ngonirete hashupi wange nothinda, hashipi wange ne ghushemwa. Nadimuka oku nakutunda noku nakuyenda, ene kadi mwadimuka oku natunda endi oku nakuyenda. ¹⁵ Amwe ne kukengurura panyama; kadi wakutheka me keheyuno. ¹⁶ Ngeshi nitheke, matheko ghange ne ghushemwa yoyishi kadi pithange, ene naTateoyu ghanituma. ¹⁷ Kemo, pamuragho hayitjanga eshi yishupa yo hanu hawadi ne yashemwa. ¹⁸ Ame ne yame ghokutenda hashupi hange nothinda, na Tate oyu ghanituma kutenda hashupi kuhatera me.'' ¹⁹ Haghambire kukwendi,''Kupi wiho?'' Jesusi ghawahuthire,''Mwadimuka me ndi Tate; ngo mwanidimuka me, ngo mwadimuka naTate naye.'' ²⁰ Ghaghambire yinu yi muruhafo oku yene pakuhonga mutembeli, noyofotji temba ghamukwatire yoyishi viri dhendi shime kadi dheyire. ²¹ Podiyo karo ghaghambire kukwagho,''Ame ne kuna kuyenda; nanyi mwakunishane me no nanyi mwakufe mumaharwero ghenu. Okunakuyenda, kadi wakukona mwiye.'' ²² HaJuda haghambire,''Nanyi ghakupaghe thinda? Yoghana kughambera,'Oku nakuyenda amwe kadi wakuyendako'?'' ²³ Jesusi ghaghambire kukwagho,''Amwe ne kwatunda kwishi; ame ne kwatunda kuwiru. Amwe ne mwakakakaye; ame ne kadi nomuka ka kaye. ²⁴ Podiyo, nakughamba kukwenu eshi nanyi mwakufe mumaharwero ghenu. Shimengwamwakutawe eshi ame ne yame, nanyi mwakufe mumaharwero ghenu.'' ²⁵ Haghambire yino kukwendi,''Yowe dye?'' Jesusi ghaghambire kukwagho,''Yoyihe yi naghamba kukwenu kutundera kumatangero. ²⁶ Nidi noyinu yoyingi yokughamba no kukukengurura we. Ene ngambi kemo, oyu ghanituma ne ghushemwa; no yinu yi nayuva kukwendi, yinu yi naghambanga kukaye.'' ²⁷ Kadi hayidimukire eshi kwaghambire kukwagho kuhatera Wihe. ²⁸ Jesusi ghaghambire,''Apa mwayeyure Mwana Munu, podiyo mwakudimuka eshi yame, no kadiko eyi natendanga papange. Thika Tate ghanihongire me, ame kuna kughamba yinu yi. ²⁹ Oyu ghanituma ne nange ghadi, no kadi ghanithiya me pithange, yoyishi me kehepano kutenda eyi yamuhafithanga.'' ³⁰ Oku Jesusi pakughamba yinu yi, hengi hamutawire. ³¹ Jesusi ghaghambire kwaJuda awa hamutawire,''Ngeshi muthighare munando dhange, no ghushemwa mwakathishongero wange; ³² no nanyi mwakudimuke ghushemwa, no ghushemwa nanyi wakumushuture.'' ³³ Hamuhuthire,''Atwe ne twahanhoka waAbraham no kaditwakara twapika wakeheyuno; ngepi di shoghambe,'Nanyi mwakushutuke'?'' ³⁴ Jesusi ghawahuthire,''Ghushemwa, ghushemwa,nakughamba kukwenu, keheyu gho kuharura ne thipika kumaharwero. ³⁵ Mupika ne kadi wakuthighara mundhughokehepano; ene mwana kehepano kuthighara ye. ³⁶ Podiyo, ngeshi Mwana kumushutura, nanyi mwakushutuke yoshemwa. ³⁷ Nadimuka eshi amwe ne mwahanahoka waAbraham; kuna kushana kunipagha pamurandu manando ghange kadi ghadi nodyango mumwenu. ³⁸ Ame kughamba eyi namona naTate, amwe namwe kutenda eyi mwayuva kwawihenu.'' ³⁹ Hahuthire no kughamba,''Wihetu ne Abraham.'' Jesusi ghaghambire kukwagho,''Ngeshi mwe mwakarire mwahana Abraham, ngo kuna kurughana yirughana yaAbraham. ⁴⁰ Keho, amwe muna shana kunipagha me, katughuru yu ghana mutongwera ghushemwa oghu nayuva kwaNyambi. Abraham kadi ghayitendire yiynu yi. ⁴¹ Amwe kutenda yirughana yawihenu.'' Haghambire kukwendi,''Kadi hatureta twe mukuhondera; tudi no Wihetu ghofotji: Nyambi.'' ⁴² Jesusi ghaghambire kukwagho,''Ngo Nyambi ne yo Wihenu, ngo mwanihaka me, ame kwatunda kwaNyambi no yame no; ame kadi neya papange, ene kwanituma me. ⁴³ Nye mwapira kutjwathana manando ghange? Pamurandu eshi kadi wakukona muyuve manando ghange. ⁴⁴ Amwe ne nawihenu, muyipithi, no mwahima kurughana mahimeno ghawihenu. Ghakarire mupayi kumatangerero no kadi ghemana mughushemwa yoyishi kadimo ghushemwa mumwendi. Apa ghaghambanga ghumbango, kughamba kutunda kukwendi yoyishi aye ne mukambudhi no wiha mbudhi. ⁴⁶ Keho, pamurandu ame kughamba ghushemwa, kadi wakunitawa mwe. ⁴⁵ Yidye yu ghaniwanine diharwero me? Ngeshi me kughamba ghushemwa, nye gho kupira kunitawa me? ⁴⁷ Keheyu waNyambi ghayuve manando ghendi; kadi mwaghayuva yoyishi kadi mwaNyambi.'' ⁴⁸ HaJuda hahuthire nokughamba kukwendi,''Kadi wakukona tughambe vene ghushemwa eshi ghomuSamaritan no ghudi nomupepo ghoghumango?'' ⁴⁹ Jesusi ghawahuthire,''Kadi nidi no mupepo ghoghumango, ene nakutekera Tate, no mwanishamuna mwe. ⁵⁰ Kadi nashana kuhafa kwange; pwadi ghofotji ghana kushana no kukengurura. ⁵¹ Ghushemwa, ghushemwa, nakughamba kukwenu, ngeshi kehe yuno ghapungura nando dhange, kadi ghakumona kufa.'' ⁵² HaJuda haghambire kukwendi,''Tuna dimuka eshi ghudi no mupepo ghoghumango. Abraham no haporofita hafire; ene we kuna kughamba,'Ngeshi kehe yuno ghatura manando ghange, kadi ghakuyereka yifa.' ⁵³ Kadi wapiterera wihetu Abraham oyu ghafa, endi we? Muporofeta naye ghafire. Owe ne yowe dye wakutendaghothinda?'' ⁵⁴ Jesusi ghawahuthire,''Ngeshi nikungcamupithe nothinda, ngcamu dhange ne kadiko; Tate ne yoghani pa ngcamu- oyu mwaghambanga mwe eshi yo Nyambi. ⁵⁵ Kadi mwamudimuka ye, ene mene namudimuka. Ngeshi nighambe,'Kadi namudimuka,'nanyi nikare yira mwe, hakambango. Ngambi kemo, namudimuka no natura nando dhendi. ⁵⁶ Wihenu Abraham ghahafire pakumona diyuwa dyanga; ghadimonine no ghahafire.'' ⁵⁷ HaJuda haghambire kukwendi,''Kadiwakuma shime kumyaka makumi kwoko, no wamona Abraham?'' ⁵⁸ Jesusi ghaghambire kukwagho,''Ghushemwa,ghushemwa, nakughamba kukwenu, kughutho waAbraham ne, Yame.'' ⁵⁹ Podiyo hashimbire mawe no kumuvukuma, ene Jesusi ghakuhorekire thinda no ghayendire ghatunde mutembeli.