¹ Kunyima dhoyi yinu Jesusi ghayendire kuGalilee, kadi ghashanine kuyenda kuJudea yoyishi haJuda hamushanine hamupaghe. ² Podiyo haJuda Mukandi gho Mumvure pepi wakarire. ³ Hakurwendi haghambire kukwendi,''Thiyedyango di no yende kuJudea, podiyo hakathishongero ghoye hakamone yirughana yi watendanga. ⁴ Kadiko yu ghatendanga yinu mughudhindo ngeshi ye thinda ghana shana hamudimuke mukuyandhuruka. Ngeshi ghutende yinu yi, wakona kukunegha ghothinakukaye.'' ⁵ Kwawakurwendi nagho kadi hamutawire. ⁶ Jesusi podiyo ghawatongwere,''Ruvedhe rwange shime kadi runa kumumo, ene ruvedhe rwenu ne aro ne rwakara. ⁷ Kaye kadi wakukona kamunyenge mwe, ene kunyenga me yoyishi menakutongonona kuhatera kuyirughana yoyimango. ⁸ Muyende kumukandi; Ame kadi nakuyenda ko yoyishi ruvedhe rwange shime kadi runa kumumo.'' ⁹ Apa ghamanine kughamba yinu yi kukwagho, ghakarire muGalilee. ¹⁰ Apa hayendire hakurwendi kumukandi, naye ghayendire kundundu, kadi mumbunga ene mughudhindo. ¹¹ HaJuda hamushanine pamukandi no kughamba,''Kupi ghadi?'' ¹² Pakarire yikuvureka yoyingi mukatji ko mbunga kuhatera ye. Hamwe haghambire,''Aye nekatughuru gho muwa.'' Hamwe haghambire,''Ka, ghana yongaritha mbunga.'' ¹³ Ene kadiko yu ghaghambire ghushutuka kuhatera kukwendi kuyapa haJuda. ¹⁴ Apa wakarire mukandi eshi pakatji no kupwa, Jesusi ghayendire mu tembeli no katanga kuhonga. ¹⁵ Podiyo haJuda hahafire, ghughamba,''Ngepi yu katughuru ghadimuka yoyingi? Kadi gha kuhonga.'' ¹⁶ Jesusi ghawahuthire no kughamba,''Yihonga yange ne kadi yange, ene yoyu ghanituma. ¹⁷ Ngeshi kehe yuno ghahima mukurughana mahimeno ghendi, mboghana dimuka ghano mahongo, ngeshi kwatunda kwaNyambi, endi ame kuna kughamba kutunda mumwange. ¹⁸ Keheyuno gho kughamba kutunda mumwendi kushana mangcamu ghendi, ene keheyu ghokushana ngcamu dhendi yu ghanituma, oyo munu ghushemwa, no kadiko ghumango mumwendi. ¹⁹ Kadi ghamupa Moses muragho? Ene noghofotji temba ghatura muragho. Nye muna kushanena kunipagha?'' ²⁰ Mbunga dhahuthire,''Ghudi no mupepo ghoghumango. Dye yu ghana kushana kukupagha?'' ²¹ Jesusi ghahuthire no kughamba kukwagho,''Narughana thinu thofotji, nomwahe munahafa pamurandu wayo. ²² Moses ghamupire dikeneno (kadi shine ngwa kwaMoses yatunda, ene kwawatukuru), no mudiyuwa dyo Mapeghu katughuru ghakona kumukena. ²³ Ngeshi katughuru ghatambura makeneno mudiyuwa dyoMapeghu podiyo muragho waMoses kadi hanaghutjoro, nye muna patera nange pamurandu nerura katughuru mudiyuwa dyoMapeghu? ²⁴ Mwanitetera pamurandu ghodi nakumoneka, ene mukenge mughuhunga.'' ²⁵ Hamwe hokutunda kuJerusalema haghambire eshi,''Oyu ne kadi yodiye hana kushana kupagha? ²⁶ Mone, aye kughamba ghana shutuka, no kadiko yokughamba kukwendi. Kadi shine kwa hapiterithi nawo hanadimuka eshi oyu ne yodiye Kristusi, kukona? ²⁷ Ene tuna dimuka eshi oyu ne kupi ghatundera. Ene apa ghakwiya Kristusi, kadiko yu ghakudimuka eshi kupi ghana tundera.'' ²⁸ Podiyo Jesusi ghadirire ghukuyerera mutembeli, ghuhonga no kughamba,''Mwahe mwanidimuka no mwadimuka ku natundera. Kadi neya papange, ene oyu ghanituma ne ghushemwa, no kadi mwamudimuka. ²⁹ Namudimuka yoyishi kukwendi natundera no yoghanituma me.'' ³⁰ Hashanine kumukwata, ene kadiko yu ghaturire nyara dhendi papendi yoyishi viri dhendi kadi dhakumenemo. ³¹ Ene thingi ho mumbunga hamutawire, no haghambire,''Apa ghakwiya Kristusi, nanyi ghakutende yidimukitha yoyingi kupitakana eyi ghana tendi yu katughuru?'' ³² HaPharisee hayuvire mbunga hakukuhohotera yinu yokuhatera Jesusi, no mukuru wapristeri naPharisee hatumine hamaporitha mukamukwata. ³³ Jesusi podiyo ghaghambire,''Shime nenu nidi kamanana, podiyo niyende koyu ghanituma. ³⁴ Nanyi munishane ene kadi shomuniwane me; oku nakuyenda, kadi wakukona mwiyeko.'' ³⁵ HaJuda podiyo haghambire mumwagho hathinda,''Kupi yu katughuru oku ghakuyenda oku twakudhira kumuwana? Nanyi ghakukuhanye mukatji kawa Greek no kuhonga haGreek? ³⁶ Nye dhi nando ghanaghamba,' Amwe nanyi mwakunishane ene kadi mwakuniwana; oku nakuyenda,kadi mwakukona kwiyako'?'' ³⁷ Paghuhura, diyuwa dyodikuru dyomukandi,Jesusi ghemanine no ghadirire, ghughamba,''Ngeshi keheyuno ghakufa dinota, ninge gheye kukwange na nwe. ³⁸ Keheyuno gho kutawa mumwange, thikadi ghaghamba matjangwa, marware gho meyu gho kupara nanyi ghakupuke mudira dyendi.'' ³⁹ Ene ghaghambire yi kuhatera Mupepo, owa hatawa mumwendi nanyi hakutambure; Mupepo shime kadi ghana ghutapa yoyishi Jesusi ne shime kadi ghana mutungeka. ⁴⁰ Mbunga dhimwe,apa hayuvire manando gha,haghambire,''Oyu neyodiye muporofeta.'' ⁴¹ Hamwe haghambire,''Oyu ne Kristusi.'' Ene hamwe haghambire,''Kristusi ne kutundera kuGalilee? ⁴² Matjangwa ne kadi ghaghamba eshi Kristusi ne nanyi ghakushuruke mumughurumukero waDavid no kutundera kuBethlehem, mukunda oku ghakarire David?'' ⁴³ Podiyo patangire makutawero gho mambunga pamurandu wendi. ⁴⁴ Hamwe hashanine kumukwata, ene kadiko yu ghaturire nyara dhendi papendi. ⁴⁵ Podiyo hamaporitha hakahukire kwamupristeri shokuru nawaPharisee, owa haghambire kukwagho,''Nye muna pirikumureta?'' ⁴⁶ Hamaporitha hahuthire,''Kadiko yu ghaghamba kengeyo.'' ⁴⁷ Podiyo haPharisee hahuthire kwagho,''Namwe hamuhongaghura? ⁴⁸ Keheyu muraghuri ghatawa mumwendi, endi keheyu muPharisee? ⁴⁹ Ene dhi mbunga dhapira kudimuka muragho, ghawa kuta.'' ⁵⁰ nikodemusi (ghofotji ghopawa Pharisee, oyu ghamwiyere pakutanga) ghaghambire kukwagho, ⁵¹ ''Muragho wetu ne kutheka katughuru kughutho ghokuyuva kukwendi no kudimuka eyi ghana tendi?'' ⁵² Hahuthire no kughamba kukwendi,''Nowe gho mukaGalilee? Mufukunye no mukenge eshi kadiko muporofeta ghokutunda muGalilee.'' ⁵³ [Podiyo keheyuno ghayendire kundhugho dhendi.