¹ Nji handeka nguange suana, amba a cili ciliua mundende, ka litepele cifua na ngamba, nambe muali ikeye va venia ua vioshe. ² Vunoni a li mu mavoko a tuniungi na tuthongo noho ku litangua lia mutumbkila ishe. ³ Keho naua, mu tua kele vanike, va tu puithile vindungo va vije vi tua shangumukile hano ha mavu. ⁴ Vunoni mu ya puilemo nthimbu, Kalunga ua tumine Munendi, ua kuthema ku mukentu, ua ku themukila mu mashiko. ⁵ Ua vi lingile linga a kule mu medhi a lishiko, netu tu uane kupua vana. ⁶ Mukonda eni mu vana, Kalunga na tumu mpundhi ya mona mu vimbunge vietu a thana nguendi, "Abba, Tata." ⁷ Keho ku ua kele lalo ndungo, vunoni u mona, keho nga mona, keho uli lalo suana muli Kalunga. ⁸ Vunoni nthimbu ije, te kanda mudhivuke Kalunga, va mi puithile vindungo kuli vaje, kundhili yavo, keti tumponia. ⁹ Vunoni ngeci mu muna kuidhiva Kalunga, indi mua na midhivuka Kalunga, vati lalo muatha kuhilukila kunima na ku vilinge via kuviha vi mua shangumukile navio? Muthetele lalo kuhilukila kuvundungo ndi? ¹⁰ Mu ka tatela matangua na vingonde via viha na vinthimbu na miaka! ¹¹ Njili na liova lieni nguange hamo nja mipangela ngoco. ¹² Njina milambelela, vamuna-nana, fueni yange, ngue munji na mifu. Ku mua nji vihithilile. ¹³ Vunoni munedhiva ngueni mukonda ya vuvedhi vua muvila nja miambuluilile mudhimbu ua cili nthimbu ya kulivanga. ¹⁴ Nambe mu ua mietheka muvila uange, kumua nji thembuluile ndi munji viane. Vunoni mua nji tambuile ngue kangelo ua Kalunga, ngue yange Kilistu Yesu vavenia. ¹⁵ Keho vivedhikitho vieni vivo? Ange nji mihana vukaleho nguange, nga ca taa nga mua cokovuele mo mesho eni vavenia na kunji hana o. ¹⁶ Keho ngeci, njina pu muka cidhindo ceni mukonda nji mi leka vu cili? ¹⁷ Vakevo vali na kuyongola nandhili kumi vula,vunoni kuvethi na vutumbe vua cili. Va yongola va mi shokele hanja linga mudhangame muku va tonda. ¹⁸ Ca cili nthimbu yoshe kudhangamena vucili, keho keci noho njili mukati keni. ¹⁹ Vana vange va vandende, njuvua lalo kuvavala kua kumi thema noho Yesu na kolo muli yeni. ²⁰ Njina yonguele kukala hamo neni ngeci naku tengulula lijiu lienge, mukonda njili navitanga neni. ²¹ Njilekeni, eni muli veyela ku kala muinthi la majiu a lishiko, ku muekuvua mejiu a lishiko ndi? ²² Mukonda mathona nguao Avilahama ua kele na vana vendi vavali vavamala, umo ua muthemene na ndungo ua mukentu keho umo na mukentu ua kudhituka uaku jeneka kuambata. ²³ Umo ua themukile ku mukentu ua ndungo hanthitu, vunoni mukuavo ua themukile ku mukentu ua kudhituka ha litavathano. ²⁴ Vilinge evi via kala ngue vithimo, mukonda ava vakentu vana pu matavathano avali. Eli limo lia kumulundu ua Sinai, lia themene vana va ku vundungo, ou ikeye Hangale. ²⁵ Ngeci napu mulundu ua Sinai mu Alavia, na ikeye nemanena ho Yelusalema ya mualolo, mukonda ali muvundungo na vana vendi. ²⁶ Vunoni Yelusalema ili muilu ikeyo ina dhituka, nendi lalo nana yetu. ²⁷ Ikeye va ithona, "Jolela, ove nthimpi ku ue kuthema; lila na kutambakana ndholela, ove ujeneka kuyana kuvavala ca kuthema kambututu; mukonda vanike va uje ali mungoco vavengi kutuvakana va uje ali na liala." ²⁸ Vunoni enei vamunanana, muuana va litavathano ngue Isake. ²⁹ Kunthimbu ije uje iva themene kunthimbu ua yandethele uje iva themene kuli Sipilitu. Vina lifu ngue mualolo. ³⁰ Vunoni vika a kuania mathona? "Sheka mukentu ua ndungo na mona. Mukonda muna ndungo ua mukentu ka kahingi vu suana kumo na muna mukentu uakudhituka. ³¹ Mukemo, va munanana, etu keci tuvana va mukentu ua ndungo, vunoni va mpuevo ua kudhituka.