¹ Ii zaa ɓapsa mà ma'a ɓonarekre, buta Garisinawai rette, ² keetika kaa Yeeso ro ɓark re roo zi gom. Sei maza naa rumsa go'pa saz, zaa keete ar gagre, sə zaa oksu, ³ mazzi gau ar gaggre, ⁴ den gengga, ii dogdu naa sargai dente, ɗa'rus sargai yii, sə faksi ura puna gɓama sə bi'tukən maazin piipa. ⁵ Tuks naa ubla woogo su' sə gɓamro zoka gwandek naa bileya i pellimai ar gagre naa timro te'. ⁶ De og Yeeso ar ye'na, nòg sə ree ullo sə noosu. ⁷ Woo su' naa gɓam, n bó'ok an naa mọóya Yesso waza Daa Biiləz, n ora Billo kaa kɓese baar pa ⁸ Yeeso doosu géé keetum!! da̱a̱m mazzi mòò rumsa go'pas. ⁹ Desu gee i dera rigara? bagu gee i dere gengga. ¹⁰ Sei ooru haa kana nennbo orakre pa. ¹¹ Gɓeema Yewirom ipu neəuro gɓagsilləre, ¹² Íi ooru gee daa mee e' tork Yewire to'. ¹³ Esi bila ina tor, rumsa go'pa esi date mazzi, sə tor Yewiro te, Íi tor rekare ma' gɓenaro to'. Yewiya roi mul itte ¹⁴ Neebaiyi Íi nog sə Íi re dosə mari ina bo'rum man, delle te' mari gengga Íi keete nok gwenka ina bo'rum man, ¹⁵ Íi zaa Yeeso re de' oks maza Íi deru gengga ezi gamna re wessa naa yalin zokro, ser kamu go'ma'go ¹⁶ Iya i og ina bo'rum eni naa maza Íi kesusu zam ezi, Íi dooso iya Íi zai ina bo'rum man, naa ina bo'rum naa Yewin, ¹⁷ mariya Íi zaa arkirei Íi o̱oro Yeeso na dassubo buta bo̱o̱t ¹⁸ Maza zam ye̱du ezi zaa oro Yesso, na̱ tor ɓark ro bo̱ duku, Yeeso Ìisu ara ur dukinik pa̱, ¹⁹ Yesso dosù gee, geem a̱ doso mariya moi ina Bil bo'san, ²⁰ sǝ mazzi sire faks ina Yeeso bo'sun Dikafolis san. Íi pat inni məsi ²¹ De' Yeeso ga',ga'sa ɓena naa ɓark, bamsa mari Ìi toonu, pu de'et, te ɓapsa ɓenaro, ²² uza muzo diga dooniya rora Billele te' i deru Yayirus, sə o̱g Yesso oka ogun sei kas ullo mu', ²³ sə ooru, bonge waza miire kiizaz werk dera, zaa bi'su na' leege kine go'səka, ²⁴ Yeeso de' sə bansa mari ko'su teka ²⁵ kitakiz uza ɓer baar naa kuruka kwa' haa wi' komna naa ittekei ²⁶ bo' bo̱ne haa sə yaps do'ka lamire. Wo̱os we̱sa pisus pat ama go'ospa és, ²⁷ geete paka Yesso rok sə Ìi zengɓutu bansa marii ro te' sə pa' yaluwa ulloi ²⁸ do nee gee koo n pa' yaluwa ullow ma, n go' suk gon. ²⁹ De' pa' Yesso kwa' i de'es, sei megis bo' markin puna ina mo'os bon. ³⁰ Yeeso des bansa mari ne̱e̱ pa'bòya? nokmee gɓam kee pu ullo zokro, ³¹ kubrbaiya Ìi doosu gee a̱ og bansa mari, sə des mongem nee pa'boya nee? ³² ama Yeeso gwende ara pou rek sə og maza pa̱u waz ³³ De' kitakizzi meegis ina bo'rum naa uran, nigs sə zaa Yeeso ro naa ser, ə doosə gongga ³⁴ doosə gee, wai kiiz rem we̱ssa, eska timra mil a̱ go'sa pu ³⁵ pu pakkin kitakizziro, mari i keete, do̱o̱nza gwaga Billokreze gwa, wai kiiza ulloz wo'pu, kana mo̱o̱s lamz zuk pa. ³⁶ Yeeso ke' to' Íi re pa, doso donza gwaaga Bilookrez ge̱e̱ ser kana kama pa esim tir Billəe. ³⁷ Íi sə ka'ina duubo pa, sei pe' Biturus naa Yakubu naa Yohana zeeza Yakubu roz. ³⁸ De' Íi zaa gwaaga donza,gwaaga Billokrozzo Yeeso oks mari gengga weeraro sə Íi wo̱o̱go su' naa yirku. ³⁹ De' tor gwaaggiro, su baar sugu sə do̱o̱ ge̱e̱, Íi go'on an sə Íi wo̱o̱go sutya, wazzi rus run zi werpa. ⁴⁰ Íi mandu naa ɓesum, sə kees mari pat go̱ka, sə der do'gamriya wazzirei naa mariya renni yammai sə Íi tor rora wazzi pinnallo. ⁴¹ Kam wazzi na'ro sə dooge Talita kumi, ni do̱o̱kak waikiz ruum paa. ⁴² Wazzi ruupa naa gɓaku sə ri'go, puna wi' komna naa ittekei, inni məs mariyi naa yaks zok. ⁴³ Ina esu rek na rego, ama ka'ina doso mari ina bo'rim man pa.