¹ Seetǝ ublǝt ittǝrǝ sǝ ru'a reka buroodiya yist pii paz nabo rektǝ. Dọ'ga Toriya Billǝi na dọọniya marirǝi naa Lamiya Muusarǝ rọ'ọknairǝi i gwen bilǝta i le'kǝn sǝ i kamǝn Yeeso naa mẹẹkaa marirǝk pak sǝ bo ipnuk. ² Nọk i doo gee, "Bǝlla naasǝllǝ pa nok bọ'ta mari i ruutǝ gwaar." ³ De Yeeso pii Bettani Siman bǝdǝzzǝ gwa, pu gamnarǝ arkirǝ, kitakiiz uza zaa ullǝ kamtǝ waaga dǝǝk sǝ gom yipkparǝk. wa'as ina i tọ'ǝn waagin sǝ kuu waagi ullǝ zullǝ. ⁴ Ama uri baar gọmi, i pag gwanirǝ te' sǝ i doo gee, "Nọk an sǝ laasǝn waagi riin ya? ⁵ Ika yingǝyin ina ka ar dinarii zu' komna naa gbanaarǝi, sǝ ika masǝ iya naa zaamai wẹẹsi." sei i paksu. ⁶ Ama Yeeso doosi gee, Keen bilaa ullǝkrǝ. Nọk an sǝ i ẹ'u ya? Bọ'rǝsapu ina wessan nọk miin. ⁷ Koobanaya ipu ɓai naa iya ipu naa zaamai, gǝ ina íí bọ'sǝki gọ'num i kinki kin, ama i kinke mii pa. ⁸ Bọ'rǝsapu ina le'ek bọ'kan: wọọsepu zoka miik waaga i iikne gagǝllǝk. ⁹ Zǝmazi n pu dooskǝndǝ, koo araya ara i dookǝn paka tingka Billǝk dǝllǝ te'ek, i dook ina kitakiiza az bọ'rǝn nọk sunduka naa ur. ¹⁰ Sei Yahuuda Iskariyooti, muzǝ iya komna naa ittǝkǝi airǝ ree Dọ'ga Toriya Billǝirǝ sǝ i dog ni eskini Yeesok. ¹¹ Zok yag Dọ'ga Toriya Billǝ eyi de i gee pakki, i dog bo esku wẹẹs. Diga roozi sǝ ma' laaka bilaa eskǝni Yeesok. ¹² Ublaa sẹẹnka buroodiya yist pii pazzǝ bǝlla i esǝ ma'za bukǝskarǝzak, kubrubaiya Yeeso rǝi i dẹsu gee, A ii ena re kwes ina a rek paskarǝn araya? ¹³ Tom ittǝkǝ kubrubaiya ullǝirǝ gee, "ren dǝllǝ te', maz uza naa sabdǝra maamdǝl okskǝn, duunu. ¹⁴ Gwaaga re torǝnnak duunu sa' sǝ i doosǝ dangwanza naa gwaagaz, 'Lamz gee rora maraginirǝ n rekǝn reka buroodiya yist pii paz na kubrubaiya miiyai pu araya?' ¹⁵ Gẹẹskǝn ror ola gbi'lǝl go'rusapu zok, kwessǝn rekki roo. ¹⁶ Kubrubaiyi i ruu i ri';gǝ dǝllǝ te', i oks koanya ni doosnik sǝ i kwes reka ubla paskarǝk. ¹⁷ Naa nimz, zaa iya komna naa ittǝkǝ eyirǝ. ¹⁸ De i gapsapu ar reka rekrǝ, ipu reg rekrǝ, Yeeso doo gee, "Zǝmazi n pu dooskǝndǝ, uza iirǝ te' ura pu reg rekrǝ naa miiz yingǝke." ¹⁹ Íi yas baar gomni inni, koo nẹẹya dẹsu gee, "Miizi ya?" ²⁰ Yeeso iisi gee, muzǝ iirǝ te' zi ura e ig nai ɓai kǝr mukǝz. ²¹ Waa Maz wǝrk ni rababai i doo ullǝ paak. Ama ina yirkurǝnni naa ura yingukuz! Ar an inaka dingtu pa." ²² De ipu reg rekrǝ, Yeeso pe' buroodi sǝ sǝ̀'su sǝ wẹ'gǝsu sǝ esiu sǝ doo gee, "Kween an, zoka miikaa ak." ²³ Pe' koppa maama inaabirǝm, ii useeko sǝ esiu sǝ i bo' íi yas. ²⁴ Doosi gee, kwaala miirǝ dokarǝlaa al, kwaala i kuusǝk nọk mari gǝnngak. ²⁵ Zǝmazi n pu dooskǝndǝ, n bo'ok maama nena inaabirǝm gǝbǝn pa sei ublaa n bo'kǝn pǝkkǝk gwanta Billǝttǝk." ²⁶ De i zin gel, i kee i ri'gǝ ge'a tẹta zaitundǝkrǝ. ²⁷ Yeeso doosi gee, "Ii yas i nọk sǝ i daye, nọk pu bisǝnǝn 'N vokp nẹẹbaz sǝ mai i faks.' ²⁸ Ama ina ruutepu gagǝllǝ, n asǝk mu' rekaro Galiili. ²⁹ Biiturus doosu gee, "Koo íi yas ina kasǝk, mii n kasǝk pa." ³⁰ Yeeso doosu gee, "Zǝmazi n pu dooskarǝ, tuksa wo̱nka assǝ kǝ́ǝz nabo kwii dǝn ittǝnǝya, a sinkǝn me̱e̱ke dǝn taanǝ." ³¹ Ama Biiturus bagu gee, "Koo ina ikkpe naa mo̱o̱ n sinkǝn me̱e̱ka pa." Íi yas i dog rii. ³² I zaa ara i de̱r Gersamaanikrǝ, sei Yeeso doosǝ kubrubaiya ullǝi, "Gamn ari n we̱e̱rǝtǝ Bil." ³³ Pe' Biiturus, Yaakubu naa Yohana, sei ma geeka gomba gwandǝ timle. ³⁴ Doosi gee, "Zǝngsa miis mo'sapu naa gombaa ni n wǝrkak, gawun ari sǝ i zo'. ³⁵ Yeeso sǝǝ mu' topa, kas buttǝ, we̱e̱rǝ Bil gee, na bo̱'rumka pe'sǝse bǝrka baara al. Doo gee, ³⁶ "Daa aka le'len bo̱'ka koo anya, pe'sǝse bǝrka baara al, ama no̱k iikaa miik pa, ama iikaa mo̱o̱k." ³⁷ Gǝtǝ oksi ipu rumrǝ, sei doosǝ Biiturus, "Siman apu rumrǝ ya? A le' zo'ka koo awa muzǝ pa ya? ³⁸ Gamn naa gbaksa tok sǝ a we̱e̱rǝ Bil no̱k kaa tor ɓasurǝ pa. Rums gǝ ii in, ama zok mo'sapu." ³⁹ Gǝ gǝǝ sǝ we̱e̱rǝ Bil, doo pannga pìin. ⁴⁰ Gǝbǝn gǝtǝ za oksi i piipin rumrǝ no̱k no̱'a ii í mo̱'sapu naa rum í me̱e̱ ina í dookun pa. ⁴¹ Gǝtǝ taaza roozǝ sǝ doosi gee, "I piipin rumrǝ ǝngǝskarǝ ya? daksapu rii! Bǝl go̱'sapu, gwenǝn! I essǝpu waa Maz iya naa hakkeiyairǝ na'rǝ. ⁴² Ruutǝn a ri'gǝ, ogǝn ura eskez rektǝpu mis. ⁴³ Piipin pakrǝ sei Yahuuda, muzǝ iya komna na ittǝkǝ airǝ rektǝ naa bansa mariya ipu naa fonkai naa dǝgde nattǝi; diga Do̱'ga Toriya Billǝi naa lamiya Muusarǝ ro̱'o̱knairǝi, naa do̱o̱niya marirǝi. ⁴⁴ Ura esku ezi se̱e̱ doosipu gee, "Ura i og n kuwuz, gwanzi, kamnu i ri'gununu. ⁴⁵ De Yahuuda Iskariyooti rektǝ, ree Yeesorǝ sǝ doo gee, Lamz" sǝ kuwu." ⁴⁶ Sei i kamu. ⁴⁷ Ama muzǝ iya de' ìirǝ rou fonkaa sǝ ɓaan se̱nza Domda Tozza Billǝz tokrǝ. ⁴⁸ Yeeso de̱si gee, "I zaa naa dǝgdǝ naa fonkai kamkperǝ ni mii ruuzak ya? ⁴⁹ N pin naa ii koobonaya Gwaaga Billǝkrǝ sǝ n kubrusǝnak i kame pa. Ama an bo̱'rǝm rii no̱k yi'iska ina rababi doon. ⁵⁰ Iya ipu naa yeesoi yas i no̱g. ⁵¹ gbamz uza duwu sa' , tǝ' bo̱u yaluwa linin dǝu. i kamu kama seps ⁵² da̱a̱ yaluwi iirǝ na'rǝ sǝ no̱g kandǝzǝz. ⁵³ I kam Yeeso Domda Tozza Billǝzzǝ gwa ara Do̱'ga Toriya Billǝi naa do̱o̱niya marirǝi, naa Lamiya Muusarǝ Ro̱'o̱knairǝi i tookǝnnak. ⁵⁴ Biiturus boo duwu sa'kasa' ar ye'na ha rekarǝ kaaka ara Domda Tozza Billǝzzǝ gwa sǝ gau ara gyebba gwaagei ipu ǝǝkǝn ra'rǝkrǝ. ⁵⁵ Do̱'ga Toriya Billǝi naa iya ipu ɓaiyai i laa sedaakum Yeesorǝ paa no̱k sǝbo iu. Ama i kinu pa. ⁵⁶ Mari gennga i esǝ sedaakuma songbrǝm ullǝ paa, ama sedaakummi duu bila pa. ⁵⁷ Uri i ruu sǝ i esǝ sedaakuma songbrǝm ullǝ paa gee, ⁵⁸ "E geeu dookrǝ gee boka wa'gǝs Gwaaga Billǝ ak sǝ boka wo̱m uka ru' taarerǝ." ⁵⁹ Naa riik sedaakuma iim duu bila pa. ⁶⁰ Domda tozza Billǝz ruu paa sǝ de̱s Yeeso, "Ina mariya ai i doo mo̱o̱ro paa an, apu naa ina a dookan pa ya?" ⁶¹ Ama rǝǝs kaa su' pa. Gǝbǝn Domda Tozza Billǝz de̱su gee, "Moozi kweebaaz, waza ura naa sǝ̀'sǝmazzǝ ya?" ⁶² Yeeso iisu gee, "Minzi. I og Waa Maz tiitǝkrǝ kolirǝ te' naa gbi'kǝma gamnarǝ na' go'narǝm." ⁶³ Sei Domda Tozza Billǝz taas yaluwa ullǝu sǝ de̱s gee, "Rikak a laak sedaakum uma gǝbǝn ya? ⁶⁴ I geesapu sǝǝra papa dook, i doopu gaya?" Íi yas doo gee to̱o̱ na wǝr. ⁶⁵ Uri i ma' tu'suku tuttǝ sǝ i bos muuga ullǝk sǝ i be̱'ru sǝ i doosu gee, "Dootǝm ina bo̱'rǝmkan!" Do̱o̱niya soojairǝi i pe'u sǝ i ɗu'u. ⁶⁶ De Biiturus pu gaptǝ kaaka ara gwa'akrǝ, waa kitakiiza gwaagirǝz uza zaa ullǝ. ⁶⁷ Og Biiturus ǝǝk ra'rǝ, sǝǝtǝ ullǝ mis sǝ doosu gee, "Mo̱o̱ bǝn apu naa Yeeso maza Nazarattaz." ⁶⁸ Ama sin sǝ doosu gee, "N me̱e̱ ina a yaan dookan pa." ⁶⁹ Se̱nza kiiza arkirǝz ugo sǝ gǝbǝn ma' dooska iya ipu arkirǝi, "Maza az pu íirǝ te'" ⁷⁰ Ama gǝbǝn sin pakki. Lo' topa iya ipu arkirǝi i doosǝ Biiturus, "Zǝmazi apu iirǝ te' no̱k mo̱o̱ maza Galiilizzi." ⁷¹ Ama ma' gba'tǝmka naa dǝ'ǝs gee, "N me̱e̱ maza az koo ina ipu dookrǝndǝ pa." ⁷² Sei kǝ́ǝz puutǝ kwiika. Biiturus sundo naa paka Yeesu doosuk gee, "Wo̱nka kǝ́ǝz nabo kwii dǝn ittǝnǝya a sinkǝn me̱e̱ke dǝn taanǝ." Zok tapsu sǝ go'.