¹ De Yeeso pu ri'gǝttǝ Gwaaga Billǝrǝ, muzǝ kubrubaiya ullǝi te' doosu géé, "Lamz, gwenum womra naa bile mǝs at." ² Doosu géé, "A og pu womra gbi'ta at ya? I daak bil molǝ a i veksǝk pal ularǝ paa pa." ³ De gau ge' a te̱ta zaitundǝkrǝ pou Gwaaga Billǝkrǝ, Biiturus, Yaakubu naa Yohana naa Andaraawus i de̱su ɓo'rarǝ. ⁴ "Doosmee, bǝnnazi sǝ netti bo̱'rumka ya? Anni yiik bǝlla netti pu bo̱'rumkǝndǝn ya?" ⁵ Yeeso ma' dooski géé, "Ge̱e̱nge̱n uza naa sǝǝrǝn pa. ⁶ Gǝnnga i zak ri'ra miilǝ sǝ i doo 'miizi Yesu' sǝ i yaas uri gǝnnga. ⁷ Ina gee ya'am naa doorǝka su' a ya'amdǝk, kai gbee baar pa, netti doole bo̱'rǝmka, ama ɓamna zaa den pa. ⁸ No̱k but ruukǝn but, gwant ruukǝn gwant. Dǝl lamrǝmka at gǝnnga naa busum. Eni se̱̱e̱kaa ɓerka baalǝkki. ⁹ Gamn naa gbaksa tok. I kamkpǝn ar bissǝ naa Ro'a Biilǝilǝ. I de'ek gomnai naa gwanirǝ mu' no̱k sedaakuma miim iirǝ. ¹⁰ Ama paka tingka Billǝk se̱e̱k dooka zok dǝrmerǝ yas. ¹¹ Ina kamǝn sǝ ina esǝn ar bissǝ kai gbe̱e̱ baar ina i dookandǝ pa. No̱k bǝllirǝ i eskǝn, iiyi i pak pa, ama Rumsa Billǝssi. ¹² Ungwanz esǝk ungwanz sǝ í iwu,rii daa naa waza ullǝz. Yangi i ruukǝn do̱'ga mariya íi no̱k i ikkpinik. ¹³ Koone̱e̱ya mu'uskǝn no̱k ri'ra miil. Ama ura we̱ngs zokaz kink keeska. ¹⁴ Ina og laatǝra na gomta baar na ma'tǝ ara to̱o̱pakrǝ (Ura zangǝz na me̱e̱), iya ipu Yahuudiyai ina no̱g gettǝ, ¹⁵ ura pu roolo paaz naa tiitǝ gwa'roo, koo na pe' una roo pa, ¹⁶ gǝ ura pu wo̱'sǝz kanaa gǝtǝ pe'ek yalurǝ pa. ¹⁷ Ama ina yirkurǝnni naa iya ipu naa yangii naa iya ipu amǝsǝk yanga lǝrirǝi ru'a eyirǝ! ¹⁸ We̱e̱rǝn Bil naa gau bǝlla tamrǝndǝ pa. ¹⁹ No̱k ɓerka baara gbi'lal pii a me̱'ɗǝ zok pa diga bǝlla Bil womǝn dǝllakrǝ haa ri'ak, gǝ bo̱'rǝmka bǝn pa. ²⁰ Sinaa Bil na ya'rǝ ru'ii pa, maza keekaz pii pa, ama no̱k iya i te̱e̱gii, ya'rǝpu ge̱'ma ru'uyirǝm. ²¹ No̱k riik uza na doosa géé, 'Gwenum, kweebaazi' koo 'Gwenum, aa az!' kaa esǝ timr pa. ²² Kweebaiya songbrǝi naa saariya songbrǝi i gbǝtǝk sǝ i bo̱'rǝ neta mǝssǝmdǝt sǝbo sǝǝrǝ ina i te̱e̱gii. ²³ Gbagǝn to' n doosǝnpu neeti ɓala. ²⁴ ama ɓǝrka baari na assapu ru'irǝ, tǝgra kamsǝk ubla, se'raasa okǝk pa, ²⁵ zosi i katǝk diga billǝ paa, gbi'kǝma pu billǝ paam lamrǝk. ²⁶ Erizi sǝ i og Waa Maz tiitǝkrǝ kolirǝ te' na gbi'kǝm naa oosa. ²⁷ Roozi sǝ tomtǝk tómbaiya ullǝi sǝ i toogǝs iya i te̱e̱gii diga ara dǝl naa billa paal kǝsǝnakrǝ yas. ²⁸ Kubrun una te̱' rumbrǝ. Ina og na ma'tǝ dangsni, i me̱e̱me̱n inge wumsa rektǝpu. ²⁹ Rii gǝbǝn ina og neta n doosǝnat bo̱'rumkarǝ, me̱e̱n inge pu dera pou sugognarǝ. ³⁰ Zǝmazi n pu dooskǝndǝ, bààsa as ark pa sei neta at yas na bo̱'rum. ³¹ Ara paak naa diik assǝk an, ama paka miik ark pa. ³² Ubla na bǝllǝ paa boo ura me̱e̱z pii pa, koo tómbaiya billǝ paai, koo Waa maz sei gwan Daa kotto. ³³ Gbagǝn tok, zo'on! no̱k i me̱e̱ bǝlla rool pa (Biita do̱o̱t doo géé: Gbagǝn tok! Zo'on sǝ i We̱e̱rǝ Bil no̱k...) ³⁴ Pii ni maza ree ginummaz, daa gwaaga ullǝk sǝ tos se̱niya ullǝi ina gbaa gwaagi, koone̱e̱ya naa to̱msa ullǝs. Doosǝ gyebba gwaage na gau naa nor. ³⁵ No̱k riik zo'on! No̱k i me̱e̱ bǝlla dangwanza naa gwaagaz gǝtkǝnak pa, koo naa nimz, koo naa teteeg, koo kǝ́ǝ́z na kwiitǝ, koo naa nit. ³⁶ Na gǝtǝ na gbakǝs, kaa ii sǝna oksa rumrǝ pa. ³⁷ Ina n doosǝn an doosǝn koone̱e̱ya: Zo'on!"