¹ Yeeso ma' kubruskǝni naa re̱'sa pak. Doo géé, "Maz uza baa inaabi sǝ ko'su sǝ ze̱' dura ɓo'ka innabizirǝk. Wom ar zo'ou sǝ esǝ baabai uri ba'eki ina gbaa.Sei ree ginum ar ukarǝ. ² De bǝlla apkpa nen tettirǝi go̱'tǝ, tomtǝ se̱nza ullǝz baabaiyirǝ naa kwe̱e̱tǝ nen te̱tti. ³ I ɗu'u i ne̱nu gǝǝ na' kotto. ⁴ Gǝbǝn tomtǝ se̱nz uza, i bǝsu zullǝ sǝ i ne̱nu naa dǝgsa zur. ⁵ Gǝ gǝǝ tomtǝ uza, ezi i ipsu. I ɗu' uri gǝnnga, i iu uri gǝnnga. ⁶ Pii na maz uza muzǝ gǝbǝn sǝ tomkpus, waza ullǝ íuwaz. Uzi ura tosiu ɓamsǝnarǝz. Doo géé, "I esǝk waza miiz gbikǝm." ⁷ Ama baabaiyi i dookǝn gwanirǝ te', "Ura pe'ek ɓintaz aa az, a ipsu sǝ ɓinta root na seesaa." ⁸ I kamu i ipsu sǝ i keesu ba' a ekirǝ sǝ i kosu. ⁹ Ri'ekigǝ ura naa baakaz bo̱'o̱k anya? Zak sǝ za wo̱'o̱s baabaiyi sǝ esǝ uri baaka rook. ¹⁰ I zangǝ ina rababai doon paya? 'Bìlla wombai i mu'us al uli gau kookǝzzǝ. ¹¹ An keetǝ Daa Billǝ, ama pu naa mǝsǝm aarǝ mu'." ¹² I íi kamkpa Yeeso ama i serum bansa mari, no̱k i me̱e̱me̱n pag re̱'sa pakki iirǝ paazi. I faks i daau. ¹³ Sei i tomtǝ Farisaawai na Hiriduyaawai uri ina kamsǝbou na yaa pakrǝ. ¹⁴ De i zaa, i de̱su géé, "Lamz, e me̱e̱me̱n mo̱o̱ una kassa naa paka mazzǝk pa, gǝ a yii be'sǝm marirǝ te' pa. A kubrusǝn paka Billǝ zǝmak. To̱o̱to̱n ara e eskǝn sook Kaisarrǝya koo to̱o̱ paya? Ena tog ya koo enaa tog paya?" ¹⁵ Ama Yeeso me̱e̱gǝsapu dangkaama iim, doosi géé, "no̱k an sǝ i gwege ya? Ettǝne dinaari n gwentu." ¹⁶ I kamtǝ Yeeso dinaariya rooz. Doosi géé, "Muug naa goosa ne̱e̱rǝssaa as ya?" I doo géé, A kaisarrǝs." ¹⁷ Yeeso doo géé, "Esǝn Kaisar ina ullǝn, Bil boo a ullǝn." Mǝssǝm kami naa ur. ¹⁸ Sadukiyaawai i zaa ullǝ, i doo géé ruukaa robaamrǝk pii pak. I de̱su géé, ¹⁹ "Lamz, Muusa biisee géé 'zǝǝza mazzǝz na wǝr sǝna dàà kiiz, amaa na ding waz pa so̱'oza ullǝz naa gǝǝs kiizi sǝna kinsǝ zǝǝza ullǝz waz. ²⁰ Uri i pii í gbansa,ura se̱e̱nzaz kam ki' wǝr i ding waz pa. ²¹ Sei ura gbo'uwaz gǝǝsu, wǝr dàà waz pa. Ura taazaz bǝn rii. ²² Íi gbansa yas, i ding yangi pa. Sa'kaa roozǝ kitakiizi gǝ wǝr. ²³ Ubla ruuka robaamrǝ ina ruutǝ, gakp kiiza ne̱e̱rǝzzi ya? No̱k ii gbansa yas i kamsupu kiim. ²⁴ Yeeso doosi géé, "No̱k ànni sǝ i yaa, no̱k i me̱e̱ pangna rababai koo gbama Billǝm pa paya? ²⁵ Ina ruu robaamrǝ kamkpa kiiz koo relaa kiimrǝk pii pa, ama ipu ni tómbaiya biilǝ paa yak. ²⁶ Ama ruukaa robaamrǝk rǝ paa gǝ i zangǝ paka Muusa bii rabaaza ullǝzzǝ paya, ni Bil pagǝn sǝ doo géé 'Miizi Biila Ibraahim dǝl, naa Billa Ishaaku rǝl, ara de̱rnu wo̱'sǝ roo ak paya?" ²⁷ Ur Billa wǝrkirǝlli pa, ama a iya naa zǝngsai rǝi. I yaapu bila." ²⁸ Muzǝ Lamiya Muusarǝ Ro̱'o̱knairǝi zaa sǝ gee ipu pakrǝn, og Yeeso bagi wessa. De̱s Yeeso, "Ro̱'o̱knaaza pazzi ar a yasai ya?" ²⁹ Yeeso iisu géé, "A araz uzi, Geen Israilaawai, Daa Billa aal pu muzǝ. ³⁰ Íin Daa Billa mo̱o̱l naa timra mo̱o̱l, naa zǝngsa mo̱o̱s na sundumeya mo̱o̱i naa gbama mo̱o̱m yas.' ³¹ Ittǝza rooz uzi, 'íim do̱o̱wiya mo̱o̱z ni a íin zura mó̱ndǝllak.' Ro̱'o̱knaaza ar eyiz pii pa." ³² Lamza Muusarǝ ro̱'o̱knairǝ ezi doosu géé, "Lamza wessaz! A doopi zǝma ge Bil pu muzǝ, gǝ uzaa goouwaz pii pa. ³³ Maz na íiu naa timr, naa me̱e̱ka, naa gbam yas sǝna íi do̱o̱wiya ullǝz ni zura gwandǝllak ar an bukǝska." ³⁴ De Yeeso og ni bagǝn pakki na ɓe'ruk doosu géé, "Apu aari na gwanta Billǝt pa." Diga ekirǝ koo uza sundǝ de̱ska Yeeso pa. ³⁵ Yeeso pu kubruskǝndǝ gwaaga Billǝkrǝ sǝ iisi doo géé, "No̱k an sǝ Lamiya Muusarǝ Ro̱'o̱knairǝi i doo géé Kweebaaz waza Daudarǝzziya? ³⁶ Dauda naa zura gwandǝl, yi' naa Rumsa Billǝs doo géé ' Daa Bil doosǝ daa a miiz, gam na' go̱'naa miikrǝ sei mina wo̱'sapu umkeereiya mo̱o̱i zannga'. ³⁷ Dauda na zura gwandǝl de̱ru 'Kweebaaz', bo̱'rǝ ga sǝ gau waza Daudarǝz ya? Bansa mariyi i ke̱' to' naa yaksa zok. ³⁸ Yeeso ge̱e̱si kubruskǝnaa ullǝkrǝ doosi géé, "Ge̱e̱nge̱n Lamiya Muusarǝ Ro̱'õ̃knairǝi iya i íi ko̱o̱lǝka naa yalǝna gbi'nan naa dǝ'ǝska ar yingurǝ te'ek, ³⁹ naa gǝ Do̱'ga Toriya Billǝ i íi gamna tǝnteya gbi'kiyairǝ Rora Billǝllǝ naa ar naasǝi. ⁴⁰ Gǝ i zambo tuuki, i íi we̱e̱rǝka Bil naa ye'eska pak no̱k mari sǝna okbo. I kink mu'uskaa gbi'kak. ⁴¹ Sei Yeeso gau popsa ar esǝkrǝ Gwaaga Billǝkrǝ sǝ gwen mari ni ipu me̱'kǝn we̱ēsǝk. iya naa zaudii gǝnnga i me̱' we̱e̱s gbi'sǝs. ⁴² Sei tuukǝz uzaa naa zaamaz zaa sǝ me̱' aninii ittǝkkǝ. ⁴³ Yeeso de̱r kubrubaiya ullǝi ar mukǝ sǝ doosi géé, "Zǝmazi n pu dooskǝndǝ, tuukuzza az essǝpu ina ar a koone̱e̱n iya i me̱ we̱e̱s in me̱'narǝn airǝ. ⁴⁴ Íi yas i kaa a pisi gǝnngandǝ sǝ i esǝ, ama ur naa zaama ullǝm esǝ we̱e̱sa pisus yas."