¹ De i zaa urshaliima, ipu pou Betfaazi and Bettani yiiga te̱ta zaitundǝkrǝ, yeeso to̱m kubrubaiya ullǝi ittǝkǝ ² sǝ doosi géé, "Ren waa dǝlla aarǝ mu' allǝ. Ina tor i oksǝk waa gumbaaza uza i me̱e̱ɗa dǝkupaz, bintuttunu i kamteu. ³ Uza na de̱sǝn géé "No̱k an sǝ i binsu ya?" doon inge "Daa Yeesu iu in lo'ok pa gǝtkunu." ⁴ I ri'gǝ in oks waa gumbaaz manarǝ goka kaaka allǝ, sei i bintu. ⁵ Mari uri ipu de'narǝ arkirǝ i doosi géé, "No̱k an sǝ ipu binsǝk waa gumbaazirǝ ya?" ⁶ I doosi ni Yeeso doosi ni doonak, mariyi yi daai i ri'gǝ. ⁷ Kubrubaiya ittǝkǝ eyi i kamtǝ waa gumbaazi Yeesorǝ sǝ i um yalǝna iin paa sǝ Yeeso na gau paa. ⁸ Mari gǝnnga i um yalǝna iin bilarǝ paa, uri i um dalǝta i ɓaatǝt. ⁹ Iya i ar mu' naa a i gǝǝ sa'ai i wo̱o̱gǝ sut, Hoosaana! Maza na sǝ̀'sǝ̀mazzi ura zaa riira Daa Billǝlaz. ¹⁰ Ina Sǝ̀'sǝ̀m rǝnni na gwanta daa a az Daudarǝ zakat! Hoosaana billǝ paa!" ¹¹ Yeeso tor urshaliima sǝ ree Gwaaga Billǝkrǝ sǝ gwendǝ at. De ar ku'tǝ ri'gǝ Betaaniya ur naa iya komna naa iitǝkkǝ iye. ¹² Ublaa buutǝkrǝ de i gǝtǝ diga Betaaniya, busum ma' go̱mkpu. ¹³ Og te̱' rumb ar ye'na naa dangs ookapa, re gwen koo bo kink a rewou. De ree oks una pa sei dangs kotto no̱k bǝlla ullǝ repkpa rǝlli pa. ¹⁴ Doosǝ te̱' rumbi géé, "Uza gǝǝk sǝgǝ reg nǝna mo̱o̱irǝ pa." Kubrubaiya ullǝi i geegen ina doo eni. ¹⁵ I zaa Urshaliima sǝ i tor Gwaaga Billkrǝ sǝ ma' nǝnka mariya i yiu naa a i yingǝ net Gwaagi rǝi.Vegrǝs teeburiya iya i gii we̱e̱sai rǝz naa ar gapta iya i yingǝ golirǝi. ¹⁶ Daa koo maz uza sǝ torǝn unaa yingurǝn arkirǝ pa. ¹⁷ Kubrusǝni sǝ doosi géé, "Pu biisǝnǝn géé, 'Gwaaga miik gakp gwaaga we̱e̱rǝkrǝk no̱k mari yas' pa ya? Ama i yerpu an wo̱o̱naa ruirǝk wi." ¹⁸ Do̱'ga Toriya Billǝi na lamiya Muusarǝ Ro̱'o̱nairǝi i gee ina doon, sei i yaanu ipkpa no̱k sǝr kamikan ullǝ no̱k bansa mari yas gee tingka naa kubruskǝnaa ullǝk. ¹⁹ Nimz yas i dàà dǝlla gbi'lal. ²⁰ De ipu arkrǝ naa nit, i og te̱' rumbi wo̱ks haa yiiserǝ. ²¹ Biiturus sunde sǝ géé, "Dangwanz, gwenum te̱' a à kamnu su' ak woksapu." ²² Yeeso iisi géé, Esǝn timr Billǝ." ²³ Zǝmazi n pu dookǝndǝ, ne̱e̱ya doosǝk ge' ak, ' Bil na ɓuga na ko̱sa gbonarǝz', na doo naa sinǝm ullǝ timlǝ pa ama esǝ time géé ina bo doon bo̱'rumka bon, Bil bo̱'o̱sku. ²⁴ No̱k riik n doosǝn, Kala ina i ooro iirǝ we̱e̱rǝkrǝn, esǝn timr inge bo kinikkin, gakp a mondǝn. ²⁵ Mona we̱e̱rǝk Bil, doole a ra'sǝssǝk koo ne̱e̱ya ina baar sugna ullǝn no̱k daa a mo̱o̱rǝ billǝ paaz sǝna ra'sǝssa aibeiya mo̱o̱i. ^{26 27} De i gǝtǝ Urshaliima gǝbǝn, Yeeso pu ri'gǝttǝ Gwaaga Billǝkrǝ te', Do̱'ga Toriya Billǝi naa Lamiya Muusarǝ Ro̱'o̱knairǝi i zaa ullǝ. ²⁸ I de̱su géé, Naa gbi'kǝma pammi a bo̱'o̱n neta at ya, gǝ ne̱e̱ esa gbi'kǝma bo̱'rǝnam ya?" ²⁹ Yeeso doosi géé, "N de̱skǝn de̱s muso. Doosne mii bǝn n dooskǝn gbi'kǝma n bo̱'o̱n nettim. ³⁰ Batismaa Yohanarǝz gǝ keetǝ diga Billǝya koo marirǝ ya. Bag ne." ³¹ I de̱skǝn sǝ i sinkǝn gwanirǝ te' géé, "Ana doo ange 'keetǝ paari', dook bonge no̱k an sǝ i esǝn timr paa paya?' ³² Ama ana ange 'keetǝ marirǝ', no̱k i serumsen mari, no̱k i kwesapu Yohana saaza Billǝzzi. ³³ Sei i bag Yeeso géé, " E me̱e̱ pa". Yeeso doosi géé, "Mii bǝn n dooskǝn koo naa gbi'kǝma pammi n bo̱'o̱n neetiz pa."