¹ Ar oonarǝ do̱o̱niya marirǝi na Do̱'ga Toriya Billǝi, naa lamiya Muusarǝ Ro̱'o̱knairǝi i tookǝn sǝ i kam Yeeso Bilaatusso mu'. ² Bilaatus de̱su gee, "Mo̱o̱zi gwanza Yahudaawai rǝz ya?" Iisu gee, "A doosapu." ³ Do'ga Toriya Billǝi i dogdǝn Yeeso pagn. ⁴ Gǝbǝn Bilaatus de̱su, "A bag naa una pa ya?" Geen pagnna ipu dogdǝkǝnarǝ am. ⁵ Ama Yeeso bag es pa, inni mǝs Bilaatus. ⁶ Bǝla naasǝllǝ Bilaatus ke̱e̱sapu fassiki pursunaaza i te̱e̱guzzǝ. ⁷ Maza iu zur iya i ru' mariirǝ gbe'narǝ pursunarǝ i de̱ru Barnabas. ⁸ Bansa Mari i zaa Bilaatussǝ sǝ i go'su wǝra ge na fassǝbou ni ke̱e̱sǝnak. ⁹ Bilaatus iisi gee, "I íi mina fattǝn gwanza Yahudaawai rǝz ya?" ¹⁰ No̱k me̱e̱me̱n Do̱'ga Toriya Billǝi i kamtǝ Yeeso ullǝ no̱k keerǝssi. ¹¹ Ama Do̱'ga Toriya Billǝi i sugrǝ mari ina doo gee boiiina fattǝbo Barnabazzi. ¹² Bilaatus gǝ doosi gee. "Mina bo̱'rǝ an naa gwanza Yahudaawairǝz ya?" ¹³ I wo̱o̱ sut gee. "Ɓaanu!" ¹⁴ Bilaatus de̱si gee, "Laks anya?" Ama i bagǝ wo̱o̱ka sut paari, "Ɓaanu." ¹⁵ De Bilaatus i gbopsiki timr, sei fassi Barnabas. ɗa' Yeeso sǝ essiu ina ɓaau. ¹⁶ Soojai i ri'gunu gwanirǝ ar bissǝ sǝ i to̱o̱kǝn ii yas. ¹⁷ I tǝ'sǝ Yeeso ruktan, sǝ i siu ku'sura kǝpteu sǝ i ku'su. ¹⁸ Sei i ma' tǝksku na' sǝ i doo gee, "E de̱'sa Gwanza Yahudaawairǝz!" ¹⁹ I vowu zullǝ naa gbala sǝ i tu'rusu tuttǝ. I gu' dii sǝ i dǝ'su. ²⁰ De i ɓamsapu gadǝmsku, i tussu ruktanzzi sǝ i assu yalǝna gwandǝn, sǝ i keenu rekarǝ ar ɓaanarǝ. ²¹ I pi' Simana sairinnaz (Daa a Alekszanda na Rufussǝz) keetǝ waa dǝl ularǝ na gum vaga rauwa Yeeso rǝu. ²² Soojaiyi i kam Yeeso ara i de̱r Golgootakrǝ (waato ara i de̱r ne̱nng zurak). ²³ I esu maama inaabirǝ i fǝǝgǝs naa miirram, ama mu'us bo'ka. ²⁴ I ɓaau sǝ i mas yalǝna ullǝn na billa wo̱ka wo̱gǝzzǝk sǝbo og ina koo ne̱e̱ya kinkan. ²⁵ I ɓaan Yeeso ak we̱e̱s piti muzǝzi. ²⁶ I bii gee "GWANZA YAHUDAAWAIRǝZ." ²⁷ I ɓaa rui ittǝkǝ na Yeeso, muzǝz na' go̱'narǝ, a muzǝz boo na' ukarǝ. ^{28 29} Iya ipu arkrǝi i rikǝ zur sǝ i doo gee, "Somo, mo̱o̱wa aka wa'as Gwaaga Billǝk sǝ aka wom ru' taareeik, ³⁰ kwe̱e̱m zura mo̱o̱ sǝ a tiitǝ vaga rauwirǝ!" ³¹ Rii gǝ Do̱'ga Toriya Billǝi naa Lamiya Muusarǝ Ro̱'o̱knairǝi i gadǝmi gee, "Kwe̱e̱ uri, ama le' kwe̱e̱ka zura gwandǝl pa. ³² Kweebaaz, gwanza Israilaawai rǝz na tiitǝ vaga rauwirǝ me̱, sǝ a og sǝ a esǝ timr." Iya i ɓaai yammai bǝn i iirǝsu leekrǝ. ³³ Diga we̱e̱s komna naa ittǝsǝ, tǝgra gbǝ'ǝs ar haa rakarǝ we̱e̱ taasǝ. ³⁴ Yeeso tǝg gwera paari gee, "Eloi, Eloi, laama sabaktaani?" ma'ana, "Billa miil, Billa miil, no̱k an sǝ a wiye ya?" ³⁵ Uri iya de' pourǝi i geeu sǝ i doo géé, "Ke̱'en to' pu de̱rk Iliyarǝ." ³⁶ Uza no̱k sǝ' igtǝ sooso maayaatǝmdǝ sǝ we̱' gbalarǝ sǝ yiisu na bo'. Maazi doo géé, "A zo' Iliya na za tiisku gǝ." ³⁷ Sei Yeeso tǝg gwera paari sǝ wǝr. ³⁸ Laabuya gwaaga Billǝkrǝz se̱s ittǝnǝ diga paari haa diiri. ³⁹ Soojaa de' sǝ yer muug Yeesorǝz og ni wǝrǝnak doo géé, "Zǝmazi maza az waza Biilǝzzi." ⁴⁰ Kitaki uri i pii i de' ar ye'na sǝ i gwen. Iirǝ te' iiyi, Maryaamu Magdaaliya, Maryaamu maiya Yaakubu rǝz naa Soloomi. ⁴¹ I pin Galiili ak i duu sǝ i gbaau. Kitaki uri gǝnnga gǝ i za oksu Urshaliima. ⁴² De nimz go̱'tǝ, no̱k ublaa go̱'ka zokrǝ no̱k ublaa ǝngǝskaa yahudaawairǝkki. ⁴³ Yusufu maza Arimaatiyaz zaa roo, ur maza i no̱o̱suzzi, pu muzǝ do̱o̱niya marirǝ pu bǝlla gwanta Biilǝt zakǝnakrǝ. Kee kaakarǝ sǝ ree Bilaatussǝ sǝ ooro wo'sǝka Yeesorǝk. ⁴⁴ Wǝrkaa Yeesorǝ ya'ak mǝs Bilaatus, de̱r sooja uza sǝ de̱su Yeeso na wǝrpu Zǝmagǝ. ⁴⁵ De gee sooja ezirǝ ge zǝma wǝrapu, esǝ Yusufu wo'sǝka Yeeso rook. Yusufu yiu yaluwa linin dǝu. ⁴⁶ Tiis Wo'sǝka Yeesorǝk diga vaga raurǝ sǝ ɓundus naa yaluwa linindǝ ewi sǝ iitu gagǝra i ke̱ diga biilǝllǝ. Sei giis lakkpa bil su' gagǝllirǝ. ⁴⁷ Maryaamu magdaaliya naa Matyaamu maiya Yoosi rǝz i og ara i ìin Yeesok.