¹ Lɔɔndya, Yesu bè tɛ̀ŋnɛ̀n Jɛnɛsarɛti nun kárbrê sɔ́ɔɔ̂ kpra, à jùmɔ̂ɔ̂ ki bɛ à kpar táè á tyé mɔ, Jɔnɔsɔ ǹ gbukɛlî toná besé, ² ki kúrn mɔ́n níin líɲɛ̀n ŋmɔ́n, à yɔfɛtêê ri lɛ̀ mɛ̀mun mɔ, yì b'án yɔɛ̀ɛ̂ tolóon à nunî blɛ̀ se. ³ Ki dé fù kúrn mɔ́n níinî mɔ mɔ́n byéen mɔ, fù bè Simɔn fù. Yesu k'à wú Simɔn se d'à w'à fɔn bɛlkwó à ɲáantyarî to kyáaŋne. Yesu bè ɲínɛ̂nɲɛ̀n à kúrnî mɔ, à b'à jùmɔ̂ɔ̂ kɛɛln. ⁴ À mùfɔn yì kɛɛln kɔ́ŋnè, k'à wú Simɔn se dé: «Á sukúrno à nun twáŋl fɔŋnî mɔ, yíi k'án yɔɔ̂ fe.» ⁵ Simɔn k'àn gbukɛlî mɔli dé: «Kɛlɔn, ŋmɛ́ɛn n'á byéen mɔŋmɛ̀ wóon tɛ́lè à klɛwɔɔ̂ mɔ, n̂ wo bóló ŋmɔ́n bo. Kɛ̀, án lôô ta, ń b'à yɔɔ̂ febɛ̂.» ⁶ Yì r'à yɔɔ̂ fɛ híin, yì ki yɛ́ɛŋn tyɛɛ́ŋ sɔ́ɔ ja, fóro à yɔɛ̀ɛ̂ ki b'á mɔgbɔ́ngbɔ́n kùnmɔ. ⁷ Yì krɔmɛ́ɛ̀ɛ̂ mun ni tɛ̀ŋnɛ̀n à kúrn máâ mɔ, yì ki fɛ̀ fɛ́ŋn á kpɛŋn ɔ yíi kyaŋ ɔ. Yì mùfɔn byɛ̀, yì k'à kúrn mɔ́n níinî nɔ̀nkurn wú yɛ́ɛŋn ɔ, fóro yì ki bè kyɛl kùnmɔ à nunî fùnɔn. ⁸ Simɔn, yì ri mùmun fɛ́ɛŋn dé Piyɛri, fù la máno à ŋmɔ́n híin, k'á kurkpé Yesu tɔŋn, k'à wú dé: «Ń Totɔn, á fɔn bɛlkwó mún to, bóló ɔ bo mún ki ŋmáantɔn ɔ.» ⁹ Àni yɔɔ̂ fɛ̀ɛ̂ k'à yɛ́ɛ̀ŋɛ̂ jà fáâ k'àkun n'á wɔ́se fɛ̀ɛ̂ nɔ̀nkurn wonkɔ́ŋnè. ¹⁰ Sebede dye-jɛɛ̂ ɛ̀: Jaki nì Yuhana, fɛ̀ mun ki Simɔn brashì tê ɔ, fɛ̀ won ki saaŋ kɔ́ŋnè. Kɛ̀, Yesu k'à wú Simɔn se dé: «Be yàntú bo, ki la gbɔ̀n kyáŋmɔ to, á bè jimiì ɲɛ́nbɛ̂ Jɔnɔsɔ se.» ¹¹ Yì k'á sɛbɛ à kúùrî ɔ, yì k'á kpɛŋnmɔ́ɛ̀ɛ̂ nɔ̀nkurn jél ta, yì ki kpé Yesu ta. ¹² Yesu tɛ̀ŋnɛ̀nî se dyɛ dyàn mɔ, túrbé láaŋ ǹ jàmun jɔ dyàn k'à ŋmɔ́n, fù jɔɔ̂ k'á kurkpé k'á ɲáa hlú à ɲáan ta à tɔŋn, k'à tonyɛl dé: «Ń Totɔn, á n'à toshɛ́, á ki mún kpɛ́lnja.» ¹³ Yesu k'á kpɛŋn ɲɛn à fléen, k'à wú à se dé: «Ń n'à toshɛ́, á ki kpɛ́lnja.» Fù tíkɛ́l byéenî mɔ à jɔɔ̂ ki kpɛ́lnjàè. ¹⁴ Fù la klɛ̀ híin, Yesu k'à yɛ̀n à jɔɔ̂ to dé: «B'àniî tokɛl dó se bo, kɛ̀ don á byéen yɛnké à flɛ́klɛrɔnî to, á ki kpɛ́lnbê ŋmɔ̂n flɛ́kwo án tofénébéê ŋmɔ̂nî ɔ Musa ǹ yɛ̀n fáâ to, fù b'à jéla jimiì k'à shu d'á ri kpɛ́lnjàè.» ¹⁵ Fù n'á nɔ̀nkurn mɔ, Yesu yinî ki li bénkúur nɔ̀nkurn se, fóro jimiì ri lɛɛ̀n ín tyɛɛ́ŋ sɔ́ɔ, yì ki bɛ yíi tobra àn gbukɛɛ̀lî tonáa ɔ, fù nì ki yì to lɛ́ɛ̀ŋɛ̂ kpɛ́lnja yì se. ¹⁶ Kɛ̀ Yesu r'á sukúurn li yì fur ín dyàno, ki don klɔŋnkúur se tonyɛɛlklɛ ɔ. ¹⁷ Lɔɔndya Yesu bè jimiì kɛɛln, à Farisiyɛ́ɛ̀ŋɛ̂h n'à tɔ̂ŋn yɛn kɛlêê máɛ̀ bè ɲínɛ̂nɲɛ̀n, fɛ̀ mun ni lɛ̀ Galile kìyɛŋnî dyɛɛ̂ nì Jude kìyɛŋnî dyɛɛ̂ nɔ̀nkurn mɔ, fù nì Jerisalɛmu dyɛɛ̂ ɛ̀. Diryɔŋtotɔn ǹ lotɔnbéê ri tɛ̀ŋnɛ̀n Yesu se ín, à bè fù rɔ láaŋrê kpɛ́lnjaàn. ¹⁸ À nɛn, jimiì dyɛ̀ ki jɔ dyàn mùrkômun gbɔ̀n bɛ à shínmɔ́n ta, yì r'à se ín, yì ki dé à nɔ, yì k'à shín Yesu ɲɛro. ¹⁹ Fù jimiìî w'à jɔɔ̂ rɔ á dɛ́ fá shi à jùmɔ̂ɔ̂ sɔ́ɔ se bo, yì ki dú à lɔ́ɔ̂ fléen à jɔɔ̂ rɔ, yì ki kwɔ́ kwáŋl à klɛ̀ɛ̂ mɔ, yì k'à n'á shîn mɔ́nî ɔ kyɛlno fù kwɔ́ɔ̂ se Yesu ɲɛro à jimiìî tyé mɔ. ²⁰ Yesu r'à jimiìî ǹ gbɔ hlɔ-jaâ hlɔ̀, k'à wú à jɔɔ̂ se dé: «Á to ŋmáanî ri jìrè.» ²¹ À tɔ̂ŋn yɛn kɛlêê n'à Farisyɛ́ɛ̀ŋɛ̂ ki fù gbɔɔ̂ kìsɛ̂ kùnmɔ dé: «Àni jɔɔ̂ ki gbò rɔ, à bè Jɔnɔsɔ yin nìnáan? Gbò ri ŋmáan jir hìn, à wo Jɔnɔsɔ ɔ bo?» ²² Yesu ki yì ǹ kìsɛ̂ gbɔɛ̀ɛ̂ hlɔ̀ɔ̂ se, k'à wú yì se dé: «À ri gbáno jà yíkun bè máno á kìsɛ́ɛn? ²³ Àni gbukɛl mɔ́n níinî mɔ fɛ́ɛŋntɔn lô ri nar? Á to ŋmáanî ri jìrè, fù lô ri nar dàà, dukú á ki kélî lô ri nar? ²⁴ Nɔkɔ́ŋl yíi k'à shu dé faŋ ri tèɲɛ̀n à ɲáan tyarî ta Jimin Dye-Jɛn to, à b'à nɔ ŋmáan jir hìn.» Fù se kwó, k'à wú à láaŋrɔn jɔɔ̂ se dé: «Mún n'à lóon ákún se, dukú á k'á shínmɔ́nî gbɔ̀n á ki don á sádi.» ²⁵ Fù la klɛ̀ híin, à jɔɔ̂ ki fyɛ̀ŋn dukú yì nɔ̀nkurn ɲíɲra k'á shîn mɔ́nî gbɔ̀n, ki dénno á sádi, à bè Jɔnɔsɔ súnkwɔ́ɔn. ²⁶ Yì nɔ̀nkurn wonkɔ̂ŋnmun bè Jɔnɔsɔ súnkwɔ́ɔn, yàn ki yì jà tɛ̀ŋndɛ̂ se, yì b'à lóon dé: «Ŋmɛ́ɛn la ɲa shɔ́ gbɔɛ̀ ŋmɔ́n.» ²⁷ Fù gbɔɛ̀ɛ̂ jìrɛ̂mun kwɔ́ɔn, Yesu ki li mímí, ki dénno martar-hlárɔn dyàn ŋmɔ́nké, yì ri mùmun fɛ́ɛŋn dé Lefi, à bè ɲínɛ̂nɲɛ̀n án klɛwɔ klɛ fɔŋnî mɔ, k'à wú à se dé: «Kpé ń ta!» ²⁸ K'án klɛ gbɔɛ̀ɛ̂ nɔ̀nkurn yɛŋnɲɛ̀n ta, ki kpé Yesu ta. ²⁹ Lefi ki fwɔŋn táaŋn Yesu se á sádi, martar-hlárɔn tyɛɛ́ŋ sɔ́ɔ tɛ̀ŋnɛ̀n ín, fù nì jimin máɛ̀, fɛ̀ bè tɛ̀ŋnɛ̀n à le le fɔŋnî mɔ yì wɔ́se. ³⁰ À Farisyɛ́ɛ̀ŋɛ̂ n'à tɔ̂ŋn kɛlêê k'á yɛŋn kɔ̀ŋnɔn kwɔ́ŋn kùnmɔ, yì b'à lóon Yesu ǹ kɛɛln-bishɛ́ɛ̀ŋɛ̂ se dé: «À ri gbáno jà yíi bè le leèn àni martar-hlárêê n'àni gbɔjáal-klɛrêê wɔ́se?» ³¹ Yesu k'à gbukɛlî mɔgbɔ̀n, k'à wú yì se dé: «Jiminî mun n'á kpɛ́ln ɔ, wɔŋklɛrɔn togbɔ wo fù se bo, à togbɔ mun la láaŋrɔn se. ³² Mún wo bɛ̀ɲɛ̀n bùkwɔ̀ɛ̀ŋ fɛ́ɛŋn ɔ bo, mún ni bɛ̀ɲɛ̀n gbɔjáal-klɛrê fɛ́ɛŋn ɔ, nɔkɔ́ŋl yì ǹ klɛ̀ gbɔjáalî hlɔ̀má ki dé yì se, yì ki kár gbɔjáal to.» ³³ Jimin máɛ̀ k'à wú Yesu se dé: «Yuhana ǹ kɛɛln-bishɛ́ɛ̀ŋɛ̂ ri nìnfwɔ́ɔŋn tòmɔ̀-tomɔ, yì bè Jɔnɔsɔ tonyɛɛln, à Farisyɛ́ɛ̀ŋɛ̂ ǹ kɛɛln-bishɛ́ɛ̀ŋɛ̂ saaŋ fù gbɔ mɔ́n byéenî klɛɛ̀n. Ta, ákún fù kɛɛln-bishɛ́ɛ̀ŋɛ̂ bè le leèn, yì bè lamɔ́ɛ̀ laàn.» ³⁴ Yesu k'à wú yì se dé: «Yíkun ni jɛn k'á nyɛ̀ tyɛ̀l gbɔ klɛfɔn à krɔmɛ́ɛ̀ tó búr hìn nìnfwɔ̂ŋn to yì bè tɛ̀ŋnɛ̀n à dè jɔɔ̂ wɔ́se a? ³⁵ Lɔɔndya à dè jɔɔ̂ bè gbɔ̀n lia yì tyé mɔ, fù lɔɔ̂ mɔ, yì bè nìnfwɔ̂ŋna.» ³⁶ Yesu ki saaŋ àni gbukɛɛ̀lî kɛl tɛl mɔ dé: «Jimin dó wo wâ fâŋl togbɔ́ɔn ki fù rɔ wâ klo bùtâr bo. Fù nì klɛ̀ híin, à wâ fâŋl gbɔ̂munî bè tɛɛŋna. À wâ fâŋl togbɔ̂nmunî n'à wâ kloô wo saaŋ ɲukwó hìn yíse bo. ³⁷ Jimin dó wo tyɛŋ búu gbɛɛ̀n bìfyɛ̀ŋn toklɔ̀mun mɔ bo, fù nì la klɛ̀ híin, à b'à bìfyɛ̀ŋnî bè gbɔ́ɔna, à tyɛŋɛ̂ ki fûrè, à bìfyɛ̀ŋnî ki nìnáê. ³⁸ Fù k'à lô ɔ dé tyɛŋ búu ri yanɲɛ̀n ki gbe bìfyɛ̀ŋn fâŋl mɔ. ³⁹ Fù se kwó, jiminî mun ni dɛlɲɛ̀n à bè tyɛŋ klɔ̀mun laàn, fù wo tyɛŋ búu ɲɛ́ɛn la ɔ bo, bóló ɔ bo à r'à shi dé tyɛŋ klɔ̀mun ni ɲɔn.»