¹ Yesu wo saaŋ gbârî mun ye fù gbukɛɛ̀lî kɛl kɔ́ŋn, k'á ɲáa tɔŋnkúr jɔ̀nɔ̀ ɲɛ, k'à wú dé: «Ń Tɔ Jɔnɔsɔ, gbâr la lò, à kwo á Dye-Jɛnî ki ŋmelɔnkrɔ̂ ŋmɔ́n, fù r'à jéla ákún Dye-Jɛnî k'à kwo ákún ki ŋmelɔnkrɔ̂ ŋmɔ́n. ² Ákún ki jimiì nɔ̀nkurn takɛl lo tɛ̀ fáâ to à to, nɔkɔ́ŋl ki dɔ kaarn shi tè ákún k'à to tɛ̀ jimiìî to. ³ Ta dɔ kaarn shi ŋmɔ́ɔnî ri lɛɛ̀n ákún hlɔɔ̂ se, ákún Jɔnɔsɔ sɛ̀bɛ̂ sɛ̀bɛ̂ sɔ́ɔɔ̂ ɛ̀, Yesu Krista ki shu, á ri mùmun tɔ́ŋ bɛ̀ɲɛ̀n. ⁴ Mún n'ákún ŋmelɔnkrɔ́ à ɲáantyarî ta, mún k'ákún ki mún to tɛ̀ klɛgbɔɔ̂ kwò mɔyîn. ⁵ Ákún kwó, ń Tɔ Jɔnɔsɔ, ákún la kyáŋmɔ à kwo mún ki ŋmelɔnkrɔ̂ ŋmɔ́n ákún blɛ̀ se, mún ni tɛ̀ŋnɛ̀n ín ŋmelɔnkrɔ̂ɔ̂ mun mɔ ákún wɔ́se díryɔ́ŋ ki kwɔ́ɔn búr. ⁶ Á ri jimiìî mun tɛ̀ mún to díryɔ́ŋ mɔ, mún n'ákún yinî yɛ̀n fɛ̀ to nɔkɔ́ŋl yì k'ákún shu. Fù jimiìî k'ákún fɛ̀ ɔ ín, á ki yì tè mún to, yì bè á kpɛŋnjaɲɛ̀n ákún ǹ kɛl gbukɛɛ̀lî to. ⁷ Yì la kyáŋmɔ à hlɔ̀ d'ákún ki mún to tɛ̀ mɔ́ɛ̀ɛ̂ nɔ̀nkurn lɛ̀ ákún se. ⁸ Fù bóló ɔ bo mún n'ákún ki mún se kɛl gbukɛɛ̀lî kɛlɲɛ̀n yì se, yì k'à ná; yì k'à shu hlɔtabê mɔ dé mún ni lìɲɛ̀n ákún mɔ. Fù nì yì ki ákún ki mún tɔ́ŋ bɛ̀ɲɛ̀nî hlɔja. ⁹ Mún ni ń tonyɛɛlî klɛɛ̀n yìkun mùn se. Mún wo ń tonyɛɛlî klɛɛ̀n díryɔ́ŋ jimiì se bo, kɛ̀ mún ni ń tonyɛɛlî klɛɛ̀n ákún ki mún to tɛ̀ fɛ̀ɛ̂ se, bóló ɔ bo yìkun k'ákún fɛ̀ ɔ. ¹⁰ Mɔ́n mun nɔkɔŋl ki mún fù rɔ, fù ki ákún fù rɔ, fù nì mɔ́n mun nɔkɔŋl k'ákún fù rɔ, fù ki mún fù rɔ, mún ni ŋmelɔnkrɔ̂ ŋmɔ́n yìkun se. ¹¹ Mún wo tɛ̀ŋnɛ̀n ká díryɔ́ŋ mɔ bo, yìkun bè tɛ̀ŋnɛ̀n díryɔ́ŋ mɔ, mún bè kɔ́ɔŋn ákún tɔŋnimɔ. Mún Tɔ Jɔnɔsɔ Féné, yì jaɲɛn á yin ta, á ri fù yinî mun tèɲɛ̀n mún to, nɔkɔ́ŋl yì ki tɛŋn mɔ́n mɔ́nbyéen árí ákún nì mún. ¹² Mún ni tɛ̀ŋnɛ̀n ín gbârî mun ye yì wɔ́se, mún n'ákún ki mún to tɛ̀ fɛ̀ɛ̂ jàɲɛ̀nɲɛ̀n ín ákún yin ta. Mún ki yì jàɲɛn, yì mɔ dó wo jɛɛl bo, fóro yì mɔ jɛl fù ri kwó kɛ̀, nɔkɔ́ŋl mùmun ni ɲúr ɲɛ̀nɲɛ̀n ákún ǹ gbukɛlî ɲwâr sɛ́bɛ̂ɛ̂ mɔ, fù ki kwo mɔyîn. ¹³ Mún ni la kyáŋmɔ kɔ́ɔŋn ákún tɔŋnimɔ, mún ni la fù lóon mún tɛ̀ŋnɛ̀nî wono díryɔ́ŋ mɔ, nɔkɔ́ŋl yì ki tɛŋn mún ǹ gbɔmɔnarbê mɔyînmunî mɔ. ¹⁴ Mún n'ákún ǹ gbukɛlî kɛl yì se, díryɔ́ŋ jimiì ki yì tojakwó, bóló ɔ bo yì wo díryɔ́ŋ jimiì wɔ́se bo, mún fáâ to ń wo díryɔ́ŋ jimiì wɔ́se bo. ¹⁵ Mún w'ákún tonyɛɛln á ki yì li li díryɔ́ŋ mɔ bo, kɛ̀ á ki yì taŋl Kɛ̀ŋlshì kpɛŋn. ¹⁶ Yì wo díryɔ́ŋ jimiì ǹ gbɔ ta bo, mún fáâ to ń wo díryɔ́ŋ jimiì ǹ gbɔ ta bo. ¹⁷ Yì tofénéja hlɔ ɔ: ákún gbukɛlî ki hlɔ. ¹⁸ Ákún ni mún tɔ́ŋ bɛ fáâ mun to díryɔ́ŋ mɔ, mún saaŋ máno yì tɔ́ŋno díryɔ́ŋ mɔ. ¹⁹ Fù nì mún ki ń byéen jélê ákún kpɛŋn, yìkun ki saaŋ á byéen jélê ákún kpɛŋn, ákún ki yì tofénéja hlɔ ɔ. ²⁰ Mún wo ń tonyɛɛlî klɛɛ̀n yìkun byéen déndén se bo dɛ́, kɛ̀ mɛ̀mun nì bɛ̀ á kɔŋn gbukɛl mɔ à yɛ̀n dé yíi ri mún gbɔɔ̂ hlɔjàɲɛ̀n, (mún ni ń tonyɛɛlî klɛɛ̀n) fɛ̀ se, ²¹ nɔkɔ́ŋl yì nɔ̀nkurn ki tɛŋn mɔ́n mɔ́nbyéen, árí mún Tɔ Jɔnɔsɔɔ̂ ri fáâ mun to mún mɔ, mún bè mún Tɔ Jɔnɔsɔɔ̂ mɔ. Yìkun ki saaŋ tɛŋn mɔ́n mɔ́nbyéen ŋmɛ́ɛn mɔ, nɔkɔ́ŋl díryɔ́ŋ jimiì k'ákún ki mún tɔ́ŋ byɛ̀ɛ̂ hlɔja. ²² Mún kwó, mún n'ákún ki mún to tɛ̀ lobéê tɛ̀ yì to, nɔkɔ́ŋl yì ki tɛŋn mɔ́n mɔ́nbyéen, árí ákún nì mún ni fáâ mun to mɔ́n mɔ́nbyéen, ²³ mún ki tɛŋn yìkun mɔ, ákún ki tɛŋn mún mɔ, nɔkɔ́ŋl yì k'á tityɛ́ŋn tɛŋn mɔ́n mɔ́nbyéen, díryɔ́ŋ jimiì k'à shu d'ákún ni mún tɔ́ŋ bɛ̀ɲɛ̀n, fù nì yì gbɔ k'ákún mɔnukwó, mún gbɔ k'ákún mɔnukwɔ́ fáâ to. ²⁴ Mún Tɔ Jɔnɔsɔ, ákún n'à jimiìî mun tɛ̀ mún to, mún ni tɛ̀ŋnɛ̀n tíkɛ́lî mun mɔ, mún n'à se fɛ̀ ki tɛŋn mímí mún wɔ́se, nɔkɔ́ŋl yì ki mún ǹ lobéê ŋmɔ́n, ákún ni lobéê mun tɛ̀ mún to, bóló ɔ bo mún gbɔ r'ákún mɔnukwɔ́ díryɔ́ŋ finɲɛ̀nî ki kwɔ́ɔn kwo. ²⁵ Mún Tɔ Jɔnɔsɔ sɛ̀bɛ̂ sɛ̀bɛ̂ sɔ́ɔ, díryɔ́ŋ jimiì w'ákún hlɔ̀ bo, kɛ̀ mún n'ákún hlɔ̀, fù n'àni jimiìî k'à shu d'ákún ni mún tɔ́ŋ bɛ̀ɲɛ̀n. ²⁶ Mún n'à klɛ̀ fɛ̀ k'ákún yinî shu. Mún b'à kwobɛ̂ yì k'ákún shu yé nɔkɔ́ŋl mún gbɔ mɔnarî mun n'ákún se, yì ki tɛŋn fù gbɔmɔnarbéê mɔ, mún ki tɛŋn yìkun mɔ.