¹ Gbɔkurnnɔkurn ɲɛ, ń ni ye sekɛɛ̀ln, yì ki Jɔsɔ tonyɛɛl, gbangbâr to jalmɔn, tonyɛl gbɔɛ̀, ɲɔnhlɔbê, jimin nɔnɔkurn ye mɔ, ² à faɛ̀ŋ, fù ni jimin mun ɲɛflɛ tɛ̀ŋnɛ̀n gbɔ mɔ à jela, n̂ ki ɲínɛ́n kwo bɛn nì ɲamɔgbâl mɔ Jɔsɔ ɲɛflɛɲɛ̀n nì telnbê mɔ. ³ Fù ri ɲɔn, fù n'à be Jɔsɔ tìyà fù mun ki n̂ Kɛŋltɔn ɔ, ⁴ Fù mun n'à shi dé jimin nɔnɔnkurn ki kɛŋl fù nì yì ki Jɔsɔ shu ɲɔn sɔ́ɔ. ⁵ Bóló ɔ bo, Jɔsɔ mɔ́n byéen ɔ fù nì gbɔ mɔtityɛ́ŋntɔn mɔ́n byéen Jɔsɔ nì jimin tyémɔ, fù mun ki Yesu Krista ɔ. ⁶ Fù mun n'à byéen tɛ̀ɛ ŋmɛ́ɛn nɔnɔnkurn tyɛl ɔ. Fù mun ki nishibê ɔ mun ni klɛ fù gbârî se. ⁷ Fù yɛɛn mɔ mún ki mɔ́n tityɛ́ɛn búr Jɔsɔ gbukɛl kɛl ɔ fù nì tɔtɔn ɔ. Mún hlɔ lóon, ń wo kɛŋn ló bo, mún mɔ́n tityɛ́ŋnɲɛ̀n, ń ki Jɔsɔ tohlɔ jarn tè kɛɛln Jɔsɔ to hlɔja gbɔ ɔ, fù nì hlɔ gbɔ ɔ. ⁸ Ń'à bese jɛɛ̀ ki Jɔnɔsɔ tonyɛɛl benkurn nɔnkurn se, ye b'a kpɛŋn toféné toŋnkrɔ, nirfún nì kisɛjɛl wo mun mɔ bo. ⁹ Ń saaŋ bese à méèlî ki wâɛ̂ nɛn mun yì ɲɛflɛ ɲɛn, yì bè gbɛɛ̀ kwo yan à klɛ fá to, yì be á yin tìn mɔntar b'à kɔŋn bo, sɛŋl, mɛmun tar kpâr, wâ tar kɔŋn be tɛŋn yì tonɛɛn mɔ́ɛ̀ bo. ¹⁰ Kɛ̀, gbɔɲɔɛ̀ɛ̂ ki tɛŋn yì tonɛɛn mɔ́ɛ̀, árí méèlî mun Jɔsɔ gbɔ àn klɛwɔ jirɲɛ̀n. ¹¹ Méèl k'à tokyɛl ki kɛln tonaan à kɔŋn kyɛ mɔ. ¹² Ń wo à shi mél ki kɛɛln tè bo, à be jɛn mél be kwo bo, à ki tɛŋn à kɔŋn kyɛ ɔ. ¹³ Fù bóló ɔ bo, Adama kyɛl ni brɛ fù kwɔ́ɔn Awa. ¹⁴ Adama kyɛl wo ɲinɛnbrɛ bo, à mél kyɛlmunî ɲinɛnbrɛ, ki nɛn kwo, fefeen gbɔ. ¹⁵ Fù nɔnɔnkurn mɔ, à bè kɛŋla ki tɛŋn dye kwɔŋ nɔ, à n'à ɲakpɛŋl kyaane Jɔsɔ tohlɔja mɔ, gbɔtìyàbê mɔ, fù nì niryɛŋn fénébé mɔ.