¹ Àni gbukɛlî ki hlɔ ɔ, mùmun nì tɛ̀ŋn Jɔnɔsɔ tɔŋnklɛtɔn, à ri ɲɔn ki tɛŋn klɛwɔ ɲɔn klɛtɔn. ² Fù tɔnî saaŋ ɲɔn ki tɛŋn nɛ kaarn jimin, mél mɔ́n byéen tyɛldɛ̂tɔn, ki tɛŋn jimin têlmun, ki tɛŋn gbɔɲɔn kɛɛlntɔn, ki tɛŋn kɛɛln tɛtɔn ɲɔn. Jiminî mun bè tonyɛɛl klɛɛ̀n nìrgbâl mɔ. ³ À wo ɲɔn ki tɛŋn tyɛŋ sɔ́ɔ latɔn bo, à bè tɛŋn nìrjaartɔn bo, ki tɛ̀ŋn tɛ kaarn jimin. ⁴ À ri yanɲɛ̀n ki tɛŋn dentɔn ɲɔn sɔ́ɔ, fù nì k'án bisháɛ̀ŋɛ̂ jìr ɲɔnbé ɔ, yì ki tɛŋn hlɔratê. ⁵ Fù bóló ɔ bo ákún mùmun n'à sádi jimiì jir fá hlɔ̀ bo á bè tɛŋna Jɔnɔsɔ ǹ lɔ́ɔ̂ takɛla? ⁶ À be tɛŋn jimin tojìr fâŋl bo, nɔkɔ́ŋl wojɛ́ɛnsɔ́ɔbè ki bɛ à gbɔnè ki bɛ nɛ fù ta bo Sutana nɛ fáâ to. ⁷ À yanɲɛ̀n ki tɛŋn Jɔnɔsɔ hlɔ kaarntê se jir sɛ̀bɛ̂, nɔkɔ́ŋl yì b'à dwankwó bo, nɔkɔ́ŋl à b'á níi nɛ́n Sutana ǹ káŋnéèê mɔ. ⁸ Jɔnɔsɔ ǹ twɔ́ɔŋnlorê yanɲɛ̀n yì tɛŋn flɛ́ɛ ǹ jatê jimin têlmɛ́ɛ̀, yì b'á fɔŋn bɛlkwó kɛɛŋn to, fù nì tyɛŋ sɔ́ɔ la. Yì bè tɔŋn ɲɛ́n fájaal ɲɛ́n bo. ⁹ Hlɔɔ̂ mun ni ŋmɔ́ɔn gbɔ hlɔjabê faŋ mɔ, yì ri yanɲɛ̀n fù ŋmɔ́n yì se yì nìryɛŋn ɲɔn sɔ́ɔ ta. ¹⁰ À ri ɲɔn yì ki tityɛ́ŋn tɛ́ŋlɛ́n wâ, nɛ fɔŋn wo yì to bo, fù wono yì ri tɛŋn hìn jùmɔ̂ ǹ klɛwɔ klɛrê. ¹¹ Méèl ki tɛŋn jir sɛ̀bɛ̂ɛ̂ se, yì be tɛŋn jimin yin ninátê se bo. Yì ki tɛŋn byéenjatê gbɔ kúur nɔ̀nkurn mɔ. ¹² Jɔnɔsɔ ǹ klɛwɔ klɛrê yanɲɛ̀n yì ki tɛŋn mél mɔ́n byéentê. Yì k'án bisháɛ̀ŋ nì án jiminbéè tityɛ́ŋnja ɲɔn sɔ́ɔ. ¹³ Jiminî mun ni klɛwɔ ɲɔn sɔ́ɔ klɛɛ̀n fɛ̀ ri ɲɛrobé ɲɔn sɔ́ɔ ŋmɔ́ɔn, à nìryɛŋn bè fwàr gbɔ hlɔja mɔ, fù mun ni ŋmɔ́ɔn Yesu Krista mɔ. ¹⁴ Mún ni ń kpɛŋnjàɲɛ̀n kyáaŋntɛ̀ŋn à tɔŋnimɔ kɔ́ɔŋnî to. Kɛ̀ mún n'àni gbɔɛ̀ɛ̂ ɲwáarn ń k'à tèno á to, ¹⁵ nɔkɔ́ŋl mún nì bè dál, jimin ni yanɲɛ̀n ki gbɔɔ̂ kwo Jɔnɔsɔ ǹ jùmɔ̂ fénéê se, á ki fù shu. Fù ki Jɔnɔsɔ lɛ̀ɛ̂ ǹ jùmɔ̂ ɔ, à be hlɔ fin nì à tityɛ́ŋn ɲɛn fɔŋn má. ¹⁶ Jɔnɔsɔ ɲɛhlóoô ki gbɔ sɔ́ɔ ɔ, gbɔ tyaaŋn wo mùmun mɔ bo. Jɔnɔsɔ r'á byéen yɛ̀n á tokwɛ̂l ɔ. Nawɔ fɔŋn ki tè à to Tɛ́l-Féné se. À mɛ̀kɛ̂ɛ̂ k'à ŋmɔ́n. Jɔnɔsɔ ǹ gbukɛlî ki jimiì kɛɛln tɔbiîŋ tyé mɔ. Gbɔ hlɔja ki à se díryɔ́ŋ mɔ, ki tɔŋnkúr ki dénno án lobéê mɔ.