¹ Daɣ adi zamas Ǝlməsix da taɣ əssa-net tənây alɣazab, kawanay da səmmutəgat y arat zun wen da. fəlas awedan wa iɣəzzaban əs təɣəssa-net daɣ anamod wen, wədi immizzay əd bakkadan. ² Awen daɣ a fəlas a obazan ɣur azala, ad wər tələsam šiyyit ən man-nawan təlkamam i deranan win aggadəm, kalar əlkəmat i tara ən Məššina daɣ awa din-iqqiman daɣ təɣəras-nawan. ³ Igd-awan awas kala tu-təgam, imosan awa əran aytedan wər nəssen Məššina wər təzlayam a təmmozalam, tətaggim arak deranan, təmosam imašwan n esmad. ⁴ Tətaggim tettay tagget, əd tassay tagget, təɣbâdam əssənəman əmosnen arat issiksadan. Amaran ark aytedan win isimaklal sər-san as dasan-wər-təlkemam daɣ arak mazalan win taggin əmosnen əsəssikəy aggen daɣ təmazrəyt, əqqiman amaran ɣaššadan-awan esəm. ⁵ kundaba əbdan fəl mazalan-nasan dat wa isammatagan y ad išrəɣ win əddarnen əd win aba. ⁶ Awen daɣ a fəlas win əmosnen inəmməttan əmərədda, da itiwamal-asan Ǝlinjil. Arat wen itiwagg-asan fəl ad awwaddaban əs təməwit tas tawaddaban aytedan daɣ əddənet, agin deɣ dəffər awen təməddurt a daɣ innoda Infas wa Zəddigan əs təməwit ta ira Məššina. ⁷ Təzərəst n əddənet təhôz. Ǝqqəlat aytedan əlanen əzzəbun tannadim daɣ man-nawan, fəl ad təfrəgam igi ən təwatriwen. ⁸ Zuzərat y arat kul ənəməra aggen gar-ewwan, fəlas tara, ənta a təhakkit təsureft ən bakkadan aggotnen. ⁹ Ǝqqəlat aytedan iha amagaru gar-ewwan əs man ərdânen. ¹⁰ Akkiyyan daɣ-wan agiwet i win hadatnen tənfa əs təhəkkut ta təgrawam s arraxmat ən Məššina. Ǝmmək di da as za təqqəlam inaɣlifan olaɣnen n arraxmaten aggotnen šin dawan-iga Məššina. ¹¹ I daɣ-wan iššewalan, aget awal n as Məššina a t-id-izammazalan. I daɣ-wan idahhalan imidawan-net, idhəlet-tan əs fərregat ta danaɣ-ihakku Məššina fəl ad itəwəsəɣmər Məššina daɣ arat kul, əs tarrayt ən ɣaysa Ǝlməsix. Ǝnta a ilan tarna, əd tanaya har faw Amin ¹² Imaran-in, ad wər əqqənan ɣafawan-nawan i təmsay n alɣazab ta kawan-təhat əddi təmos jarrba-nawan, a das-wər-tagim iduf n as igraw-kawan arat immittayan. ¹³ kalar isəffəliwəset-kawan as tədrâwam d Ǝlməsix alɣazab, fəl ad taknim təfalawist əd tədəwit assaɣa wa du-za-tənəfiləl tanaya-net. ¹⁴ Təbbilalam kawanay win tawarbadnen fəl as kawan-ila Ǝlməsix id Infas wa ilan tanaya, a t-imosan Infas ən Məššina, a dər-wan iddewan. ¹⁵ A kawan-wər-iggəz i iɣɣizzaban fəl igi ən man, wala škra, wala tišit n anasgafa, madeɣ awedan itaggazan šiɣawšiwen a tu-wər-nəqqel. ¹⁶ Mišan as tətaɣazzabam fəl tišit n əlməsixitan, a kawan-wər-isəkkərukəd awen, kalar sənnəməlat fəl Məššina, fəl awer wa kawan-iga esəm n Ǝlməsix. ¹⁷ Fəlas alwaq ewad-du wa daɣ z'antu əššəriɣa, amaran tamattay ta n Məššina as inta. Daɣ adi dad zamas nakkanay as issənta əššəriɣa-net, ma dər za talu təsəlkamt ən win wər nəzzəgzan s Ǝlinjil-net Ǝnnan Ǝlkəttaban Dad zamas aytedan win oɣadenen da gərrid as z'afsin, ¹⁸ ma dər z'alin win wər nəksud Məssina əššokalan daɣ igi ən bakkadan Daɣ adi win taɣassabnen daɣ əddənet fəl as əmmozalan tara ən ¹⁹ Məššina, aginet iman-nasan daɣ təɣlift n Ǝmaxlak n əkkulluk n arat, s ənta a imosan alɣadil, aglin daɣ əmazal n awa olaɣan.