¹ Ǝmərədda ad agaɣ ənnəsixatan əkkânen win daɣ-wan əmosnen imuzaran n Ǝlkənisat Ǝššewalaɣ-asan s esəm ən tišit-in əmuzar nak da, šilat-nasan, ² əmosa deɣ təgəyya n alɣzab n Ǝlməsix, əddewa dər-əs deɣ daɣ tanaya ta du-za-tənəfiləlat. Ǝdənat eharay wa kawan-issəɣlaf Məššina. Ǝssənat daɣ-as s a wər nəmos əššil, kalar əs man ərdanen s əmmək was ira Məššina Ad wər tətaggim adi fəl tara n əddənet, ³ kalar taggiwat-tu s əwəl iglayan Ad wər tətaggim adi s əddəguz ən məzzəgzan win kawan-tawasaɣlafnen, kalar agiwat-as igi a daɣ təmosan almasal olaɣan i tamattay ən Məššina. ⁴ Ǝddi assaɣa wa du-z-inəfiləl əmuzar ən madanan n əlməsixitan, ad təgrəwam maruzat təmosat təkəbbut ən tanaya wər nətəməndu. ⁵ Ǝmmək en daɣ as əɣreɣ aytedan win əmosnen təmmədrəyt s ad abbardagan i muzaran n Ǝlkənisat. Daɣ tassaq ta təgam, əqqəlat aytedan əssirasnen iman-nasan, gar-ewwan, fəlas a ənnan Ǝlkəttaban Məššina irnâz y aytedan win əzzəzwarnen iman-nasan, amara win əssərasnen iman-san arraxmat-net a tan-ihakku. ⁶ Sərəsat iman-nawan dat Məššina di ən Məššis ən tarna, fəl a kawan-izzəzwər alwaq was otas. ⁷ Agiwat talɣiwen šin kawan-əššəwašnen kul daɣ təɣlift ən Məššina, fəlas ənta a daɣ-wan issanan. ⁸ Ǝqqəlat aytedan ənnodanen daɣ man-nasan, tənkədam. Azangaw-nawan Iblis, itiɣələyɣələy-kawan zun ahar ihhirnanan, igammay i ijalaqqat. Ǝgdəlat-as iman-nawan, s ad təsəggətəkkem daɣ əzəgzan. ⁹ Təssânam as imədrayan-nawan daɣ əzəgzan, taggin alɣazab olân əd wa da tətaggim əddi daɣ adag kul wa əhan daɣ əddənet. ¹⁰ Məššina di n Ǝməggi n arraxmat, s ənta a kawan-d-iɣran əs tanaya-net təɣlat daɣ tassaq d Ǝlməsix, ənta iman-net as dawan-italam fəl man, isisuhit-kawan, ihakk-iwan fərregat n ad təzəzzəwem daɣ əzəgzan, ¹¹ dəffər as təgâm arat ən tamert n alɣazab. Ǝnta a ilan tarna har faw Amin ¹² Ǝgeɣ-awan-in arat ən batuten šin əssiktaba Silfanus imosan amadray-nana n alɣadil, əmosnat ənnəsixa y-awan əd təgəyya y-awan as arraxmat ən Məššina ta n tidət, ənta əddi da təgrawam əddi təzizawem daɣ-as. ¹³ Təhul-kawan-in Ǝlkənisat ta n əɣrəm ən Babəylon, as Məššina a tat-isannafranan zun awa dawan-iga. Barar-in Markus da ihul-kawan-in. ¹⁴ Nəsəsləmat ketnawan əs təzələmma šin tinəməggin mədrayan. Ig-awan Məššina alxer kətnawan kawanay a ərtaynen d Ǝlməsix