¹ Kamatay deɣ šidoden, bardagmat i meddan-nakmat. As təgamat, kul imos as wiyyad daɣ-san wər əzzəgzanan s awal ən Məššina da, as hannayan alxal-nakmat olâɣ zəddig, hannayan deɣ saɣmar wa dasan-təgamat, ² a sər-san d-awəy awen əzəgzan da wər dasan-təššewalmat. ³ Ad wər əqqəlnat təhussay-nakmat arat iwâran azzahir ɣas, du-wər-eway ar əzzənəfan ən latafan wiyyad əmmittaynen, ⁴ madeɣ uɣənan n urəɣ, wala šibəddaɣ əknanen əzzəwi. kalar əgməymat šihussay šin əɣbarnen daɣ əwəl, s əntanatsy a wər nəgəmməd, əmosnen talmat d əsənsi ən tayttay. šihussay den da šin əknanen təla n almaqam ɣur Məššina. ⁵ Ǝnta den daɣ əmmək was dallagnat tədoden šin dat awa a əskatnen əs Məššina əgânat daɣ-as attama-nasnat, əbbirdagnat i meddan-nasnat, zun Sarata, s awa təga y Ibrahim daɣ ədərdəg, a das-təgannu məšši. ⁶ Ǝmərədda kamatay mosnen šibararen-net, as imos as tətamazalmat awa olaɣan a daɣ wər toyyemat iman-nakmat təggəz-kamat tasa n arat waliyyan. ⁸ Xasil iliwat tayttay iyyadda, tilem tafrəyt i təkmawen n aytedan kul. Ǝqqəlat aytedan a daɣ təggət tara ta təllat gər mədrayan d əlluɣ d iban zazwar ən man. ⁹ Ad wər təzazalam daɣ aytedan win daean-tagganen təkma wala takaggaran-kawan. kalar tattarat-asan a dasan-igan arraxmat, fəlas awen da as tətawaɣram s a tu-tətaggim, fəl ad təqqəlam iməkkusa ən maruzat ta dawan-tənsat. ¹⁰ Ǝnnan Ǝlkəttaban As ira awedan ad igrəw təməddurt a daɣ iddəwat, ifaw-du fall-as ijilan a daɣ inniflay, wədi agəzet iləs-net daɣ təkma, ¹¹ igdəl-as əlləfəd n awa imosan šikərras. Isənnəməggəget iman-net əd təkma, ad itamazal awa olaɣan. Igməyet alxer, iššikəl daɣ-as. ¹² Amaɣlol iswâd daɣ aytedan win oɣadnen, amaran iqabbal šiwatriwen-nasan. Amaran win əššokalnen daɣ təkma, akyud a tan-iga ¹³ Awak ma imos wa dawan-z-agin təkma as imos as təsigatakkem daɣ əmazal n awa olaɣan ¹⁴ Amaran as imos as affaw-du fall-awan əzəl iyyan a daɣ təɣɣizzabam fəl as təmmozalam awa oɣadan, wədi təbbilalam Ad wər tiksadam awa əksudan aytedan, amaran ad wər əɣšədan man-nawan. ¹⁵ Zəzwərat daɣ wallan-nawan Ǝlməsix imosan Ǝməli, tardim as ənta a imosan Ǝmizdag. Səmmutəgat faw y əsəssəgri n awedan kul wa kawan-issəstanan daɣ batu n attama wa təgam. ¹⁶ Awen amaran agiwat-tu əs talmat əd saɣmar n aytedan. A tu-wər-iməl arat waliyyan a daq-qawan təha tərək. As iga adi edag iman-net wa daɣ sər-wan tawagginat batuten əbrarnen, a daɣ-as kərukədan aytedan win jajargannen alxal olaɣan wa təgam daɣ taəssaq-nawan d Ǝlməsix, ¹⁷ fəlas ofa ad aɣɣazab awedan itamazalan əlluɣ, as imos as awen daɣ a ira Məššina, y ad aɣɣazzab awedan itamazalan təkma. ¹⁸ Ǝlməsix iman-net iga alɣazab iyyanda, aba-tu fəl bakkadan n aytedan. Ǝnta wa n alɣadil, daba-tu fall-awan kawanay a wər nəɣdel, fəl a kawan-izənnəmihəz əd Məššina. Təmattant ta n təɣəssa-net a iga, mišan iddar-du əs tarna n Infas wa Zəddigan. ¹⁹ Amaran tarna n Infas wa zəddigan as igla Ǝlməsix iga təlxutbat i win əhanen alaxirat əɣfâlan Aytedan win əntanay as kala ad əffəllagan əs Məššina daɣ azzaman ən Nux. ²⁰ Azzaman di izizaydar Məššina iqqâl y ad iɣrəd Nux akaras n əɣlal-net. Ǝtamn aytedan ɣas a əggaznen aɣlal wen əragan-du daɣ akonak wa n Nux. ²¹ Arat wen əlmital a imos n alamaɣ daɣ aman was ənta a kawan-issəfsan əmərədda əs tarna tas d-inkar ɣaysa Ǝlməsix daɣ təmattant Alamaɣ wa wərgeɣ əšrəd ən šiday fəl təɣəssa a imos, kalar igi n arkawal dat Məššina əs man wər təha tərək waliyyat a t-imosan. ²² Illikan as ɣaysa Ǝlməsix a d-obazan ɣur əgəzzəy-net əs jənnawan, iqqim daɣ əɣil ən Məššina, angalosann əd təmənukəla kul əd taɣmaren kul əbbirdagan-as.