¹ Daɣ adi sənnəməggəgat iman-nawan d a imosan əzzəngu, əd təkərras, əd təlmənufəqa əd manjaɣ, d əzgən. ² Awal ən Məššina zun ax wər nəqqer a dawan-imos. Agiwat-as tara ta taggin bararan əs səket əhəwan y əx, fəl a kawan-issədwəl daɣ tišit-nawan əlməsixitan. ³ Tara ten da a das-za-tagim as imos as tənayam kawanay iman-nawan awa dər ogda əlluɣ n Ǝməli ⁴ Zənnəmihəzat iman-nawan d Ǝməli s ənta a imosan təhunt təddarat, tas aytedan za əgaran-tat-in, ɣur Məššina amaran ənta a təmosat təhunt ta tənnəfranat təla almaqam. ⁵ Dad zams kawanay da təmosam zu təhun əddarnen, itawakras sər-wan ahan n əlɣibada ən Məššina əs tilalt n Infas wa Zəddigan, wədi təqqalam ilimaman zaddognen hakkinen šikutawen šin imal Infas wa Zəddigan s əntanatay a əgraznen i Məššina əs tarrayt ən ɣaysa Ǝlməsix. ⁷ Daɣ adi kawanay a əzzəgzannen, təkf-iwan təhunt ta ətəwəsəɣmar. Aytedan amara win wər nəzzəgzan əssənanet as Təhunt ta din-əgaran makrasan, ənta a təqalat təhunt ta təkbalat ehan. ⁸ Amaran təhunt ta təmos təsənkəft y aytədan, tətagadl-en. Təhunt ten nakkafan-as aytedan, tətagadl-en, fəl tugəyt ta əgan s ad əzzəgzənan s Awal ən Məššina, amaran tugəyt ten da a dasan-tətawatasat. ⁹ kawanay amaran Tawšet tənnifranat a təmosam, tiddawat ən limaman ən Məššina di n Ǝmənokol, təmosam harwa da aɣrəf iskatan əs Məššina, təmosam deɣ tamattay-net. Ikkas-kawan-du fəl ad təmmalam igitan simaklalnen, win iga id ənta a kawan-d-iɣran daɣ šiyyay, ig-iwan daɣ ənnur-net isinahalan əmələwləw. ¹⁰ kawanay dat awa, wər təmosam fadda tamattay, amaran əmərədda təqqalam tamattay ən Məššina Dat awa wər təgrewam əhənətta fadda, əmərədda amaran təgrawam-tu. ¹¹ Imaran-in dad zamas əddənet a inaftaɣan əd ɣərab a daɣ-as təmosam, wədi onsâyaq-qawan ad tənəməggəgam d arak deranan win aggadəm, fəlas əntanay a əmosnen izənga n əzəgzan-nawan. ¹² Ad wər tammazzayam d alxal wa olaɣan dat aytedan win wər nəksud Məššina. Ǝddi as imos as sawaran-kawan bahutan ən tišit ən nəsgufa, imoan-nasan as z'ənəyan igitan olaɣnen win tətaggim daɣ anamod wen, awəy-du sər-san awen saɣmar n Ǝməli əzəl wa du-z-asu ¹³ Bardagat i muzaran-nawan kul fəl udəm n Ǝməli, gər əmənokal s ənta a ixkaman fəl arat kul, ¹⁴ wala deɣ inaxkiman-net win d-izammazal imos əššəɣəl-nasan əwəddəb n aytedan win tagginen təkma, əd tahakkay n almaqam i win tamazalnen awa olaɣan. ¹⁵ Məššina a ira ad tətaggim awa olaɣan fəl ad tədbəɣam imawan n ark aytedan n aljahilan. ¹⁶ Agiwat alxal ən lallan, mišan əlləllu-nawan a tu-wər-tagim arat a daw təssolamam aššar, kalar taggiwat imazalan n as təmosam eklan ən Məššina. ¹⁷ Səɣmərat aytedan kul. Iriwat imədrayan-nawan kul daɣ əzəgzan. Iksadat Məššina, təssəɣməram imənokalan-nawan. ¹⁸ Eklan, bardagat i məssawwan, tagim-asan saɣmar kul wa kawan-iwaran, gər za əmosan aytedan olaɣnen, lammodan, ¹⁹ wala deɣ əmosan ark aytedan labasnen, fəlas arraxmat a imos ad izmər awedan, izəzzəydər d alɣazab imosan tadləmt, as imos âs təkatawt ən Məššina a fəl iga awen. ²⁰ As imos as təgeɣ abakkad, imos aroz wa təgrəwa daɣ əzəzzəydər d attadib n awen Mišan ya as imos as təmosaɣ awedan itamazalan awa olaɣan, amaran təzmâra y ətəwəzəɣəzzab imosan tadləmt, wədi əssən as arraxmat a təgrawa ɣur Məššina ²¹ Awalla, ənta da da awas tətawaɣram, fəlas Ǝlməsix iman-net da iɣɣizzab fall-awan, oyy-awan-du almasal, ²² fəl ad təlkəmam y awa iga. Ǝlməsix amaran, ənta as wər kala ad iga abakkad, za wala iga bahu y awedan waliyyan. ²³ Ǝnta a iyyəwanan ətəwərbad, mišan wər izzəzal. As itawazaɣazzab, wər iga arak batu y awedan waliyyan, kalar talɣa-net kul as tat-iga daɣ əfus n Ǝmašraɣ wa Oɣadan a t-imosan Məššina. ²⁴ Ǝnta deɣ a itawataytayan fəl təgəttawt, idkal ibakkadan-nana, nəga əd bakkadan ənəməggag wa təga təməddurt əd təmattant, fəl ad nagu təməddurt a daɣ noɣâd. Daɣ adi Ǝlməsix ənta a kawan-izzozayan əs busan win daɣ-as tawagganen. ²⁵ Ǝstizarat təmosam zun ayfed əssiggalnen, mišan əmərədda təqqalam-du amadan-nawan, s ənta a imosan əmagaz ən man-nawan.