1
Awa nak butros imosan anammazul ən ɣaysa Ǝlməsix, a din-ihulan iməzzəgzan win wazawaznen, əmosan iɣərab daɣ kallan ən Fontəs, əd Galatəya, əd kabadokəya, d Asəya, əd Bitinəya.
2
Isinafran-tan Məššina di n Abba harwa dat alwaq əs masnat-net d ənnizam-net Ig-en aytedan a sər-əs əskâtnen s əssəbab n Infas wa Zəddigan fəl ad abbatdagan i ɣaysa Ǝlməsix, təwəzəzdəgan deɣ s əzni-net. Məššina ya təzizabbe-du fall-awan arraxmat, d alxer wər nəla əddukad.
3
Təmmal i Məššina di n Abba n Ǝməli-nana ɣaysa Ǝlməsix. Təhanint-net wər nəla əddukad as danaɣ-iga aytedan əgânen təhəwt taynayat, fəl ad nagu təməddurt tgât s attama ittiddan, s əssəbab ən tanakra ən ɣaysa Ǝlməsix daɣ təmattant,
4
nəgrəw deɣ təkasit n arat wər nətəməndu, wət itəmədis, za wər itəbəkəssit, a dawan-itiwagazan daɣ jənnawan. kawanay a ogaz Məššina əs tarna-net,
5
fəlad əzəgzan a təgam, fəl ad təgrəwam efsan.Efsan win isimatak-kan Məššina fəl ad təwəgrəwan daɣ azzaman win əɣrud n əddənet.
6
Isəffliwəset-kawan awen, kuddeɣ as əmərədda ihhiššal akawan-zəzzəkənzəran jarrabatan əmosnen əzzənəfan, mišan ya awen wər z'ihag.
7
Jarrabatan win, əntanay a sataddiinen assahat n əzəgzan-nawan ogaran urəɣ almaqam. Urəɣ iman-net wər iɣlel, amaran temsay a daɣ itawaggu fəl ad itəwəssən kud imos wa n ələsəl wala. Ǝzəgzan-nawan da za kundaba itawajarrab. Ǝddi amaran, assaɣa wa du-z-azzabbat ɣaysa Ǝlməsix, itəwəsənəfiləl y əddənet ketnet, ad təgrəwam təmmalen d ədkul əd saɣmar, s əssəbab n assahat n əzəgzan-nawan.
8
ɣaysa Ǝlməsix tərâm-tu təzzigzanam sər-əs da wər tu-tənayam harwa da. Awen daɣ a fəl təgam təfalawist as tu-wər-illa i ifragan emel-net za wər tu-təlla tulat-net.
9
Təfalawist tədi təgâm-tat fəlas aggad a təgam əlməxsud n əzəgzan-nawan, a t-imosan agaraw n efsan.
10
Efsan win di, əyyəwanan ənnəbitan win əmalnen arraxmat ta dawan-z-agu Məššina agamay d əgərri-nasan.
11
Ǝdgâzan wəllen daɣ ad əssənan awa mosan azzaman d alxalaten, win z'assakninen awa imal Infas n Ǝlməsix. Infas wa, illa ɣur-san kala da; amaran imâl-asan alɣazab wa z'agu Ǝlməsix əd tanaya ta du-za-təlkəmat y awen. Isannafalal Məššina y ənnəbitan as isalan win d-əgrawan den, wərgeɣ əntanay a d-əkkan, kalar kawanay a d-əkkan, iwâr-tan a dawan-tan-agin.
12
Isalan win əntanay a dawan-əmalan məssəsəɣra win sasaɣrinen Ǝlinjil əs tilalt n Infas wa Zəddigan. Infas wa, ijənnawan a daɣ d-itawasagla. Ǝlinjil, angalosan da sidaranan wəllen masnat-net.
13
Dad zamas tayttay-nawan təsimatag y əššəɣl, təttafam deɣ alwasat daɣ arat kul, wədi agiwat attama-nawan ketnet daɣ arraxmat ta za təgrəwam ɣur əzəbbi ən ɣsa Ǝlməsix d ənəfilal-net y əddənet.
14
Bardagat y Ǝməli-nawan, awa taggin bararan y abba-nasan, tammazzayam d arak deranan win as kalava tan-tətaggim harwa ad təmosam aljahilan.
15
Ǝmmək was zəddig wa kawan-d-iɣran əs man-nət, əmmək en daɣ as kawan-iwar ad izdag alxal-nawan kawanay da,
16
Fəlas iktâb as izdagat, fəlas nak əmizdag a mosa. Amaran dad zamas təgannim daɣ təwatriwen-nawan Abba i wa wər nəzlay aytedan,
17
kalar ixkkam akkiyyan daɣ-san əs mazalan-net, daɣ adi agiwat təməddurt a daɣ təksudam Məššina daɣ azzaman win əmərədda, a daɣ təmosam inaftaɣan daɣ əddənet.
18
Alxal wa dawan-d-oyyan marawan-nawan wər infa wala. Təssânam as Məššina irzâm əlqim zəwwəran y akawan-d-ikkəs daɣ anamod ən təməddurt wen.
19
Amaran inazzan win den, wər əgen s əzrəf, wala urəɣ a mosnen aratan tamandinen, kalar azni ilân almaqam wəllen n Ǝlməsix as əgan. Azni wa, iha əlmital n əzni n ajaɣol wər nəga əlɣib.
20
Ǝlməsix təga fall-as masnat dat əxluk n əddənet, amaran itawasanafalal daɣ azzaman win əlkamnen a fəl əddəlil-nawan.
21
Ǝddəlil-nət a fəl təzzəgzanam əs Məššina s ənta t-id-issənkaran daɣ təmattant ikf-ay tanaya. Adi a d-ewayan as təzzəgzanam əs Məššina təgam daɣ-as attama-nawan.
22
Təzzizdagam iman-nawan s əbərdəg wa təgam i tidət fəl ad tagim ənəməra igân s əwəl iyyanda, awa taggin mədrayan Daɣ adi akniwat ənəməra igân s əwəl iyyanda, awa taggin mədrayan.
23
Daɣ adi akniwat ənəməra əs wallan zaddognen. Ǝssənat as təhəwt taynayat a təgam təlât ələsəl iɣlâlan, wərgeɣ təhəwt ta n aggadəm təmosat arat wər nəɣlel. kalar awal ən Məššina iɣlâlan ihakku təməddurt a imosan ələsəl ən təhəwt ta təgam da.
24
Id iktâb as Aggadəm wər izlay əd yel, tanaya-net deɣ ketnet wər təzlay əd təjigay ən yəl. Yel amaran taɣart a itag tərtək təjigay-ney,
25
mišan awal wa n Ǝməli ənta, ill-ay, iɣlâl. Amaran awal wen Ǝlinjil wa dawan-ittəmalan a t-imosan.