¹ Bo ni ba todo ngule mudibe yéna ghu tso yitini cha tsènguè yaba gadaréniens. ² Va Jesus a pole ghu tso mbungu, mutu wabade na manioni mamabi na buane na ndè, ndè polenga ghu tso mapechi. ³ Mute muènè a tsaghelenga ghu tso mapechi. Mute ti mumochi asa mbé toghele ndè kuate vè, kiti na baghade ndè na mapangue, na bitèli mu mile mièndi. ⁴ Ndè na tabelengue mapangue na bitèli muènè. Mute ti mochi asa bade na bungudi bua kuate ndè vè. ⁵ Nianga na butsughu, ndè tsaghelengue ghu tso mapéchi na ghu yule mikongue. Ndè na buamegue mbuli a mbuli, na nèmeneguè mapode na mamani ma ménga. ⁶ Va ndè talele Jesus ghu vale, na yènde matine, na some mabongue va buse buèndi. ⁷ Na sa muchimene wa munéni, ndè na lèlè ndé: tchiambe na va fuèchi a bése nawe na, Jesus, muana Nzèmbi wa ghu yule? Mu ndogha Nzèmbi, mè bonde wè mé, ya tchise mè tchighi. ⁸ Jesus na yambele na ndè ndé: Pole ghu tso niute a mute wu, lenioni lelebi. ⁹ Jesus na fule ndè ndé : Ndogha wuè na? Ndè na yaghele ndé ndé: Ndogha mè yinombe muti bése manioni mamabi mvua movè le lidi ghu tso nuite a mute wu. ¹⁰ Va ka ni va manioni mamabi ma baghabeghe lèlè Jesus bo ya tchindeghe bése vale na kèse yi. ¹¹ Lekèse muènè dimbe la bangule la tchiadenga ngule yikondeke yéna. Va ka ni va manioni mamabi ma bonde Jesus bo: Chinguese bése le yèndè ghu tso dimbe la bangule banebe. ¹² Jesus na chinguese bo musade lo. ¹³ A vana manioni muènè mamabi ni ma pole ghu tso niute a mute muènè ni ma ninguele ghu tso bangule. Dimbe la bangule muènè la bade wo bomba mitochini miole, ni la ragha ghu tso mudibe, ni la niongue. ¹⁴ Bakéli ba bangule ni ba yèndè ni ba lèlè lo ghu tso musènguè, na mu bitchigha bia kèse muènè mu yimone mambe motchi ma mavioghe, na baate bakune niba yade ghu yimone tchiambe muènè. ¹⁵ Bo ni bayade ghu li Jesus. Na va bo bamone mutu wa baade na manioni mamabi a luate mangoyi, na matase ma sonda, bo ni baghémbe, ni ba mo bome. ¹⁶ Vaba ba mone ma mavioghe na mute wa bade na manioni mamabi, ni ba lèlè botchi ba bayade, motchi ma bo bamone, na lèlè bo motchi mamalote ghutso dimbe la bangule. ¹⁷ Baate ba bayade ghone, ni ba bonde Jesus mu mate va mutségue abo. ¹⁸ Va Jesus a ninguele ghu tso mbugu mu yèndè, mute wa bade na manioni mamabi na fule Jesus ndé: Chinguese mè mèyèndè na wuè ¹⁹ .To Jesus asa chinguese ndè mu yènde na ndè vè, ndè na lèlè ndé ndé: yènde ghu nzo, ghu tso yitsuke chia wè, wè lèlè bo motchi ma Nzèmbi achidili mu mbate a wuè, na buni Nzèmbi a chidili wè tchiambe la lebuè. ²⁰ . Mute muènè na yèndè na nanga ghu tso musèngue wa lekumi la mala. Na yole baate motchi ma Jesus asadele ndè. Baate botchi ba bayoghengue ma mute muènè a lèleguè, ni baghémba . ²¹ Va Jesus a sabeghe na mbungue gule mudibe yéna, piti a baate ni yadingue ndè va ndè bade mutèlè va pédi a mudibe. ²² Yivonde yi mochi chia nzo Nzèmbi, ndoghe a ndè Jairus, va ndè mone Jesus, na some mabongue mu tote va buse buèndi. ²³ Na bonde Jesus na lembande ndé: Muana a mè wa mukase bèle a bèlè; ndè ka bèlè na kua! Kokole a wè yade ghu tso nzo mè, wè béke ndè mioghe. Bèlesè ndè a fua moyi. ²⁴ A vana, Jesus na ba baduki bèndi, ni bayè na ndè. Piti a baate ni ya duke bo, bakima, ni ba bameghegue Jesus. ²⁵ Sa bona, aba na mukase mumochi wa bade na muvova, mu lekumi la biléma na biléma biole. ²⁶ Ndè na monengue paghe ya lotela, mu ndè yèndènguè ghu mboghe ba nganga, badole bèndi ni ba fua botchi, mu saghe bèleghe. To asa belèghè vè, na yibéde chièndi yisa ghèle mulinga vè. Cho ni yalotele ghala. ²⁷ Ndè na yoghe tsangue a Jesus, ndè na dukengue Jesus mambise va Jesus a yèndèngue ghu tso pite a baate, mukase muènè na bèmbè lengoyi lèndi. ²⁸ Ndè na taasegue ghu tso mutéma ndè, ndé : Ti mè bèmbè lengoyi lèndi mè bèleghe. ²⁹ A vana, ndè bèmbè lo, muvove na kania, ndè na mone ghu tso niute a ndè bu ndè bèleghè. ³⁰ Va kèti a vaana, Jesus a mone ti bungudi bua pole mu nuite a ndè. Ndè na guènguese pite a baate, na fule ndé: wu bémbi lengoyi lème na? ³¹ Baduki bèndi ni ba lèlè ndè bo: Wè mone pite a baate ba botchi ba babèmbe wè, mane wè fule wo, wu bémbi mè na? ³² To Jesus na kènguesenguè va fuèchi a baati mu mone wu chi lo. ³³ Mukase a yabenge li la lote mu ndè, na yade na règhene , na bole mabongue mu tote va busu bua Jesus, na lèlè ndè yimbuli chiotchi. ³⁴ Ndè na lèlè ndè, ndé: muana a mè, chite chiawè chi fuichili wè moyi. Yènde na pole, wè bèlèghè, mabéde ma maate mu niute a wè. ³⁵ Lekèse le ndè yambelengua, baate ni ba mate ghu nzo yivonde chia nzo Nzèmbi ni ba lèlè ndè bo: "Muana a wè wa mukase a ma kuade. Ka muki wè ba rokichi Mulonguichi?" ³⁶ To va ndè yoghe ma bo balèlènguè, Jesus na lèlè yivonde chia nzo Nzèmbi ndé, nia bome mone. Sose mutéma, badengua ndile na lebioghe. ³⁷ Ndè sa chingue ti pèti mute a duke ndè vè, mukabe na Pierre, Jacques, na Jean muane ngua Jacques. ³⁸ Bo ni ba ninguele ghu tso nzo a mukéli a badole ba nzo Nzèmbi. Jesus na mone pite a baate ya yadengue na mungungue, a bana na léla, a bana na mulota. ³⁹ Va ndè ninguele ghu tso nzo, ndè na lèle bo ndé: " Bé muki la chimene ma makima, na bé muki la léle? Muane asa kua vè, ndè ndi chiole a lidi." ⁴⁰ Bo ni basèbenguè ndè. To ndè na pose bo botchi ghu mbèdi. Ndè na tède tèyi na ngua muane, na botchi ba babade na ndè, bo ni ba ninguele ghu tchina nzo ghu muane abade. ⁴¹ Ndè na kuate muane mu ghoghe, na lèlè ndé: "Talitha Koumi" lesopele la ndoghe muènè ni lèlè ghua ti: "Nombe mukase, mè lèwè mé, soghe!" ⁴² Tinatina, muana na tèmenè, na yèndè, muti ndè bade ka na lekumi la biléma na biléma biole. Baate ni ba ghémba. ⁴³ Ndè na léghe bo, ba ya yole tchiambe muènè ghu li baate. Naba lèlè bo ndé, vèdani ndè biéle bia tchiade.